11/13/2019
Today from Hiiraan Online:  _
Wararka Maanta- Khamiis, Jun 20, 2013
Maamulka Gobolka Hiiraan oo Cambareyn u jeediyay Weerarka lagu qaaday xarunta UNDP ee Magaalada Muqdisho


Khamiis, Juun 20, 2013 (HOL) —Maamulka gobolka Hiiraan ayaa si kulul u cambaareeyay weerarka maalintii shalay xoogagga Al-shabaab ku qaadeen xarunta hay'adda UNDP ee magaalada Muqdisho kaasoo sababay khasaare isugu jira dhimasho iyo dhaawac.

Guddoomiyaha maamulka gobolka Hiiraan Cabdi Faarax Laqanyo oo la hadllay HOL ayaa sheegay in weerarkaasi uu ahaa mid fulaynimo ah oo lagu dhibaateynayo shacabka Soomaaliya madaama sida uu sheegay khasaaraha ugu badan weerarkaas uu ka soo gaaray dad rayid ah oo aan waxba galabsan.

''Waan cambaareyneynaa weerarkaas ay soo qaadeen kooxaha argagixisada, waana weerar muujinaya sida ay kooxahaas aysan wax dan ah  uga laheyn nolasha dadka shacabka, waxaan rabaa in aan tacsi u dirro dhamaan ehelada dadkii ku geeriyooday weerarka,'' ayuu yiri guddoomiyaha maamulka gobolka Hiiraan Cabdi Faarax Laqanyo.

Weerarka shalay lagu qaaday xarunta UN-ka ee magaalada Muqdisho ayaa waxaa mas'uuliyadiisa sheegtay xarrakada Al-shabaab oo siweyn uga soo horjeeda dowladda federalka iyo ciidamada ka taageera nabada ilaalinta.

Guddoomiyaha maamulka gobolka Hiiraan Cabdi Faarax Laqanyo ayaa  sheegay in weerarada noocaas oo kale wax u dhimi doonin dadaalada nabada ee socda, isaga oo ugu baaqay shacabka Soomaaliyeed in ay ku gacan siiyaan dowladda fedderaalka sugida amniga.

''Weerada noocaas oo kale ah ma'aha kuwo niyad jabin kara shacabka Soomaaliyeed iyo dadaalka dowladda ay ugu jirto dib u soo celinta nabada, bulshada waa in ay ku gacan siiyaan dowladda sugida amniga,'' ayuu yiri guddoomiyaha gobolka Hiiraan.

Weerarkii shalay lagu qaaday xarunta hay'adda UNDP ayaa sidoo kale waxaa  cambaareeyay maamulada kale ee dalka iyo hay'addo caalami ah.

C/raxmaan Diini, Hiiraan Online
[email protected]
Baladweyne, Soomaaliya










Click here
6/20/2013 3:41 PM EST
Khamiis, Juun 20, 2013 (HOL) — Xildhibaan Maxamed Faarax Jimcaale oo ka mid ahaa mudanayaasha baarlamaanka federaalka Soomaaliya ayaa maanta ku geeriyooday isbitaalka Madiina ee magaalada Muqdisho, kaddib uu muddo ku xanuunsanayay halkaas.

6/20/2013 11:18 AM EST
Khamiis, Juun 20, 2013 (HOL) — Madaxweynaha Soomaaliya, Xasan Sheekh Maxamud oo ka qaybgalay xafladdii xiritaanka shirweynaha Qaran ee dib-u-habeynta waxbarashada dalka oo saddex maalmood socday ayaa shegeay in waxbarashadu ay tahay mid ahmiyad gaar ah u leh Shacabka Soomaaliyeed.

6/20/2013 11:14 AM EST
Khamiis, Juun 20, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa wareegto uu maanta kasoo saaray xafiiskiisa ku magcaabay guddi heer Qaran oo u xirsaaray qabanqaabada xusaska maalmaha xorriyadda Soomaaliyya ee 26-ka Juun iyo 01-da Luuliyo.

6/20/2013 11:07 AM EST
Khamiis, June 20, 2013(HOL) - Wafdi ka socday safaarada Soomaalida ay ku leedahay dalka Kenya iyo wafdi kale oo Jubbaland ka tirsan ayaa booqday gudoomiye kuxigeenka maamulkii KMG ahaa ee Kismaayo Yaasiin Nuur Gaas (Raadeer), xilli ay xaaladiisa caafimaad si wayn uga soo raysay.

6/20/2013 10:43 AM EST
Khamiis, Juun 20, 2013 (HOL) — Golaha Wasiirrada Xukuumadda Somalia oo maanta yeeshay kulan uu shir-guddoominayay ra’iisul wasaare Cabdi faarax Shirdoon (Saacid) ayaa ayaa lagu ansixiyay magcaabista shan safiir oo cusub.

6/20/2013 8:39 AM EST
Khamiis, Juun 20, 2013 (HOL) — Ururka SYL II oo ah urur dhallinyaro ayaa ku qabtay degmada Marko ee gobolka Shabeellada Hoose munaasabad loogu magac-daray (U hiilli Askariga ha ku dhiiradee waajibkiisa”, taasoo ay qayb ka qaateen abaabulkeeda shacabka ku nool degmada Marko.

6/20/2013 8:11 AM EST
Khamiis, Juun 20, 2013 (HOL) — Tababar socon doona muddo afar casho ah ayay AMISOM maanta uga furtay Muqdisho guddiga maamulka iyo amniga baarlamaanka federaalka Soomaaliya, kaasoo lagu barayo habka dhismaha maamullada gobollada iyo sugidda ammaanka.

6/20/2013 7:57 AM EST
Khamiis, Juun 20, 2013 (HOL) — Maxkamadda dambiyada caalamiga ah ee ICC ayaa dib u dhigtay billaashada dacwaddii bani’aadamnimo ee loo haystay madaxweynaha dalka Kenya, Uhuru Kenyatta, taasoo billaaban lahayd 09-ka bisha July ee soo socota.

6/20/2013 7:16 AM EST
Khamiis, Juun 20, 2013 (HOL) — Xarakada Al-shabaab oo weerar ay dhowr qof oo shaqaale ah oo ka tirsan hay’adda UNDP iyo dad rayid ah ku dhinteen ku qaadday xarunta Hay’adaha Qaramada ee Muqdisho ayaa ku goodisay inay sii wadayso weerarrada ay la beegsanayso goobaha ay daggan yihiin hay’adaha Qaramada Midoobay ee Muqdisho ku yaalla.

6/20/2013 3:33 AM EST
Khamiis, Juun 20, 2013 (HOL) — Riwaayadan oo qabanqaabadeeda iyo maal-gelinteedaba uu lahaa ururka u dooda xuquuqda dhallinyarada ee SYAO ayaa waxaa jiliyay kooxda Qaylo-dhaan, waxaana ka qaybgalay xubno fara badan oo ka tirsan maamulka gobolka Banaadir iyo dadweyne kale.

6/20/2013 2:31 AM EST
Khamiis, Juun 20, 2013 (HOL) — Dowladda Mareykanka ayaa sheegay inuu si aad ah u cambaareynayo weerarradii ismiidaaminta iyo tooska ahaa ee shalay ay Al-shabaab la beegsatay xarunta hay’adaha Qaramada Midoobay ee Muqidsho, iyagoo ku tilmaamay weerar bahalnimo ah.

6/20/2013 2:29 AM EST
Khamiis, Juun 20, 2013 (HOL) — Qaramada Midoobay ayaa sheegay inay sii socon doonaan howlaha ay ka hayaan Soomaaliya, weerarkii shalay xarunta ay ku leeyihiin Muqdisho lala beegsadayna uusan horistaagi doonin howlaha ay dalka ka hayaan.