3/29/2024
Today from Hiiraan Online:  _
Wararka Maanta- Arbaco, Jun 19, 2013
Dowladda Somalia iyo AMISOM oo ka hadlay Weerarkii Maanta lagu Qaaday Xarunta Hay’adda UNDP ee Muqdisho

Arbaco, Juun 19, 2013 (HOL) — Dowladda Soomaaliya iyo AMISOM ayaa ka hadlay weerarkii Al-shabaab ku qaaday xarunta UNDP ee Muqdisho, iyagoo ku tilmaamay mid waxashnimo ah oo aan guuldarreystay.

Warsaxaafadeed kasoo baxay xafiiska ra’iisul wasaaraha Soomaaliya ayaa lagu cambaareeyay weerarkaas, waxaana uu Mudane Saacid sheegay inuu ahaa mid dareen la’aan ah oo xarun ay leedahay hay’ad u adeegta shacabka Soomaaliyeed.

“Si adag ayaan u cambaareynayaa weerarka dareen la’aanta ah ee maanta lala beegsaday xarunta UNDP ee Muqdisho. Qaramada Midoobay waa saaxiib aan leennahay oo gargaar aadamnimo siiya shacabkeenna, sidaa daraadeed aniga iyo shacabka Soomaaliyeed waanu ka xunnahay beegsiga xaruntaas,” ayuu ku yiri ra’iisul wasaare Cabdi Faarax Shirdoon (Saacid) warka uu kasoo saaray xafiiskiisa.

Ra’iisul wasaaruhu wuxuu sheegay in shacabka Soomaaliyeed uu ku wargelinayo in dhawaan ay ciidammo gaar ah billaayaan howlo lagu sugayo ammaankooda iyo amaanka xarumaha hay’adaha gargaarka.

“Ciidamada dowladda Soomaaliya iyo kuwa AMISOM, waxay sida ugu dhaqso badan ku billaabayaan howlgallo looga hortagayo qaraxyada iyo weerarrada noocan oo kale ah,” ayuu hadalkiisa raaciyay, isagoo sheegay inay aad uga xun yihiin weerarkaas iyo khasaarihii ka dhashay.

Isagoo sii hadalaya ayuu yiri: “Waxaan ducooyin u diraynaa saaxiibbadeen Qaramada Midoobay, waxaan u sheegayaa in Al-shabaab aysan doonayn in nabadi ay dhacdo, isla markaana aysan joojinayn dhibaatooyinka noocan oo kale ah, balse wax guul ah kuma gaarayaan.”

Dhanka kale, AMISOM ayaa iyaduna warsaxaafadeedkeeda ku sheegtay in ergayga gaarka ah ee Midowga Afrika u qaabilsan arrimaha Somalia, Danjire Maxamed Saalax Anaadiif uu si adag u cambaareynayo weerarkii argagaxiso ee lagu qaaday xarunta Qaramada Midoobay lagu qaaday maanta.

“Waxaan si adag u cambaareynaynaa weerarkaas fulaynida ah ee maanta lagu qaaday xarunta UNDP ee Muqdisho. Weerarkaas aragagaxiso waa mid ay Al-shabaab ku doonayso inay uga hortagto horumarka socda ee ay kaga baxayso Soomaaliya dhibaatooyinkii ay muddada dheer kusoo jirtay. Innagu waxaan xaqiijinaynaa inaan gacan siinayso shacabka iyo dowladda Somalia,” ayuu Anaadiif ku yiri warsaxaafadeedka.

Ugu dambeyn, ergaygu wuxuu sheegay inuu u mahadcelinayo ciidamadii ka geystay gacanta in xarunta UNDP laga difaaco Al-shabaab, isagoo tacsi u diray ehellada dadkii naftooda ku waayay weerarkaas.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/19/2013 2:32 PM EST
Arbaco, Juun 19, 2013 (HOL) — Madaxweynaha Soomaaliya, Xasan Sheekh Maxamud oo ka hadlay qaraxii iyo weerarkii dagaalyahanno Al-shabaab ka tirsan ay maanta la beegsadeen xarunta hay’adda UNDP ay Muqdisho ku leedahay, isagoo sheegay in Al-shabaab ay dhibaato ku hayaan shacabka.

6/19/2013 11:11 AM EST
Arbaco, Juun 19, 2013 (HOL) — Xarunta UNDP ee Muqdisho ayaa waxaa maanta barqadii weeraray xoogag taabacsan Al-shabaab, kuwaasoo uu sheegay wasiirka arrimaha gudaha in dhamaantood ay goobta ku dhinteen, sidoo kale wasiirku wuxuu sheegay in lagu dilay halkaas afar ilaaladii xarunta ka mid ahaa iyo afar ka mid ahaa ajnabigii UNDP u shaqeynayay.

6/19/2013 8:35 AM EST
Arbaco, Juun 19, 2013 (HOL) — Xildhibaannada baarlamaanka Soomaaliya ayaa maanta warbixinno ku saabsan sharciga maalgashiga dalka ka dhageystay wasiirka ganacsiga iyo warshadaha xukuumadda Soomaaliya, Maxamuud Axmed Xasan.

6/19/2013 8:10 AM EST
Arbaco, June 19, 2013(HOL) :- Xaaladda caafimaad ee gudoomiye kuxigeenka maamulkii KMG ahaa ee Kismaayo Yaasiin Nuur Gaas (Raadeer) ayaa lagu soo waramayaa in ay kasoo reeyneeyso kadib dhaawac ay shalay maleyshiyo hubeeysan ugu geeysteen gudaha magaalada.

6/19/2013 8:03 AM EST
Arbaco, Juun 19, 2013 (HOL) — Wasiirka arrimaha gudaha iyo Ammaanka Qaranka xukuumadda Soomaaliya, C/kariin Xuseen Guuleed ayaa sheegay in weerarkii maanta lagu qaaday xarunta UNDP ay ku dhinteen 15-qof oo ay afar ka mid ahaayeen shaqaalihii ajnabiga ahaa ee ka howlaglayay xarunta UNDP.

6/19/2013 6:37 AM EST
Arbaco, Juun 19, 2013 (HOL) — Xarakada Al-shabaab ayaa sheegatay inay mas’uul ka tahay weerarka lagu qaaday xarunta hay’adda horumarinta QM ee UNDP ay ku leedahay Muqdisho, iyadoo sarkaal u hadlay uu sheegay inay weerarka qaadeen ciidamadooda gaarka ah.

6/19/2013 5:56 AM EST
Arbaco, Juun 19, 2013 (HOL) — Kooxo hubeysan ayaa weerar ku qaaday maanta xarunta hay’adda UNPD ee Muqdisho oo u dhexeysa garoonka diyaaradaha ee Aadan Cadde iyo isgoyska mashquulka badan ee KM-4.

6/19/2013 2:52 AM EST
Arbaco, Juun 19, 2013 (HOL) — Wafdi ka socda baarlamaanka Soomaaliya ayaa markii ugu horreysay 20-sano kaddib ka qaybgalaya shirka ACP-EU oo ka furmay magaalada Brussels ee dalka Belgium oo ay ku taallo xarunta Midowga Yurub.