3/29/2024
Today from Hiiraan Online:  _
Wararka Maanta- Isniin, Jun 17, 2013
Kulan looga Tashanayo Nabadeynta Gobollada dhexe ee Somalia oo Maanta ka furmay Magaalada Muqdisho (SAWIRRO)


Isniin, Juun 17, 2013 (HOL) — Kulankan wadatashi ah oo la isugu keenay maamullada gobollada dhexe ee dalka oo ay soo qabanqaabiyeen hay’adaha  CRD iyo FCA-Finland oo kaashanaya wasaaradda arrimaha gudaha iyo amniga Qaranka ee xukuumadda Soomaaliya ayaa maanta ka furmay magaalada Muqdisho.

Agaasimaha hay’adda CRD, Jabriil Ibraahim Cabdulle oo hadal ka jeediyay furitaankii kulanka ayaa sheegay in kulankan uu yahay mid ay maamullada gobollada dhexe uga tashanayaan aayahooda, balse uusan ahayn mid lagu dhisayo maamul, isagoo sheegay in inta uu kulankan socdo la isku dhaafsan doono fikrado.

“Kulankan wuxuu socon doonaa saddex maalmood, maalinta ugu horreysa oo maanta ah waxaa looga hadli doonaa xaaladaha ka jira gobollada dhexe ee Soomaaliya, maalinta xigta oo berri ah waxaa looga hadli doonaa sidii maamulladu ay uga shaqeyn lahaayeen nabadda iyo sidii khayraadka gobolladaas ku duugan looga faa’iideysan lahaa, sidoo kale maalinta ugu dambeysa waxaa lasoo saari doonaa fikir guud oo lagu mideysan yahay, kaasoo loo gudbin doono hay’adaha deeqaha bixiya si gobollada dhexe looga saacido waxyaabaha ay u baahan yihiin,” ayuu yiri Jabriil Ibraahim.

Sidoo kale, wuxuu sheegay in kulankan uu yahay mid nabadeyn ah, laakiin uusan ahayn mid maamul lagu sameynayo, isagoo xusay in kulammo noocan oo kale ah loo qaban doono gobollada Koonfureed ee Soomaaliya sida Bay iyo Bakool.

Wasiir u dowlaha wasaaradda arrimaha gudaha iyo amniga Qaranka, Mahdi Maxamuud Cali oo kulanka furay ayaa isaguna sheegay inuu hay’adaha soo abaabulay kulankan uga mahadcelinayo, maadaama ay isku keeneen dhammaan maamulladii ka jiray gobollada dhexe ee dalka si ay uga tashadaan aayahooda.

“Dowladda Soomaaliya way soo dhaweynaysaa kulankan, waxayna diyaar u tahay inay gacan ka siiso maamullada gobollada dhexe wixii ay u baahan yihiin, go’aannada kasoo baxa kulankanna waan soo dhaweyn doonnaa,” ayuu yiri wasiir u dowlaha arrimaha gudaha.

Mas’uuliyiintii goobjooga ka ahaa kulankan oo ay ka mid ahaayeen guddoomiyaha gobolka Hiiraan, Cabdi Faarax Laqanyo, madaxweynihii hore ee Ximan iyo Xeeb, Maxamed Aadan Tiiceey, madaxweynaha Galmudug, Cabdi Xasan Cawaale (Qaybdiid), mas’uuliyiin ka socday maamulka Ahlusunna Waljamaaca iyo xubno kale ayaa waxayna dhammaantood sheegeen inay ku faraxsan yihiin inay kulankan isku arkaan fikradana isku dhaafsadaan.

Kulanka ayaa waxaa goobjoog ka ahaa xubno ajnabi ah oo furitaankiisa lagu casuumay, iyadoo kulankan uu noqonayo kii ugu horreeyay noociisa oo loo qabto maamullada ka jira gobollada dhexe ee Soomaaliya.












Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/17/2013 3:23 PM EST
Isniin, Juun 17, 2013 (HOL) —Kenya ayaa billowday qabanqaabad shir caalami ah oo looga tashanayo sidii qoxootiga Soomaalieed ee dalkaas ku nool dib loogu celin lahaa Soomaaliya, kaasoo dhici doona bisha Ogoosto ee sannadkan.

6/17/2013 3:23 PM EST
Isniin, Juun 17, 2013 (HOL) — Ugu yaraan 30-qoys ayaa gargaar raashin ah loogu qaybiyay maanta magaalada Buuhoodle, kaasoo lagu maamuusayay maalinta carruurta Afrika.

6/17/2013 10:43 AM EST
Isniin, Juun 17, 2013 (HOL) — Xarakada Al-Shabaab ayaa kusoo bandhigay barta ay ku leedahay Twitter-ka labo ruux oo Kenyan ah oo ay sheegtay inay ka mid yihiin askarta Kenya oo ay kasoo qafaasheen gobolka Waqooyi-bari ee dalkaas iyo qalab isugu jira hub ay ka mid yihiin qoryaha fudud, rasaas iyo kuwa isgaarsiinta loo isitcmaalo.

6/17/2013 10:10 AM EST
Isniin, Juun 17, 2013 (HOL) — Magaalada Baydhabo ee xarunta gobolka Bay ayaa waxaa ku dilay xaaskiisii oo shan caruur ah u haysay isla maraana lahayd uur nin lagu magacaabi jiray, Cabdirisaaq Xasan Saney oo isaguna markii dambe is-dilay.

6/17/2013 9:14 AM EST
Isniin, Juun 17, 2013 (HOL) — Kaddib howlgal saacadihii aynu soo dhaafnay ay ka sameeyeen ciidamada dowladda iyo kuwa Jabuuti ee howlgalka midowgga Africa AMISOM qeybo ka mid ah gobollka Hiiraan ayeey kula wareegeen deegaanno hoostaga magaalada Baladweyne oo ay horay gacanta ugu hayeen xoogagga Al-shabaab.

6/17/2013 9:13 AM EST
Isniin, Juun 17, 2013 (HOL) — Madaxweynaha maamulka Jubbaland, Axmed Maxamed Islaam (Axmed Madoobe ) oo ku sugan magaalada Addis Ababa ee dalka Itoobiya ayaa sheegay in ujeedka uu halkan u yimid ay tahay sidii uu iskaashi caalami ah ugu raadin lahaa maamulka uu madaxda ka yahay.

6/17/2013 7:46 AM EST
Isniin, Juun 17, 2013 (HOL) — Labaatan sano ayaa maanta ku buuxsantay markii ergaygii Qaramada Midoobay ee Soomaaliya, Admiral Johathan Howe uu amar ku bixiyay in lasoo qabto Jen. Maxamed Faarax Caydiid, xilligaas oo ku beegnayd 17-kii June 1993-kii.

6/17/2013 7:30 AM EST
Isniin, Juun 17, 2013 (HOL) — Tartan kubad cagta ah oo ay ka qeyb-qaadanayaa ilaa sideed kooxood oo ka dhisan afarta xaafadood oo ay ka kooban tahay magaalada Baladweyne, ayaa si rasmi ah uga furmay garoonka kubada cagta Lama-galaan.

6/17/2013 2:15 AM EST
Isniin, Juun 17, 2013 (HOL) — Xildhibaanno ka tirsan baarlamaanka Somalia ayaa xalay lagu weeraray bartamaha magaalada Nairobi ee dalka Kenya, xilli ay wateen gaari yar, waxaana kooxaha weerarka geystay oo ahaa rag sitay bastoolado ay ka qaateen xildhibaannada laabtoobyadii ay wateen.

6/17/2013 1:59 AM EST
Isniin, Juun 17, 2013 (HOL) — Ciidamadii ugu horreeyay oo ka tirsan milateriga Soomaaliya oo tababar ku qaata gudaha dalka ayaa lagu wadaa in maalmaha soo socda loosoo xiro tababarkooda, sida ay sheegeen saraakiisha milateriga Soomaaliya iyo wasaaradda gaashaandhigga.

6/17/2013 1:27 AM EST
Isniin, June 17, 2013(HOL) :- Gudiga gacanta ku hayay howsha dhismaha masjidka khadiim ee magaalada Baladxaawo ayaa waxay ka warbixiyeen howsha Dhismaha Masjidkaasi oo ay sheegeen in haatan ay mareeyso wejigii labaad ee dib u dhiska Masjidka, xilli howsha dhismaha masjidka ay socoto mudo haatan laga joogo sedex bilood.