11/22/2019
Today from Hiiraan Online:  _
Wararka Maanta- Sabti, Jun 1 , 2013
Xoghayaha Guud ee Qaramada Midoobay oo ku Baaqay in la Dar-dar-geliyo dib u soo celinta Nabadda Somalia



Sabti, Juun 01, 2013 (HOL) — Xoghayaha guud ee Qaramada Midoobay oo ka qaybgalaya shirka TICAD ee horumartinta Qaaradda Afrika oo ka socda magaalada Yokolohama ee dalka Japan ayaa ku booriyay beesha caalamka inay xoojiyaan qorshaha nabad raadinta Soomaaliya, si loo abuuro deegaan soo jiita dalxiisayaasha iyo dimuqraadiyad ka dhalata Soomaaliya.

Ban Ki-Moon ayaa sheegay in loo baahan yahay in la xoojiyo awoodda shacabka si ay uga qaybqaataan dib u dhiska dalkooda, sidoo kalena dowladda Soomaaliya lagala shaqeeyo sidii ay ammaanka u sugi lahayd.

Xiisadda ka taagan magaalada Kismaayo oo sannadkii hore laga saaray Al-shabaab ayuu sheegay inay tahay mid u baahan wadahadal dhexmara dadka deegaannadaas ku nool si loo xoojiyo wada-noolaasho dhexmarta iyo in laga hirgeliyo sharciga iyo kala dambeynta.

“Dib-u-habeynta garsoorka, hagaajinta kaabayaasha bulshada iyo xoojinta awoodda dadweynaha iyadoo tababarro la siinayo waa arrimaha muhiimka ah ee ay Soomaaliya u baahan tahay maanta,” ayuu hadalkiisa ku daray.

Ki-Moon wuxuu sheegay in Qaramada Midoobay ay sii wadi doonto kaalmada ay siiso Soomaaliya si loo xaqiijiyo dhaqaalaha bulshada iyo tiirarka siyaasadda si loo helo deegaan ku habboon bulaalidda ganacsiga, lana soo afjaro colaadaha si ay dadku awood ugu yeeshaan inay kobciyaan noloshooda.

Dhanka kale, ra’iisul wasaaraha Japan, Shinzo Abe ayaa shirka ka sheegay in loo baahan yahay in xeebaha Soomaaliya la cirib-tiro burcad-badeedda si dalka uu noqdo mid hela xasillooni iyo deggaansho horumar leh.

“Waxaan ku talinayaan in si dhaqso ah loo horumariyo nolosha shacabka Soomaaliyeed iyadoo loo marayo tababarro, sida dhinacyada caafimaadka, waxbarashada, biyaha iyo dib u dhiska kaabayaasha bulshada,” ayuu Abe ka sheegay shirka horumarinta ee Afrika.

Shinzo Abe wuxuu sidoo kale xusay in xoojinta awood-dhisidda dadka ay ka mid tahay waxyaabaha dib u soo noolaashaha dhaqaalaha dalka, kaddib 22-sano oo colaado sokeeye ah.

Ugu dambey, madaxweyne ku xigeenka Kenya oo isaguna hadal ka jeediyay shirka ayaa ugu baaqay qurbo-joogta Soomaaliya inay dib ugu laabtaan dalkooda ayna ka qaybqataan dib u dhiska dalkooda. Isagoo xusy in Kenya, dowladda Soomaaliya iyo hay’adda qoxootiga adduunka ee UNHCR ay qayb ka qaadanayaan sidii qoxootiga Soomaaliyeed dib loogu celin lahaa dalkooda.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
6/1/2013 2:59 PM EST
Sabti, Juun 01, 2013 (HOL) — Ergayga gaarka ee Qaramada Midoobay u qaabilsan arrimaha Soomaaliya, Augsutine Mahiga oo xilka ka dagaya laba maalmood ee socota gudahood, ayaa waraysigiisii u dambeeyay siiyay VOA, wuxuuna kaga hadlay maraxladihii Soomaaliya ay soo martay intii uu xilka hayay.

6/1/2013 2:46 PM EST
Sabti, Juun 01, 2013 (HOL) — Wasiir ku-xigeenka wasaaradda arrimaha dibadda iyo iskaashiga caalamiga ah ee xukuumadda Soomaaliya, Dr. Jamaal Maxamed Barrow ayaa maanta ka hor akhriyay xildhibaannada baarlamaanka Soomaaliya sharciga shaqada arrimaha dibadda (Foreign Service Low), kaasoo wasaaraddu ay diyaarisay ayna doonayso inay dib ugu habeyso hab-raaca diblomaasiyadeed oo lagu xilliyeynayo diblomaasiyadda iyo habka shaqo iyo shaqaalaha safaaradaha iyo qunsuliyadaha Soomaaliya ee dibadda.

6/1/2013 12:29 PM EST
Sabti, Juun 01, 2013 (HOL) — Xukuumadda Somaliland ayaa guddi heer Qaran ah u saartay soo dhaweynta, Prof. Axmed Ismaaciil Samatar oo lagu wado inuu Magaalada Hargeysa tago maalinta Berri ah oo ku beegan Axad.

6/1/2013 11:33 AM EST
Sabti, Juun 01, 2013 (HOL) — Madaxweyne Ku xigeenka Somaliland Mudane Cabdiraxmaan Cabdilaahi Ismaaciil (Saylici) iyo wefti uu hogaaminayo oo laba toddobaad ku maqnaa dalka ingiriiska ayaa shalay dalka dib ugu soo laabtay.

6/1/2013 11:28 AM EST
Sydney, Australia - Qeybaha kala duwan ee Soomaalida degan gobolka New South Wales gaar ahaan magaalada Sydney ayaan u kala hadhin xaflad weyn oo lagu soo dhaweeyey R/Wasaarihii hore ee Somalia Prof. C/Weli Maxamed Cali Gaas.

6/1/2013 11:09 AM EST
Sabti, Juun 01, 2013 (HOL) — Wasaaradda Dhalinyarada iyo Ciyaaraha Somaliland ayaa maanta ku dhawaaqday isku aadka kooxaha Gobolada Somaliland oo maalinta berrito ee Axadda ka furmi doona magaaladda Hargeysa.

6/1/2013 10:00 AM EST
Sabti, Juun 01, 2013 (HOL) — Guddoomiyha ururka haweenka ee degmada Baydhabo, Xaawo Sokoreey ayaa ka warbixisay maanta Haween tacadi kufsi loogu geystay xerooyinka barakacyaasha Baydhabo, waxay sheegtey in la kufsaday haween tiradoodu gaarayso 12 haween ah, qaarkood waxaa lagu kufsaday xero ay ku jiraan dadka soo barakacay oo lagu magacaabo IDAALE.

6/1/2013 8:49 AM EST
Sabti, Juun 01, 2013 (HOL) — Kulan looga hadlayay wacyi-gelinta haweenka iyo horumarinta waxbarashada gabadha Soomaaliyeed ayaa maanta lagu qabtay magaalada Muqdisho ee caasimada Soomaaliya.

6/1/2013 8:00 AM EST
Sabti, Juun 01, 2013 (HOL) — Madaxweynaha Soomaaliya, Xasan Sheekh Maxamud oo ka qaybgalaya shirka (TICAD V) ee ka socda magaalada Yokohama ee dalka Japan ayaa kulammo gooni-gooni ah kula yeeshay mas’uuliyiin ay ka mid yihiin madaxweyne ku-xigeenka dalka Kenya, madaxa bankiga adduunka, madaxa UNICEF iyo xubno kale.

6/1/2013 7:37 AM EST
Sabti, June 01, 2013(HOL) :-Waxaa magaalada Kismaayo soo gaaray ciidamo ka socda dowladda Sierra Leone oo iyagu qeyb ka ah howlgalka AMISOM ay ka wado Soomaaliya, waxaana ciidamadani oo sitay gaadiidka dagaalka iyo kuwa ciidamada daabula ay kasoo dageen marsadda caalamiga ah ee magaalada Kismaayo.

6/1/2013 7:23 AM EST
Sabti, June 01, 2013Wasiirka gaashaandhigga Soomaaliya iyo xubno ka tirsan golaha baarlamanka Soomaaliya ayaa weli ku sugan magaalada Kismaayo iyadoo maalinimadii shalay ay magaalada Kismaayo dib uga laabteen xubno uu horkacayay wasiirka warfaafinta boostada iyo isgaarsiinta Mudane C/laahi Ciilmooge Xirsi.

6/1/2013 2:23 AM EST
Sabti, Juun 01, 2013 (HOL) — Dagaal culus ayaa ciidanka dowladda Somalia, kuwa AMISOM iyo Al-shabaab ku dhexmaray shalay oo Jimco ahayd duleedka degmada Wanlaweyn ee gobolka Shabeellada Hoose, dagaalkaas oo sababay khasaare dhimasho iyo mid dhaawac.