3/28/2024
Today from Hiiraan Online:  _
Wararka Maanta- Sabti, July 27, 2013
Weerar Ismiidaamin ah oo lala beegsaday dhisme ay deggen yihiin Shaqaale ka tirsan Safaaradda Turkiga ee Muqdisho

Sabti, July 27, 2013 (HOL) — Saddex qof ayaa ku dhintay sagaal kalena dhaawacyo kala duwan ayaa kasoo gaaray weerar ismiidaamin ah oo maanta gellinkii dambe lala beegsaday dhisme ay deggenaayeen shaqaalaha safaraadda Turkiga ee Muqdisho, taasoo ku taala inta u dhexeysa KM-4 iyo Tarabuunka.

Weerarkan oo ahaa ismiidaamin lagu fuliyay gaari waxyaabaha qarxa laga soo buuxiyay ayaa waxaa dadka ku dhintay ay isugu jireen ninkii gaariga waday, wiil arday ah iyo qof kale oo la sheegay inay waxyaabaha qarxa ku xirnaayeen oo ay toogteen ciidamadii Turkiga ee ku sugnaa xaruntaas.

“Qaraxan ismiidaaminta ah waxaa lala beegsaday xarun ay deggen yihiin shaqaalaha safaaradda Turkiga oo ku taala meel ku dhow isgoyska KM-4, waxaana ku dhintay saddex qof oo qof ka mid ah uu ahaa rayid,” ayuu yiri Col. Axmed Maxamuud oo ka tirsan booliiska Soomaaliya.

Sarkaalka ayaa sheegay in gaariga weerarka lagu fuliyay oo ahaa nooca raaxda lagu dhuftay albaabka hore ee xarunta isagoo doonayay inuu daba-galo gaari ay leedahay safaaradda turkiga oo doonayay inuu xaruntaas galo.

Inkastoo aan si dhab ah loo ogeyn khasaaraha ka dhashay gudaha xarunta la weeraray haddana waxaa la sheegay in dad Turki ah ay dhaawacyo kala duwan kasoo gaareen, kuwaasoo ay goobta ka qaadeen gaadiidka gurmadka deg-degga ah.

Al-shabaab  ayaa sheegatay mas’uuliyadda weerarkan, iyagoo bartooda ay ku leeyihiin Twitter-ka ku sheegay in weerarka ay la beegsadeen saraakiil Turki ah oo ka howlgalayay safaaradda ay ku leeyihiin Muqdisho ayna qaar ka mid ah halkaas ku dileen.

“Weerarka ayaa waxaa fuliyay dagaalyahan ka tirsan Al-shabaab, waxaana uu la beegsaday koox dublaasiyiin ah oo Turkiga u dhashay, kuwaasoo  ku sugnaa dhisme ku yaalla degmada Hodan,” ayay Al-shabaab ku tiri qoraal ay soo dhigtay bartooda Twitter-ka.

Hay’adaha dalka Turkiga ayaa waxay u joogaan Soomaaliya sidii ay dib u dhis ugu sameyn lahaayeen Somalia kaddib 22-sano oo colaado iyo burbur ay ka socdeen, waxaana hay’adaha Turkiga ay kawadaan Muqdisho howlo dib u dhis ah oo ay ku jiraan isbitaallo dib loo dhisayo.

Waa markii labaad oo la weeraro shaqaale ka tirsan kuwa Turkiga ee dalka Somalia ku sugan, iyadoo bishii Abriil ee sannadkan lagu weeraray Muqdisho gaari ay wateen shaqaale ka tirsan hay’adda bisha Cas ee Turkiga, kaasoo ay ku dhaawcmeen saddex ka mid ah shaqaalaha Turkiga, darawl Somali ah oo u shaqeynayay uu ku dhintay.

Dowladda Soomaaliya ayaan ka hadlin weerarkan, iyadoo weerarkan uu ku soo beegmayo xilli ay soo kordhayaan weerarrada noocan oo kale ah oo ay ka geysanayso Al-shabaab gudaha magaalada Muqdisho ee xarunta Somalia.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
7/27/2013 1:07 PM EST
Sabti, July 27, 2013 (HOL) — Magaalada Boorama ee gobolka Awdal ayaa lagu soo gabagabeeyay tartankii sideedaad ee xifdinta Qur’aanka kariimka ah ee bisha Ramadaa, waxaana abaalmarinno kala duwan lagu siiyay arday ku guuleystay kaalimaha hore ee tartanka.

7/27/2013 9:28 AM EST
Sabti, July 27, 2013 (HOL) — Wasiirka cusub ee Arrimaha dibadda Somaliland Maxamed Biixi Yoonis, ayaa sheegay in weftigi midowga Yurub ee booqashada ku yimid Hargeysa u sheegeen in Somaliland iyo Soomaaliya laba marxaladood ku kala jiraan, isla markaana ay laba dal kala yihiin.

7/27/2013 9:08 AM EST
Sabti, July 27, 2013 (HOL) — Jahwareer ganacsi ayaa wali ka taagan magaalada Baladweyne ee xarunta gobolka Hiiraan, waxaana maanta albaabada loo laabay goobihii ganacsiga magaalada, kadib markii ay isku soo baxeen dadweyne ka cabanaya sare u kaca sarifka doolarka iyo korarka qiimaha la kala siisto maciishada.

7/27/2013 8:21 AM EST
Sabti, July 27, 2013 (HOL) — Kulan looga hadlayay waxa Diinta Islaamku ay ka qabto dilka qofka muslimka ah iyadoo Ramadaan lagu jiro ayaa maanta aglu qabtay Muqdisho, waxaana ka qaybgalay culumaa’uddiin ka kala socday bulshada qaybaheeda kala duwan.

7/27/2013 7:41 AM EST
Sabti, July 27, 2013 (HOL) — Madaxweynaha Somaliland Mudane Axmed Maxamed Maxamuud Silaanyo, ayaa xalay waxa uu qasriga madaxtooyada ku qaabilay Ardaydii Tartanka Qur’aanka Kariimka ku guulaysatay Kaalmaha hore ee Koowaad, Labaad, Saddexaad iyo Afraad.

7/27/2013 7:36 AM EST
Sabti, July 27, 2013 (HOL) — Xoogagga Al-shabaab ayaa xalay soo weeraray fariisamo ay ciidamada xoogga dalka iyo kuwa madaniga ah ee degmada ku leeyihiin xaafadaha Baydhabo, dagaalkaas ayaa socday muddo saacad ah.

7/27/2013 7:34 AM EST
Sabti, July 27, 2013 (HOL) — Maxkamadda Sare ee Kenya ayaa 26-ka July, 2013, burisay qorshe ay dowladda uga saaraysay 55,000 oo u badan qaxooti Soomaali ah caasimadda Nairobi iyo magaalooyin kale. Dadkaa ayaa waxaa la geyn lahaa xeryaha qaxootiga, Human Rights Watch ayaa sidaa sheegtay maanta.

7/27/2013 7:17 AM EST
Sabti, July 27, 2013 (HOL) — Hal qof ayaa ku dhintay, afar kalena way ku dhaawacmeen qarax lagu xiray gaari ay lahayd wasaaradda howlaha guud iyo guriyeynta xukuumadda Soomaaliya oo maanta ka dhacay isgoyska Sanca ee magaalada Muqdisho.

7/27/2013 3:14 AM EST
Sabti, July 27, 2013 (HOL) — Maxkamadda Ciidamada qalabka sidda ee dowaldda Soomaaliya ayaa saakay dil toogasho ah ku fulisay afar askari oo ka tirsan ciidamada dolwadda Soomaaliya, kuwaasoo horay u geystay dilal.

7/27/2013 2:37 AM EST
Sabti, July 27, 2013 (HOL) — Mas'uuliyiinta la wareegay talada dalka Masar aqyaa sheegay in amar lagu bixiyay in la xiro madaxweynihii hore ee Masar, Maxamed Mursi oo dhawaan ay ciidamada xooggu talada ka tureen, iyagoo sheegay su’aalo la weydiinayo.

7/27/2013 2:22 AM EST
Sabti, July 27, 2013 (HOL) — Magaalada Baydhabo ayaa waxaa xalay uu bam-gacmeed ku dilay ganacsade lagu magacaabi jiray Sheekh Saney, iyadoo warar kala duwan ay kasoo baxayaan qaabka uu u dhintay.

7/27/2013 2:05 AM EST
Sabti, July 27, 2013 (HOL) — Waxaa lagu wadaa in 24-ka saac ee soo socda gudahood lagu dhawaaqo isku shaandheyn lagu sameeyay golaha wasiirrada xukuumadda Soomaaliya, iyadoo la kordhin doono golaha wasaaradaha oo haatan ay tiradoodu tahay toban wasaaradood.