3/28/2024
Today from Hiiraan Online:  _
Wararka Maanta- Khamiis, July 18, 2013
Kulan Magaalada Baydhabo ku dhex-maray Saraakiisha Ciidamadii Itoobiya ee ka baxay Baydhabo iyo kuwa AMISOM

Khamiis, July 18, 2013 (HOL) — Saraakiisha ciidamada Itoobiya ee isaga baxay Baydhabo iyo kuwa AMISOM ayaa maanta kulan ay kaga hadleen xaaladaha ammaanka ee gobolka Bay ku yeeshay garoonka diyaaradaha ee Baydhabo.

Kulankan oo ay kasoo qaybgaleen mas’uuliyiinta maamulka gobolka Bay iyo xubno kale oo ka socday ciidamada Itoobiya iyo kuwa AMISOM ayaa waxaa looga hadlay sidii lagu adkeyn lahaa ammaanka guud ee Baydhabo, kaddib bixitaankii ciidamada Itoobiya.

“Ciidamada Itoobiya kama bixin dalka oo dhan, waxayna tegi doonaan meelo kale oo Soomaaliya ka tisran, si ay ula dagaalamaan Al-shabaab,” ayuu yiri Jen. Johnson oo ah sarkaalka ugu sarreeya ciidamada Itoobiya ee ku sugan dalka Soomaaliya.

Jeneraalka ayaa intaas ku daray in ciidamada Itoobiya ay Maanta si rasmi ah ugu wreejiyeen ammaanka Baydhabo ciidamada Midowga Afrika ee AMISOM, isagoo maamulka iyo shacabka Baydhabo ugu baaqay inay ka shaqeeyaan sidii ay gacan ugu siin lahaayeen ciidamada sugidda amniga.

Sidoo kale, wuxuu sheegay sarkaalka in kulankan uu yahay mid sagootin ah oo loo sameeyay ciidamadii Itoobiya eek a baxay Baydhabo, isagoo xusay in ciidamada kale ee Itoobiya ay sii joogi doonaan gobollada kale ee Somalia ka tisran.

“Somalia kama baxayno inta ay cadowu ku sugan yihiin, howlgalladeennana waan sii xoojin doonnaa, inta dalka oo dhan aan ka cirib-tirayno Kooxda Al-shabaab,” ayuu Jen. Johanson ka sheegay kulankii maanta.

Dhanka kale, saraakiishii ciidamada Itoobiya ee kulanka ka hadlay ayaa ka sheegay inay diyaar u yihiin inay la wareegaan degmada Baydhabo ayna ka shaqeyn doonaan sidii ammaanka ay ku xaqiijin lahaayeen.

Mas’uuliyiin u hadlay maamulka gobolka Bay ee xilligiisu dhammaaday ayaa sheegay inay soo dhaweynayaan in ciidamada AMISOM ay si rasmi ah ula wareegaan maanta gacan ku haynta Baydhabo, iyagoo sidoo kale u mahad-celiyay ciidamadii Itoobiya ee muddada labada sano ku dhow joogay halkaas.

Maxamed Xaaji Xuseen, Hiiraan Online
[email protected]
Muqdisho Soomaaliya













Click here
7/18/2013 3:31 PM EST
Khamiis, July 18, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) ayaa caawa ku casuumay bahda warbaahinta kulan afur iyo oo qaatay muddo saddex saacadood ah, iyadoo ra’iisul wasaaruhu uu ka sheegay goobta in xukuumaddu aysan doonayn inay warbaahinta ku qasabto sharci aysan raalli ka ahayn.

7/18/2013 3:23 PM EST
Khamiis, July 18, 2013 (HOL) — Gellinkii dambe ee maanta ayaa waxaa kooxo hubeysani ay ku toogteen gudaha suuqa weyn ee Bakaaraha afar qof oo xirnaa dharka shacabka, iyadoo aan la ogeyn sababaha afartaas qof loo dilay.

7/18/2013 10:44 AM EST
Khamiis, July 18, 2013 (HOL) — Golaha wasiirrada Xukuumadda federaalka Soomaaliya ayaa waxay maanta soo dhaweeyeen heshiiskii ay guddiyadii ka socday Soomaaliya iyo Somailand ay ku kala saxiixdeen toddobaadkii hore magaalada Istanbuul ee dalka Turkiga.

7/18/2013 10:37 AM EST
Khamiis, July 18, 2013 (HOL) — Madaxweynihii hore ee dalka Koofur Afrika, Nelson Mandella ayaa 95-sano jirsaday maanta isagoo ku jira isbitaal looga daweynayo caabuq kaga dhacay sambabada, Mandela oo dhashay 18, July, 1918-kii ayaa la la sheegayaa in xaaladiisa caafimaad ay aad u liidato.

7/18/2013 9:54 AM EST
Khamiis, July 18, 2013 (HOL) — Wasaaradda Caafimaadka Somaliland, ayaa maanta shaacisay in magaaladda Laascaanood ee gobolka Sool laga helay cudurka Dabaysha.

7/18/2013 9:53 AM EST
Khamiis, July 18, 2013(HOL) :- Waxaa maanta magaalada Kismaayo soo gaaray wafdi ka socday qaar kamid ah hay’adaha qaramada midoobay u qaabilsan arimaha biniaadaminada, iyadoona wafdigu uu booqday qeybo ka tirsan magaalada Kismaayo.

7/18/2013 8:25 AM EST
Khamiis, July 18, 2013 (HOL) — Maxkamadda sare ee maamulka Puntland ayaa mar kale xukunno dil ah ku ridday lix eedeysane oo afar ka mid ah ay ka maqan yihiin gacanta maamulka, halka labada kalena ay ku xiran yihiin xasbiga dhexe ee magaalada Garoowe.

7/18/2013 8:22 AM EST
Khamiis, July 18, 2013 (HOL) — Afhayeenka ciidamada AMISOM oo maanta shir jaraa’id ku qabtay Muqdisho ayaa sheegay in ciidamadooda ku sugan degmada Baydhabo ay buuxiyeen fariisimo ay ka baxeen ciidamadii Itoobiya ee halkaas ku sugnaa, isagoo xusay in ammaanka Muqdisho uu yahay mid aad u wanaagsan.

7/18/2013 3:00 AM EST
Khamiis, July 18, 2013 (HOL) — Ururka isku-tagga suxufiyiinta caalamka ee IFJ ayaa muujisay walaaca ay ka qabto sharciga saxaafadda ee dhawaan ay soo gudbisay xukuumadda Soomaaliya, iyadoo sheegtay in sharcigan uu meel kaga dhacayo xorriyadda saxaafadda Soomaaliya.

7/18/2013 2:57 AM EST
Khamiis, July 18, 2013 (HOL) — Muwaadin Soomaaliyeed oo ganacsade ah ayaa lagu dilay magaalada Johannesburg ee dalka Koonfur Afrika, iyadoo sidoo kalena dhac loo geystay shalay dukaamo ay ganacsato Soomaaliyeed ku lahaayeen magaalada Pretoria ee xarunta dalkaas.

7/18/2013 2:57 AM EST
Khamiis, July 18, 2013 (HOL) — Ugu yaraan afar qof ayaa ku dhintay in ka badan 11-qof oo kalena dhaawacyo ayaa kasoo gaaray dagaal ciidamada dowladda Soomaaliya iyo xoogagga Al-shabaab ku dhexmaray xalay deegaanka Ow-dinle oo ka tirsan gobolka Bay.

7/18/2013 2:25 AM EST
Khamiis, July 18, 2013 (HOL) — Kooxo bastoolado ku hubeysan ayaa xalay fiidkii ku dilay degmada Yaaqshiid guddoomiye ku xigeenkii degmadaas oo ahayd haweeney lagu magacaabi jiray, Raxmo Daahir.