3/29/2024
Today from Hiiraan Online:  _
Wararka Maanta- Khamiis, July 18, 2013
Ururka Isu-tagga Suxufiyiinta Caalamka ee (IFJ) oo Muujiyay Walaaciisa ku aaddan Sharciga cusub ee Saxaafadda Somalia

Khamiis, July 18, 2013 (HOL) — Ururka isku-tagga suxufiyiinta caalamka ee IFJ ayaa muujisay walaaca ay ka qabto sharciga saxaafadda ee dhawaan ay soo gudbisay xukuumadda Soomaaliya, iyadoo sheegtay in sharcigan uu meel kaga dhacayo xorriyadda saxaafadda Soomaaliya.

IFJ ayaa sheegtay in sharcigan oo ay golaha wasiirrada Soomaaliya ay meel-mariyeen 11-kii bishan uu khatar weyn ku yahay saxaafadda xorta ah ee ka jirta Soomaaliya, waxayna sheegeen in sharcigan uu xadidayo goobaha ay suxufiyiintu kasoo xigan karaan wararka, uuna kala soocayo suxufiyiinta ajnabiga ah ee howlaha u tagaya Soomaaliya.

“Waxaan xukuumadda federaalka ah ee Soomaaliya ugu baaqayaa inay dib u eegis ku sameyso sharciga qabyada ah ee saxaafadda ayna xaqiijiso inuu sharcigan noqdo mid ay ka muuqato xorriyadda saxaafadda madaxa-bannaan,” ayuu yiri Garbriel Baglo oo ah madaxa IFG ee Qaaradda Afrika.

Sidoo kale, Baglo wuxuu sheegay in sharcigan uu yahay mid caqabad ku ah suxufiyiinta isla markaana hor-joogsanaya inay si madaxbannaan u raadsan karaan war ama xogtii ay doonaan.

“Baarlamaanka Soomaaliya waxaan weydiisanaynaa inaysan meel-marin sharcigan oo ah mid caqabad ku ah saxaafadda xorta ah, waxaana ka dalbanaynaa inay iska diidaan,” ayuu hadalkiisa ku daray Gabriel Baglo.

IFJ waxay ugu baaqday dowladda Soomaaliya inay ka shaqeyso badbaadada suxufiyiinta, kana hortagto kuwa dilalka u geysanaya, isla markaana ay u ogolaato suxufiyiinta inay howlahooda wataan iyadoo aan la faro-gelinnayn.

“Haddii sharcigan qabyada ah ee saxaafadda uu meel-mariyo baarlamaanka Soomaaliya uuna saxiixo madaxweynaha Soomaaliya, taasi waxay dowladda ku keeni kartaa guul-darro, wuxuuna abuuri karaa xiisado u dhexeeya saxfaafadda xorta ah ee Soomaaliya ka howl-gasha iyo xukuumadda,” ayuu yiri Cumar Faaruuq Cismaan oo ah xoghayaha guud ee ururka suxufiyiinta Soomaaliyeed ee NUSOJ.

Faaruuq wuxuu sheegay in sharcigan haddii baarlamaanku uu meel-mariyo uu hor-istaagayo xorriyada madax-bannaanida saxaafadda Soomaaliya. Iyagoo sheegay inuu yahay mid xadidaya awoodda suxufiga iyo habka ay ku helayaan warbixinnada ay baahinayaan, taasna ay tahay mid keenaysa inay Soomaaliya noqoto dal aanay ka jirin saxaafad madax-bannaan.

Sharciga saxaafadda ee ay xukuumaddu soo gudbisay ayaa la sheegay inuu yahay mid xadidaya awoodda suxufiga Soomaaliyeed iyo warbaahinta dalka ka howlgasha, iyadoo suxufiyiin badan ay baarlamaanka weydiisteen inaan la ansixin sharcigan illaa isbedel lagu sameeyo.

Maxamed Xaaji Xuseen, Hiiraan Online
[email protected]
Muqdisho Soomaaliya













Click here
7/18/2013 3:31 PM EST
Khamiis, July 18, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) ayaa caawa ku casuumay bahda warbaahinta kulan afur iyo oo qaatay muddo saddex saacadood ah, iyadoo ra’iisul wasaaruhu uu ka sheegay goobta in xukuumaddu aysan doonayn inay warbaahinta ku qasabto sharci aysan raalli ka ahayn.

7/18/2013 3:23 PM EST
Khamiis, July 18, 2013 (HOL) — Gellinkii dambe ee maanta ayaa waxaa kooxo hubeysani ay ku toogteen gudaha suuqa weyn ee Bakaaraha afar qof oo xirnaa dharka shacabka, iyadoo aan la ogeyn sababaha afartaas qof loo dilay.

7/18/2013 10:44 AM EST
Khamiis, July 18, 2013 (HOL) — Golaha wasiirrada Xukuumadda federaalka Soomaaliya ayaa waxay maanta soo dhaweeyeen heshiiskii ay guddiyadii ka socday Soomaaliya iyo Somailand ay ku kala saxiixdeen toddobaadkii hore magaalada Istanbuul ee dalka Turkiga.

7/18/2013 10:37 AM EST
Khamiis, July 18, 2013 (HOL) — Madaxweynihii hore ee dalka Koofur Afrika, Nelson Mandella ayaa 95-sano jirsaday maanta isagoo ku jira isbitaal looga daweynayo caabuq kaga dhacay sambabada, Mandela oo dhashay 18, July, 1918-kii ayaa la la sheegayaa in xaaladiisa caafimaad ay aad u liidato.

7/18/2013 9:54 AM EST
Khamiis, July 18, 2013 (HOL) — Wasaaradda Caafimaadka Somaliland, ayaa maanta shaacisay in magaaladda Laascaanood ee gobolka Sool laga helay cudurka Dabaysha.

7/18/2013 9:53 AM EST
Khamiis, July 18, 2013(HOL) :- Waxaa maanta magaalada Kismaayo soo gaaray wafdi ka socday qaar kamid ah hay’adaha qaramada midoobay u qaabilsan arimaha biniaadaminada, iyadoona wafdigu uu booqday qeybo ka tirsan magaalada Kismaayo.

7/18/2013 8:43 AM EST
Khamiis, July 18, 2013 (HOL) — Saraakiisha ciidamada Itoobiya ee isaga baxay Baydhabo iyo kuwa AMISOM ayaa maanta kulan ay kaga hadleen xaaladaha ammaanka ee gobolka Bay ku yeeshay garoonka diyaaradaha ee Baydhabo.

7/18/2013 8:25 AM EST
Khamiis, July 18, 2013 (HOL) — Maxkamadda sare ee maamulka Puntland ayaa mar kale xukunno dil ah ku ridday lix eedeysane oo afar ka mid ah ay ka maqan yihiin gacanta maamulka, halka labada kalena ay ku xiran yihiin xasbiga dhexe ee magaalada Garoowe.

7/18/2013 8:22 AM EST
Khamiis, July 18, 2013 (HOL) — Afhayeenka ciidamada AMISOM oo maanta shir jaraa’id ku qabtay Muqdisho ayaa sheegay in ciidamadooda ku sugan degmada Baydhabo ay buuxiyeen fariisimo ay ka baxeen ciidamadii Itoobiya ee halkaas ku sugnaa, isagoo xusay in ammaanka Muqdisho uu yahay mid aad u wanaagsan.

7/18/2013 2:57 AM EST
Khamiis, July 18, 2013 (HOL) — Muwaadin Soomaaliyeed oo ganacsade ah ayaa lagu dilay magaalada Johannesburg ee dalka Koonfur Afrika, iyadoo sidoo kalena dhac loo geystay shalay dukaamo ay ganacsato Soomaaliyeed ku lahaayeen magaalada Pretoria ee xarunta dalkaas.

7/18/2013 2:57 AM EST
Khamiis, July 18, 2013 (HOL) — Ugu yaraan afar qof ayaa ku dhintay in ka badan 11-qof oo kalena dhaawacyo ayaa kasoo gaaray dagaal ciidamada dowladda Soomaaliya iyo xoogagga Al-shabaab ku dhexmaray xalay deegaanka Ow-dinle oo ka tirsan gobolka Bay.

7/18/2013 2:25 AM EST
Khamiis, July 18, 2013 (HOL) — Kooxo bastoolado ku hubeysan ayaa xalay fiidkii ku dilay degmada Yaaqshiid guddoomiye ku xigeenkii degmadaas oo ahayd haweeney lagu magacaabi jiray, Raxmo Daahir.