3/28/2024
Today from Hiiraan Online:  _
Wararka Maanta- Khamiis, July 18, 2013
Kooxo hubeysan oo toogasho ku dilay Haweeney Guddoomiye ku xigeen ka ahayd Degmada Yaaqshiid ee Muqdisho

Khamiis, July 18, 2013 (HOL) — Kooxo bastoolado ku hubeysan ayaa xalay fiidkii ku dilay degmada Yaaqshiid guddoomiye ku xigeenkii degmadaas oo ahayd haweeney lagu magacaabi jiray, Raxmo Daahir.

Dilkan oo aysan jirin cid weli sheegatay mas’uuliyadiisa ayaa waxay xubno ka tirsan maamulka degmadaas ku eedeeyeen Al-shabaab, iyadoo howlgal lagu raadinayo kooxihii ka dambeeyay dilkaas uu ka socdo Yaaqshiid.

Haweeneydan ayaa lagu toogtay meel ku dhow isgoyska Fagax ee degmada Yaaqshiid, iyadoo kooxihii weerarka geystay ay u suurogashay inay halkaas ka baxsadaan.

“Raxmo waxaa toogtay kooxo dhagar-qabayaal ah, mana jirin wax ilaalo ah oo la socday, dilkeedana waxaan ku eedeynaynaa Al-shabaab oo dhibaato ka geysata gudaha caasimada Soomaaliya ee Muqdisho,” ayuu yiri mas’uul sare oo ka tirsan maamulka degmada Yaaqshiid.

Gudoomiyaha degmada Yaaqshiid, Muxyadiin Xasan Jurrus oo si kooban uga hadlay dilka ku xigeenkiisii ayaa sheegay inay socdaan baaritaanno lagu raadinayo kooxihii weerarkaas ka dambeeyay, lana soo taagi doono haddii la soo qabto sharciga.

“Baaritaano ayaa socda, waxaana rajeynaynaa in lasoo qabto, sharcigana la horgeeyo si abaalkooda looga waraabiyo,” ayuu yiri Jurrus oo aan sheegin cid weli dilkaas loo qabtay.

Degmada Yaaqshiid ee gobolka Banaadir ayaa waxay ka mid tahay goobaha ay inta badan ka dhacaan dilalka qorsheysan ee lala beegsado mas’uuliyiinta ka tirsan dowladda Soomaaliya iyo ciidamada dowladda.

Haweeneydan ayaa noqonaysa mas’uulkii ugu horreeyay oo ka tisran maamulka degmada Yaaqshiid ee gobolka Banaadir oo sannadkan lagu dilo gudaha magaalada Muqdisho.

Maxamed Xaaji Xuseen, Hiiraan Online
[email protected]
Muqdisho Soomaaliya













Click here
7/18/2013 3:31 PM EST
Khamiis, July 18, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) ayaa caawa ku casuumay bahda warbaahinta kulan afur iyo oo qaatay muddo saddex saacadood ah, iyadoo ra’iisul wasaaruhu uu ka sheegay goobta in xukuumaddu aysan doonayn inay warbaahinta ku qasabto sharci aysan raalli ka ahayn.

7/18/2013 3:23 PM EST
Khamiis, July 18, 2013 (HOL) — Gellinkii dambe ee maanta ayaa waxaa kooxo hubeysani ay ku toogteen gudaha suuqa weyn ee Bakaaraha afar qof oo xirnaa dharka shacabka, iyadoo aan la ogeyn sababaha afartaas qof loo dilay.

7/18/2013 10:44 AM EST
Khamiis, July 18, 2013 (HOL) — Golaha wasiirrada Xukuumadda federaalka Soomaaliya ayaa waxay maanta soo dhaweeyeen heshiiskii ay guddiyadii ka socday Soomaaliya iyo Somailand ay ku kala saxiixdeen toddobaadkii hore magaalada Istanbuul ee dalka Turkiga.

7/18/2013 10:37 AM EST
Khamiis, July 18, 2013 (HOL) — Madaxweynihii hore ee dalka Koofur Afrika, Nelson Mandella ayaa 95-sano jirsaday maanta isagoo ku jira isbitaal looga daweynayo caabuq kaga dhacay sambabada, Mandela oo dhashay 18, July, 1918-kii ayaa la la sheegayaa in xaaladiisa caafimaad ay aad u liidato.

7/18/2013 9:54 AM EST
Khamiis, July 18, 2013 (HOL) — Wasaaradda Caafimaadka Somaliland, ayaa maanta shaacisay in magaaladda Laascaanood ee gobolka Sool laga helay cudurka Dabaysha.

7/18/2013 9:53 AM EST
Khamiis, July 18, 2013(HOL) :- Waxaa maanta magaalada Kismaayo soo gaaray wafdi ka socday qaar kamid ah hay’adaha qaramada midoobay u qaabilsan arimaha biniaadaminada, iyadoona wafdigu uu booqday qeybo ka tirsan magaalada Kismaayo.

7/18/2013 8:43 AM EST
Khamiis, July 18, 2013 (HOL) — Saraakiisha ciidamada Itoobiya ee isaga baxay Baydhabo iyo kuwa AMISOM ayaa maanta kulan ay kaga hadleen xaaladaha ammaanka ee gobolka Bay ku yeeshay garoonka diyaaradaha ee Baydhabo.

7/18/2013 8:25 AM EST
Khamiis, July 18, 2013 (HOL) — Maxkamadda sare ee maamulka Puntland ayaa mar kale xukunno dil ah ku ridday lix eedeysane oo afar ka mid ah ay ka maqan yihiin gacanta maamulka, halka labada kalena ay ku xiran yihiin xasbiga dhexe ee magaalada Garoowe.

7/18/2013 8:22 AM EST
Khamiis, July 18, 2013 (HOL) — Afhayeenka ciidamada AMISOM oo maanta shir jaraa’id ku qabtay Muqdisho ayaa sheegay in ciidamadooda ku sugan degmada Baydhabo ay buuxiyeen fariisimo ay ka baxeen ciidamadii Itoobiya ee halkaas ku sugnaa, isagoo xusay in ammaanka Muqdisho uu yahay mid aad u wanaagsan.

7/18/2013 3:00 AM EST
Khamiis, July 18, 2013 (HOL) — Ururka isku-tagga suxufiyiinta caalamka ee IFJ ayaa muujisay walaaca ay ka qabto sharciga saxaafadda ee dhawaan ay soo gudbisay xukuumadda Soomaaliya, iyadoo sheegtay in sharcigan uu meel kaga dhacayo xorriyadda saxaafadda Soomaaliya.

7/18/2013 2:57 AM EST
Khamiis, July 18, 2013 (HOL) — Muwaadin Soomaaliyeed oo ganacsade ah ayaa lagu dilay magaalada Johannesburg ee dalka Koonfur Afrika, iyadoo sidoo kalena dhac loo geystay shalay dukaamo ay ganacsato Soomaaliyeed ku lahaayeen magaalada Pretoria ee xarunta dalkaas.

7/18/2013 2:57 AM EST
Khamiis, July 18, 2013 (HOL) — Ugu yaraan afar qof ayaa ku dhintay in ka badan 11-qof oo kalena dhaawacyo ayaa kasoo gaaray dagaal ciidamada dowladda Soomaaliya iyo xoogagga Al-shabaab ku dhexmaray xalay deegaanka Ow-dinle oo ka tirsan gobolka Bay.