Dawlada Soomaaliya oo beenisay in sharciga warbaahinta lagu daray qodob wariyayaasha 40 sano shuruud uga dhigay
Arbaco,
July 17, 2013 (HOL) - Dawlada Soomaaliya ayaa beenisay warar ay horay
saxaafadu isula dhex maraysay oo sheegaya in sharciga qabyada ah ee
saaxafadda kaasoo ay meelmariyeen golaha wasiirradu ay ku jirto qodob 40
sano shuruud uga dhigaya ka shaqaynta mihnada warbaahinta.
Waxaana
horay u soo baxay warar sheegaya in sharcigan oo la damacsanyahay in la
horgeeyo baarlamaanka uu ku xadaynayo ka shaqaynta warbaahinta wixii ka
wayn afartan sannadood.
Xafiiska Wasiirka warfaafinta, boostada
iyo isgaarsiinta Soomaaliya C/laahi Ciilmooge Xirsi oo ay Hiiraan Online
wax ka waydiisay arrinkaas ayaa beeniyay qodobkaas, waxaana uu sheegay
in qodobkani uu ku jiray markii hore hindiseyaal loosoo gudbiyay balse
markii dambe ay ka saareen qodobadii sharciga golaha wasiirradu ay meel
mariyeen.
"Waxa saxaafada qaarkeed ay qortay waxba kama jiraan,
mana dhici karto in 40 sano lagu xadeeyo mihnad dhan oo dadka ka
shaqeeya ay dhalinyaro u badanyihiin" ayaa lagu yiri farriin kasoo
baxday xafiiska Wasiirka.
Markii ay soo baxeen wararka sheegaya
in uu ku jiro sharciga qodobka 40-ka sano ku xadaynaya ka shaqaynta
warbaahinta ayaa waxaa arrintaasi ay dhalisay buuq ka imaanaya hay'adaha
u dooda xorriyada warbaahinta, kuwaasoo ku tilmaamay sharciga cusub
inuu meel ka dhac ku yahay xorriyatul qawlka iyo xuquuqda uu qof waliba
u leeyahay doorashada mihnada uu doono iyadoon da' lagu xiraynin.
Axmed C/samad, Hiiraan Online
[email protected]Nairobi , Kenya