Wararka Maanta: Jimco, Feb 14, 2013-Mas'uuliyiin ka tirsan Dowladda Somalia oo ka qeyb-galay aaskii loo sameeyay Guddoomiyiihii Ahlusunna Waljameeca (SAWIRRO)

Mas'uuliyiin ka tirsan Dowladda Somalia oo ka qeyb-galay aaskii loo sameeyay Guddoomiyiihii Ahlusunna Waljameeca (SAWIRRO)

Khamiis, Feberaayo 14, 2013 (HOL) — Mas’uuliyiin ka tirsan dowladda Soomaaliya ayaa maanta ka qeyb-galay aas balaaran oo degmada Guri-ceel ee gobollka Galguduud loogu sameeyay guddoomiyihii gollaha fulinta Ahlu Sunna Waljameeca Sheekh Max’ed Yuusuf Xeefoow oo maalintii shalay Muqdisho ku geeriyooday.

Xubno ka tirsan xukuumada Soomaaliya oo uu horkacayay wasiirrka arrimaha gudaha iyo amniga Qaranka xukuumada Soomaaliya C/kariin Xusseen Guulleed iyo mas’uuliyiin kale oo isaga kala timid deegaannada gobollada dhexe ayaa ka qeyb-galay aaska Sheekh Xeefow.

C/kariin Xusseen Guulleed wasiirrka arrimaha gudaha oo hadllay aaska kadib, waxaa uu sheegay in marxuum-ka dhintay uu ahaa muwaadin ama shaqsi door weyn ka qaatay hormarinta nabada.

Sheekh Max’ed Yuusuf Xeefoow oo maalintii shalay ku geeriyooday isbitaalka Xalane ee ciidamada AMISOM ku leeyihiin Muqdisho ayaa la sheegay in uu qabay cudurka Sonkorta oo si lama filaan ah ugu soo booday.

Waxaa loo doortay in uu noqdo guddoomiyaha gollaha fulinta Ahlu Sunna Waljameeca Augusto 2011, kadib markii guddi ka kooban 32 xubnood ay ku doorteen kulan ka dhacay degmada Caabud-waaq ee gobollka Galguduud.

Xuquuqda Sawirrada: Radio Muqdisho

C/raxmaan Diini, Hiiraan Online
[email protected]
Baladweyne, Soomaaliya