10/6/2022
Today from Hiiraan Online:  _
Wararka Maanta- Arbaco, Feb 13, 2013
Guddoomiyihii Ahlusunna Waljamaaca oo ku geeriyooday Isbitaal ay Maamusho AMISOM oo ku yaalla Magaalada Muqdisho

Arbaco, Feberaayo 13, 2013 (HOL) — Guddoomiyaha Ururka Ahusunna Waljamaaca, Sheekh Maxamed Yuusuf Xeefoow ayaa ku geeriyooday isbitaal ay maamusho AMISOM oo ku yaalla Muqdisho, kaddib markii xanuun xalay kusoo booday awgiis loo keenay Muqdisho.


Guddoomiyihii Ahlusunna, Sheekh Xeefoow

Wasiirka arrimaha gudaha Soomaaliya, C/kariin Xuseen Guuleed oo ka mid ahaa mas’uuliyiintii isbitaalka ku booqday ayaa sheegay in xaalad aad u adag uu ku jiray markii uu isbitaalka kusoo booqanayay.

“Markaan arkay xaaladda uu ku jiro Sheekhu waxaan la hadlay madaxweynaha waxaana amar lagu bixiyay in loo qaado meel walba oo xanuunkiisa wax looga qaban karo, balse tii Alle ayaa u timid,” ayuu yiri wasiirka arrimaha gudaha ee Soomaaliya.

Sidoo kale, wasiirku wuxuu sheegay in Sheekh Xeefoow uu muddo dheer ka shaqeynayay sidii ay Soomaaliya ammaan ku noqon lahayd, isagoo xusay in taas lagu xasuusan doono weligiis.

Wasiirka arrimaha gudaha ee Puntland, C/llaahi Axmed Jaamac (Ilko-Jiir) oo isaguna ka hadlay geerida marxuumka ayaa sheegay inay tahay mid ay aad uga naxeen, wuxuuna tacsi u diray ehellada iyo cid walba oo garanaysay Sheekha Xeefoow.

“Nabadgalyada dalka wax weyn ayuu kusoo kordhiyay wax badan ayuuna ka qabatay, waxaana leeyahay Ahlusunna iyo Soomaalida oo dhan Alle samir iyo iimaan ha idinka siiyo” ayuu yiri Ilko-jiir.

Lama sheegin halka lagu aasi doono guddoomiyaha golaha fulinta ee ururka Ahlusunna Waljamaaca oo xiriir dhow la leh dowladda Soomaaliya, iyadoo uu noqonayo mas’uulkii ugu sarreeyay Ahlusunna oo ku geeriyooda Muqdisho.

Sheekh Xeefoow ayaa dhowr jeer u yimid Muqdisho sidii iskaashi dhinacyo badan leh uu u dhexmari lahaa dowladda Soomaaliya iyo Ahlusunna oo ka mideydan dagaalka lagula jiro Xarakada Al-shabaab.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
2/13/2013 11:31 AM EST
Arbaco, Feberaayo 13, 2013 (HOL) — Madaxweynaha Somaliland, Axmed Maxamed Maxamuud (Siilaanyo), ayaa sheegay in aanay shirka Arrimaha Soomaaliya lagaga hadlayo ee bisha May ka dhici doona magaalada London ka qaybgali doonin haddii ay u arkaan in karaamadda iyo qaranimadda Somaliland wax u dhimayso.

2/13/2013 11:26 AM EST
Arbaco, Feberaayo 13, 2013 (HOL) — Ugu yaraan laba qof ayaa ku dhintay laba kalena way ku dhaawcmeen qarax ka dhacay gellinkii dambe ee maanta Isgoyska Black Sea ee degmada Hodan, iyadoo sidoo kale kooxo hubeyasn ay maqribnimadii caawa toogasho ku dileen askari ka tirsan kuwa dowladda oo ku sugnaa suuqa Bakaaraha.

2/13/2013 9:35 AM EST
Arbaco, Feberaayo 13, 2013 (HOL) — Guddoomiyaha baarlamaanka Somalia iyo wafdi uu hoggaaminayo ayaa maanta u dhoofay magaalada Addis Ababa ee xarunta dalka Itoobiya, iyadoo safarkan uu noqonayo kii ugu horreeyay oo uu dalka kaga ambabaxo.

2/13/2013 9:27 AM EST
Arbaco, Feberaayo 13, 2013 (HOL) — Magaalada Berlin ee dalka Jarmalka ayaa lagu soo gabagabeeyay shirweyne caalami ah oo looga hadlayay dhoofinta Mooska iyo miraha kale kaasoo socdey 06 illaa 09 bishaan feberaayo, arrimo ku saabsana shirkaas iyo heshiisyo ay soo gashay ayay mas’uuliyiinta shirkadda Fruitsome kaga warbixiyeen xaruntooda Muqdisho ee Soomaaliya.

2/13/2013 7:54 AM EST
Arbaco, Feberaayo 13, 2013 (HOL) — Madaxweynaha Soomaaliya, Xasan Sheekh Maxamuud ayaa kulan ay albaabbadu u xiran yihiin la yeeshay ergayga Midowga Afrika ee arrimaha Soomaaliya, danjire Maxamed Saalax Annaadiif oo ay wehliyeen xubno ka socday ururka Midowga Afrika.

2/13/2013 6:30 AM EST
Arbaco, Feberaayo 13, 2013 (HOL) — Qunsuliyadda Guud ee Soomaaliya ay ku leedahay wadanka Australia ayaa habeenimadii xalay kulan isugu yeertay dhammaan aqoonyahanada iyo waxgaradka Soomaaliyeed ee ku nool waddankaas.

2/13/2013 6:27 AM EST
Arbaco, Feberaayo 13, 2013 (HOL) — Dagaal culus oo la isku adeegsaday hubka noocyadiisa kala duwan ayaa ciidamada Somaliland iyo kuwa maamulka Khaatumo ku dhexmaray deegaanka Laf-weyn oo ka tirsan deegaanka Xuddun kana xigta dhinaca galbeed qiyaastii 20-km.

2/13/2013 5:26 AM EST
Arbaco, February 13, 2013(HOL) - Shan qof ayaa dhimatay afar kalena waxaa kasoo gaaray dhaawacyo kadib markii gaari nooca rakaabka qaado uu ku rogmaday duleedka magaalada Dooloow ee gobolka Gedo.

2/13/2013 3:15 AM EST
Arbaco, February 13, 2013(HOL) - Waxaa shalay gelinkii danbe gudaha magaalada Kismaayo lagu dilay gudoomiyihii maxkamadda ciidamada qalabka sida ee degamada Kismaayo G/sare Max’ed Cismaan Cali (Keyb-haye), kadib markii ay haleeshay rasaas ay isweeydaarsanayeen laba askari oo katirsan ciidamada dowladda.

2/13/2013 1:53 AM EST
Arbaco, February 13, 2013(HOL): Magaalada Baydhabo ee xarunta u ah Gobolka Bay ayaa xalay waxaa ka dhacay dagaal geystay khasaare dhimasho iyo dhaawac isugu jira, kaasi oo dhexmaray Xoogagga Al-Shabaab iyo Ciidamada Dowladda iyo kuwa kale ee gacanta siinaya.