5/15/2021
Today from Hiiraan Online:  _
Wararka Maanta- Sabti, Dec 7 , 2013
Nin ay si aad ah u Doon-doonayeen Ciidamada la Dagaallanka Argagaxisada ee Dalka Kenya oo lagu dilay Magaalada Mombasa



Sabti, December 07, 2013 (HOL) — Nin ay si aad ah u doon-doonayeen cidamada la dagaalanka argagaxisada ee Kenya ayaa lagu dilay maanta magaalada Mombasa ee dalka Kenya, iyadoo ciidamadu ay ku toogteen bas gudihiis.

Xasan Suleymaan Mwayuyu ayay booliiska Kenya sheegeen inuu ahaa nin tababarro ku siin jiray gudaha dalkaas xoogag ku biiraya kooxda Al-shabaab ee Soomaaliya, iyadoo la sheegay in dhallinyarada uu inta badan ka kexeyn jiray deegaannada Kwale, Changamwe iyo Kisauni.

Ninkan ayay walaalo ahaayeen Xasan Nyiro oo booliiska Kenya ku dileen bishii Juun ee sannadkan 26-keedii xaafadda Kisauni, kaasoo la sheegay inuu dhallinyarada u qori Al-shabaab tababarrana ku siin jiray gudaha Kenya.

Xaaska Nyiro oo lagu magacaabo Raxma Xasan ayaa iyadana horay loogu eedeeyay inay hubka iibin jirtay. Hay’adaha xuquuqda aadanaha ayaa si aad ah u cambaareeyay dilkan, iyagoo sheegay inay tahay mid sharciga dalkaas ka baxsan.

“Dilalka waa inay noqdaan kuwo sharciga loo maro, balse ma ahan in inta qof la iska eedeeyo haddana lagu toogto dariiqyada, taasina waa mid ka baxsan sharciga,” ayuu yiri Xasan Khaalid oo ah madaxa ururka xuquuqda aadanaha ee Haki Africa.

Sidoo kale, Mr. Khaalid ayaa warbaahinta Kenya u sheegay in booliisku ay soo saareen digniin lagu soo qabanayo ninkaas, waxayna ahayd in marka hore sharciga la geeyo qofka si uu isku difaaco ama u qirto dambigiisa.

Booliiska Kenya ayaa sheegay Isniintii lasoo dhaafay in ninkan uu mas’uul ka ahaa weerarro kala duwan oo lagu qaaday kaniisado ku yaalla dalka Kenya, waxaana u suurogashay ciidamadu inay maanta oo Sabti ah toogtaan.

Taliyaha booliska Kwale, Richard Mugwai ayaa sheegay in aroornimadii hore ee saakay 8:00 aroornimo Xasan Mwayuyu lagu dhex-toogtay bas yar oo ay saarnaayeen 29-qof oo rakaab ah, isagoo xusay inay baaritaan ku sameyn doonaan arrintaas.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
12/7/2013 2:42 PM EST
Sabti, December 07, 2013 (HOL) — Magaalada Jigjiga ee magaalo-madaxda ismaamulka Soomaalida Itoobiya ayaa waxaa ka socda diyaar-gowga loogu jiro xuskii siddeedaad ee qowmiyadaha dalka Itoobiya ayaa waxaa u suuro-gashay Hiiraan Online (HOL) inay idiin soo gudbiso sawirrada diyaar-garowga xuskaas.

12/7/2013 1:35 PM EST
Sabti, December 07, 2013 (HOL) — Shirkii looga hadlayay ammaanka iyo dhaqaalaha Qaaradda Afrika oo labadii casho ee lasoo dhaafay ka socday magaalada Paris ee xarunta dalka Faransiiska ayaa lasoo gaba-gabeeyay caawa, iyadoo la isku raacay in Afrika laga caawiyo sidii ay uga bixi lahayd dhaqaale xumada iyo amni-darrada haysata.

12/7/2013 12:57 PM EST
Sabti, December 07, 2013 (HOL) — Khataraha ka jira dalka Liibya waxay u ekeysiiyeen dalkaas sidii Somalia oo kale, sidaa waxaa yiri madaxweynaha dalka Nayjar, Mahamadou Issoufou oo la hadlayay warfidiyeenka isagoo kusii jeeda magaalada Paris ee xarunta dalka Faransiiska oo uu ka socdo shir ammaanka Qaaradda Afrika looga hadalyo.

12/7/2013 12:33 PM EST
Sabti, December 07, 2013 (HOL) — Booliiska rabshadaha ka hor-tagga ee dalka Kenya ayaa shalay oo Jimco ahayd 20-qof oo muslimiin ah ku xiray magaalo xeebeedda dalkaas ee Mombasa, kaddib markii ay hareereeyeen masjidka Sakina oo ku yaalla xaafadda Majengo. Waxaana ku jiray afar qof oo maxkamad ay amartay in lasoo xiro sida uu sheegay taliyaha booliiska ee Makupa.

12/7/2013 12:07 PM EST
Sabti, December 07, 2013 (HOL) — Garaad Saleebaan Garaad Max'ed Garaad Maxamuud oo ay weheliyaan odayaal iyo waxgaradka deegaanka Sarmaanyo oo degmada Taleex kaga beegan dhinaca waqooyi 80-km ayaa ku baaqay in nabad iyo wadahadal lagu dhameeyo khilaafkii sababay dagaalladii ka dhacay degmada Taleex ee gobolka Sool.

12/7/2013 9:37 AM EST
Sabti, December 07, 2013 (HOL) — Taliyaha ciidamada ilaalada waddooyinka ee gobolka Banaadir, Jen. Cali Xirsi Barre (Cali Gaab) ayaa shaaciyay in sannadkan ay Muqdisho iyo degmooyinka ku dhow-dhow ka dhaceen illaa 12,00 oo shilal gaadiid ah, kuwaasoo ay ku naf-waayeen 80-qof.

12/7/2013 9:21 AM EST
Sabti, December 07, 2013 (HOL) — Iyadoo lagu waday in maxkadda gobolka Banaadir ay maanta dhageysato dacwad loo haysto milkiilaha Radio Shabelle, C/maalik Yuusuf, wariye Maxamed Bashiir iyo gabar wariye ah oo sheegtay in la kufsaday ayaa dib loo dhigay.

12/7/2013 8:34 AM EST
Sabti, December 07, 2013 (HOL) — Shirar kala duwan ayaa maanta Baydhabo ka dhacay maanta kaddib markii uu magaaladaas gaaray guddoomiyihii hore ee baarlamaankii KMG ahaa ee Somalia, Shariif Xasan Sh. Aadan oo ka mid ah xildhibaan ka tirsan baarlamaanka hadda jira iyo wafdi u badan xildhibaanno oo uu hoggaaminayay.

12/7/2013 7:35 AM EST
Sabti, December 07, 2013 (HOL) — Waxaa laga dayrinayaa xaaladda caafimaad ee qaar kamid ah dadkii ku dhaawacmay qaraxii is-miidaaminta ahaa ee saddex maalmood kahor ka dhacay magaalada Boosaaso ee xarunta gobolka Bari.

12/7/2013 7:00 AM EST
Sabti, December 07, 2013 (HOL) — Wafdi uu horkacayo wasiirka war-faafinta, boostada, isgaarsiinta iyo gaadiidka Soomaaliya, C/llaahi Ciilmooge Xirsi oo ay ka mid yihiin, wasiirka ganacsiga iyo warshadaha, Maxamed Axmed Xasan, xildhibaanno, odayaal-dhaqameed iyo xubno ka socday ururrada bulshada rayidka ah ayaa xalay gaaray magaalada Jigjiga oo ah xarunta ismaamulka Soomaalida Itoobiya.

12/7/2013 6:37 AM EST
Sabti, December 07, 2013 (HOL) — Wasiiradda arrimaha dibadda Soomaaliya, Fowsiyo Yuusuf Xaaji Aadan oo ka qaybgalaysa shirka looga hadlayo amniga iyo nabadgalyada qaaradda Afrika ee ka socda Paris ayaa sheegtay in Nelson Mandela uu astaan u ahaa midnimada iyo dib u heshiisiinta dalka Koonfur Afrika.

12/7/2013 6:30 AM EST
Sabti, December 07, 2013 (HOL) — C/weli Maxamed Cali Gaas oo ah musharrax u taagan xilka madaxweynenimo ee Puntland, ayaa maanta si weyn loogu soo dhoweeyey magaalada Boosaaso ee xarunta gobolka Bari.

12/7/2013 5:44 AM EST
Sabti, December 07, 2013 (HOL) — Xildhibaan Maxamed Warsame Faysal oo shalay lagu dilay qarax ka dhacay afaafka hore ee madaxtooyada Somalia oo maanta lagu aasay gudaha isbitaalka Madiina ee magaalada Muqdisho, iyadoo aaskiisana ay ka qayb-galeen ra’iisul wasaaraha xilka ka dagaya ee Somalia, Cabdi Faarax Shirdoon (Saacid), xildhibaanno uu ka mid ahaa guddoomiye ku xigeenka baarlamaanka iyo wasiirro ka tirsan xukuumadda.

12/7/2013 5:30 AM EST
Sabti, December 07, 2013 (HOL) — Wafdi uu hoggaaminayo guddoomiyihii hore ee baarlamaanka Soomaaliya, Shariif Xasan Sheekh Aadan ayaa maanta gaaray magaalada Baydhabo ee xarunta gobolka Bay, halkaasoo si weyn loogu soo dhaweeyay.

12/7/2013 2:08 AM EST
Sabti, December 07, 2013 (HOL) — Ugu yaraan laba ruux ayay dhaawacyo kasoo gaareen saddex madfac oo xalay ku dhacay xaafadda Xamar-jadiid ee degmada Wadhiigley, iyadoo aan la ogeyn halka ay madaafiicdaas ka yimaadeen.

12/7/2013 2:08 AM EST
Sabti, December 07, 2013 (HOL) — Madaxweyne ku xigeenka maamulka Khaatumo, Maxamed Jaamac Yuusuf (Indha-sheel) ayaa wacad ku maray inaanu marna baaqan doonin shirkii Khaatumo, kaddib mar shalay boqolaal qof kula hadlayay degmada Buuhoodle.

12/7/2013 1:42 AM EST
Sabti, December 07, 2013 (HOL) — Ciidammo Itoobiyaan ah oo hor leh ayaa soo gaaray deegaanka Ceelbarde ee gobolka Bakool halkaasoo ay dowladdu ka taliso, iyadoo aan la ogeyn ujeeddada ciidamadan, sidoo kale ciidamada dowladda Soomaaliya iyo kuwa Itoobiya ayaa howlgallo ka sameeyay waddo isku xirta deegaanka Awdiinle iyo degmada Qasax-dheere oo Al-shabaab u xirnayd.

12/7/2013 1:08 AM EST
Sabti, December 07, 2013 (HOL) — Wareegto kasoo baxday xafiiska hoggaamiyaha guud ee maamulka KMG ee Jubba, Sheekh Axmed Maxamed Islaam (Axmed Madoobe) ayaa maanta lagu magacaabay siddeed wasiir iyo madaxweyne ku xigeenka labaad ee maamulka Jubba.