5/15/2021
Today from Hiiraan Online:  _
Wararka Maanta- Jimco, Dec 6 , 2013
Xildhibaan ka Tirsan Baarlamaanka Somalia oo lagu dilay Qarax ka dhacay illinka hore Xarunta Madaxtooyada Somalia


Jicmo, December 06, 2013 (HOL) — Xildhibaan magaciisa lagu sheegay Maxamed Warsame Maxamed (Faysal) oo ka mid ahaa xildhibaannada baarlamanaka Soomaaliya ayaa ku dhintay qarax goor dhow ka dhacay illinka hore ee xarunta madaxtooyada Soomaaliya.

Wararka ayaa sheegaya in gaariga xildhibaanka oo galayay madaxtooyada uu qaraxu si lama filaan ah ku dhacay, iyadoo goobjoogayaal halkaas ku sugnaa ay sheegeen in qaraxa uu u muuqday inuu ahaa mid gaariga lagu soo xiray.

“Gaariga xildhibaanka oo galayay xarunta madaxtooyada ayuu qarax weyn dhacay wuxuuna dhaawac kasoo gaaray xildhibaanka iyo gabar xildhibaanad hore oo gaariga la saarnayd, xildhibaankuna wuxuu daqiiqado kaddib ku dhintay isbitaalka Madiina,” ayuu yiri xildhibaan Sidoow Abaadir qaraxa kaddib saxaafadda la hadlay.

Xildhibaankan ayaa wuxuu ahaa guddoomiyaha guddiga arrimaha bulshada ee golaha shacabka Soomaaliyeed, lamana oga cidda ka dambeysay qaraxan iyo cid sheegatay midna, balse wuxuu ka mid noqonayaa qaraxyo dhowr oo dhibaato loogu geystay qaar ka mid ah xildhibaannada baarlamaanka Soomaaliya iyo shaqaalaha dowladda.

Madaxweynaha Soomaaliya, Xasan Sheekh Maxamuud ayaa ka tacsiyeeyay geerida ku timid xildhibaan Maxamed Faysal, iyadoo dhowr mudane ay ka dhinteen baarlamaanka Soomaaliya oo hal sano oo keliya jira.

Ma ahan markii ugu horreysay oo xildhibaan ka tirsan baarlamaanka Soomaaliya qarax lagula eegto Muqdisho, iyadoo lagu dilay qarax xildhibaan Garweyne oo ka mid ahaa xubnihii hore ee baarlamaankii KMG ahaa ee Soomaaliya, sidoo kalena dhowr bilood ka hor qarax lagula eegtay degmada Xamarweyne xidhibaan Sheekh Aadan Mad-Deer.

Dhawaan ayay ahayd markii kooxo hubeysan ay xaafadda Buulo-xuubey ee degmada Wadajir ku toogteen xildhibaan ka tirsan baarlamaanka Somalia, xilli uu ku socday gurigiisa oo xaafaddaas ku yaallay.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
12/6/2013 1:58 PM EST
Jicmo, December 06, 2013 (HOL) — Nelson Rolihlala Mandela wuxuu 18-kii bishii July sannadkii 1918-kii ku dhashay tuulo yar oo ku dhow magaalada Umtata ee gobolka Eastern-cape ee dalka Konfur Afrika, wuxuuna kasoo jeedaa qoys qowmiyad ah oo lagu magacaabo Xhosa.

12/6/2013 11:58 AM EST
Jicmo, December 06, 2013 (HOL) — Guddoomiyaha golaha wakiiladda Somaliland, Cabdiraxmaan Maxamed Cabdilaahi Cirro, ayaa Booqasho ku tagay caasimadda Dawlad Deegaanka Somalida Ethiopia ee Jig-jiga ka dib markii uu martiqaad rasmi ah ka helay gudoomiyaha baarlamaanka Dalka Ethiopia oo ku martiqaaday ka qaybgalka xuska maalinta qoomiyadaha Ethiopia oo sannadkan loo asteeyey in lagu qabto magaalada Jigjiga ee dawlad deegaanka Soomalida Ethiopia.

12/6/2013 11:46 AM EST
Jicmo, December 06, 2013 (HOL) — Xilli ay muddo koobani ka harsan tahay waqtiga ay dhici doonto doorashada madaxtinimada ee Puntland, ayaa waxaa si weyn dhammaan gobollada looga dareemayaa ololaha ay wadaan musharraxiinta u taagan xilka madaxweynenimada.

12/6/2013 8:35 AM EST
Jicmo, December 06, 2013 (HOL) — Kooxo hubeysan ayaa toogasho ku dilay goor dhow macallimad u dhalatay dalka Uganda oo lagu magacaabo Laylo oo wax ka dhigaysay Jaamacadda Soomaaliya oo ka mid ah jamaacadaha ku yaalla Muqdisho.

12/6/2013 7:23 AM EST
Jicmo, December 06, 2013 (HOL) — Madaxweynaha Soomaaliya, Xasan Sh. Maxamuud iyo madaxweynayaasha maamullada Somaliland iyo Puntland, Axmed Maxamed Maxamuud Siilaanyo iyo C/raxmaan Maxamed Faroole ayaa si isku mid ah uga hadlay geeridii madaxweynihii hore ee Koonfur Afrika Nelson Mandela.

12/6/2013 7:11 AM EST
Jicmo, December 06, 2013 (HOL) — Dalka Koonfur Africa ayaa waayay shaqsi agtooda aad ugu weyn ,kaasi oo u soo dagaallamay xoriyadda wadankaasi, isla markaana ah hogaamiyihii ugu horeeyay oo madow ah oo madaxweyne ka noqda Koonfur Africa ka dib muddo 27-sano ah oo uu xabsi ku jiray.

12/6/2013 5:38 AM EST
Jicmo, December 06, 2013 (HOL) — Madaxweynaha Puntland C/raxmaan Maxamed Maxamuud oo maanta -xilli uu ka dhoofayey garoonka diyaaradaha ee magaalada Garoowe- warbaahinta la hadlay, ayaa sheegay in la aqoonsaday qofkii fuliyey qaraxii is-miidaaminta ahaa ee shalay ka dhacay magaalada Boosaaso ee xarunta gobolka Bari.

12/6/2013 1:58 AM EST
Jicmo, December 06, 2013 (HOL) — Guddoomiyaha gobolka Banadir ahna duqa Muqdisho, Maxamuud Axmed Nuur Tarsan ayaa sheegay in maamulka uu madaxda u yahay uu ku guuleystay horumarinta adeegyada bulshada ee Gobolka Banaadir.

12/6/2013 1:57 AM EST
Jicmo, December 06, 2013 (HOL) — Xubno ka tirsan dowladda Soomaaliya ayaa gaaray degmada Jowhar ee xarunta gobolka Shabeellada dhexe si ay u dhexdhexaadiyaan beelo walaalo ah oo ay dagaallo ku dhexmareen bariga degmada Jowhar.