5/15/2021
Today from Hiiraan Online:  _
Wararka Maanta- Arbaco, Dec 4 , 2013
Xisbiga UCID oo Sheegay in Xukuumaddu ay Maanta ka Hor-joogsatay in ay galaan Magaaladda Gabiley (SAWIRRO)



Arbaco, December 04, 2013 (HOL) — Wafdi uu hogaaminayo murrashaxa madaxweynaha Xisbiga UCID Jamaal Cali Xuseen ayaa maanta laga horjoogsaday inay galaan Gobolka Gabilay.

Weftiga  UCID oo ay ka  mid ahaayeen Xoghayaha Maaliyadda Xisbiga UCID Faadumo Siciid, guddoomiyaha garabka Haweenka ee Xisbiga UCID Xaliimo Cismaan Raage, Guddoomiyaha Golaha dhexe ee Xisbiga UCID , Xildhibaano iyo Saraakiil sar sare oo Xisbiga UCID ka mid ah oo doonayey inay tartan ciyaareed u qabtay xulalka gobolka Gabiley ayaa maanta loo diiday inay galaan magaaladda.

Jamaal Cali Xuseen ayaa sheegay in haddii loo ogolaan waayo inay galaan magaaladda Gabiley ay kaga jawaabi waayaan mudaharaad, isla markaana caalamka iyo dalalka daneeya Somaliland usoo bandhigi doonaan xayiraadda xisbigoogga loogu sameeyey.

"Hore umaanaan ogayn xayiraadan nala saaray, Kulmiye-na wali lagama xayirin meel ay tagayeen laakiin marka la taabto waxyaalo badan ayey samayn jireen, waxaana  noo qorshaysan inaanu halkan joogno oo aanu mudaharaad ka abaabulno, hadhawna aanu mudaharaadka magaalada Hargeysa iyo umada oo dhan iskugu yeedhno oo aanu umada tusno in dalka fawdo lagu wado oo la doonayo inuu hal xisbi ka shaqeeyo"ayuu yidhi Jamaal Cali Xuseen oo ka hadlayey waxay kaga jawaabi doonaan galitaankaasi loo diiday inay galaan gobolka Gabiley.

Dhinaca kale, xisbiga mucaaradka ah ee WADANI ayaa Cambaareeyey xadhiga lagula kacay koox wariyeyaal ah oo shalay xabsiga loo taxaabay iyo talaabaddii lagaga hor joogsaday weftiga Xisbiga UCID inay galaan magaaladda Gabiley.

"Waxaad Ogtihiin xukuumada talada dalka hayse ee kulmiye in xoog ku cabudhinayso saxaafadii madax-banaanad in cago juglayn  iyo dhibaato badan ay xukuumadu ku hayso in ilaa hada ay xabsiga ku xidhan yihiin qaar ka mid ah warbaahintii madaxa banaan oo dumuq-raadiyadii shacabka reer Somaliland oo dhami ay ku faanayeen in xukuumada kulmiye ay madawo galisay”ayuu yidhi gudoomiye ku xigeenka kuwaad ee xisbiga WADANI Axmed Mumin Seed oo ka hadlayey xadhigii loo gaystay wariyeyaal ka hawlgalla magaaladda Hargeysa .

Sidoo kale, gudoomiye Axmed Seed wuxuu cambaareeyey is hortaaga lagu sameeyey xisbiga UCID oo hawlo shaqo u tagayey gobolka Gabiley.

“Waxaan aad iyo aad U canbaaraynayaa in wafti uu hogaaminayo musharax madaxwaynaha ee xisbiga UCID in hada lagu joojiyey Caabudla oo la hordhigay ciidamo badan isaga oo ku socda magaalada Gabiley arinkaasina waa arin nuqsaani ku jirto oo qaranka Somaliland waxa udhimaysa dumuq-raadiyadiina baalmarsan waxaan leeyahay xukuumada Siilaanyo heer waxa ay idinka gaadhay inaad tidhaahaan xisbiyada mucaaradka ahi ma tagi karaan gobolada”ayuu yidhi Seed.

Si kastaba ha ahaatee, waxa maalmihii u dambeeyey hadalo ad adagi dhexmarayey xisbiga UCID iyo xukuumadda,haseyeeshee talaabadan ay xukuumaddu ugu diiday xisbiga UCID inay gallaan magaaladda Gabiley ayey dadweynuhu aad ula yaabeen, isla markaana ku tilmaameen mid khalad ah in xisbi Qaran laga horjoogsado hawlihiisa shaqo.

Arrintan ayaa ku soo beegmaysa laba cisho ka hor markii uu madaxweynuhu ka soo laabtay gobolka Gabiley oo mashaariic kala duwan oo uu qaarna xadhiga ka jaray, qaar kalana soo dhagax dhigay,isla markaana kulamo la yeeshay waxgaradka iyo odayaasha gobolka Gabiley.

Barkhad-ladiif M. Cumar, Hiiraan Online
[email protected]
Hargeysa, Somaliland












Click here
12/4/2013 1:13 PM EST
Arbaco, December 04, 2013 (HOL) —Xulka kubadda cagta Soomaaliya ayaa galabta gabi ahaanba isaga haray koobka bartamaha iyo bariga Africa oo sanadkan ka soconaya wadanka Kenya,waxaana ciyaartoyda Soomaaliya ay ku guul-daraysteen in Group B ay dhibco ka heleen,iyadoo ciyaaro adag horey ula soo yeeshay xulalka kala ah Tanzania iyo Burundi.

12/4/2013 12:16 PM EST
Arbaco, December 04, 2013 (HOL) — Madaxweynaha Soomaaliya, Xasan Sh. Maxamuud ayaa maanta ka qayb-galay kulankan lagu soo gaba-gabeynayay xarunta AMISOM ee Muqdisho, kaasoo looga hadlayay doorka haweenku ay ku leeyihiin ka hortagga tacadiyada ka dhanka ah haweenka iyo kaalinta ay ku leeyihiin horumarka dalka, iyadoo xiritaanka kulankan ay goob-joog ka ahaayeen, wasiirka horumarinta adeegga bulshadda, Maryan Qaasim, dajire Nicholas Kay, danjirayaasha dalalka Talyaaniga, Sweden u jooga Soomaaliya iyo mas’uuliyiin kale.

12/4/2013 11:37 AM EST
Arbaco, December 04, 2013 (HOL) — Madaxweynaha Puntland, C/raxmaan Maxamed Maxamuud (Faroole) ayaa markii ugu horreysay ka jawaab celiyay diidmo ay kala horyimaadeen guddi uu magacaabay musharraxiinta Puntland oo iyagu madaxweyne Faroole kula tartamaya doorashada soo socota ee dhici doonta bisha Koowaad ee sannadka soo socda 2014-ka.

12/4/2013 11:25 AM EST
Arbaco, December 04, 2013 (HOL) — Magaalada Baydhabo ayaa waxaa ku soo badanaya iskuullada ama dugsiyada wax lagu barto sida dugsiga hoose, dhexe iyo kuwa sare kuwaas oo ay furayaan hay’ado caalimi ah, iyadoo ay iskuul degmada ka furtay dhawaan hay’adda ZAMZAM oo maxalli ah.

12/4/2013 7:02 AM EST
Arbaco, December 04, 2013 (HOL) — Ciidamada nabad-sugidda Qaranka ayaa maanta is-hortaag ku sameeyay dibadbax lagu taageerayay go’aankii uu baarlamaanka Soomaaliya kalsoonida kala laabtay xukuumadda ra’iisul wasaare Saacid oo Muqdisho ka dhici lahaa.

12/4/2013 6:50 AM EST
Arbaco, December 04, 2013 (HOL) — Maamulka gobolka Banaadir ayaa maanta sheegay inay la wareegi doonaan guryaha burbursan ee Muqdisho ku yaalla haddii milkiilayaasha iska leh ay ku dhisi waayaan muddo saddex bilood gudahood ah.

12/4/2013 6:30 AM EST
Arbaco, December 04, 2013 (HOL) — Xulka kubadda cagta Soomaaliya ayaa maanta kulankii seddexaad ee Group-ka B la yeelanaya xulka kubadda cagta Zambia ciyaar ka tirsan koobka bartamaha iyo bariga Afrika, iyadoo ciyaartan ay maanta afarta galabnimo ka dhacayso garoonka Nyanyo National Stadium ee Kenya.

12/4/2013 5:34 AM EST
Maxkamad ku taalla dalka Kenya ayaa go'aamisay inaan damaanad lagu sii dayn karin wiilal Soomaali ah oo lagu eedeeyay inay ku lug lahaayeen weeraradii lagu qaaday xarunta ganacsiga ee Westgate oo ay ku dhinteen dad kor u dhaafay 67 ruux.

12/4/2013 1:41 AM EST
Arbaco, December 04, 2013 (HOL) — Ugu yaraan saddex qof ayaa ku dhintay toddoba kalena way ku dhaawacmeen qaraxyo is-xigay oo xalay ka dhacay maqaahi ku taalla degmada Ceel-waaq ee gobolka Gedo.

12/4/2013 1:29 AM EST
Arbaco, December 04, 2013 (HOL) — Ugu yaraan laba ruux ayaa ku dhintay tiro intaas ka bandanna way ku dhaawacmeen iska-horimaad culus oo xalay ku dhexmaray degmada Huriwaa ciidamada dowladda Soomaaliya iyo kuwa Al-shabaab.