5/15/2021
Today from Hiiraan Online:  _
Wararka Maanta- Arbaco, Dec 4 , 2013
Ciidammada Nabadsugidda Qaranka oo Maanta hor-joogsaday Bannaanbax lagu Taageerayay Go'aankii Baarlamaanka Somalia


Arbaco, December 04, 2013 (HOL) — Ciidamada nabad-sugidda Qaranka ayaa maanta is-hortaag ku sameeyay dibadbax lagu taageerayay go’aankii uu baarlamaanka Soomaaliya kalsoonida kala laabtay xukuumadda ra’iisul wasaare Saacid oo Muqdisho ka dhici lahaa.

Bannaanbaxan oo aan la ogeyn ciddaa soo qaban-qaabisay ayaa waxaa ahaa mid ay kasoo qaybgaleen dhallinyaro, haween iyo waxgarad; kuwaasoo watay boorar ay ku sawirnaayeen madaxweynaha Soomaaliya iyo xubno kale oo dowladda ka tirsan.

Xilli lagu waday inuu dibadbaxan ka billowdo taallada sayidka ayaa waxaa halkaas gaaray ciidammo ka tirsan kuwa nabadsugidda kuwaasoo dadkii ka qaybgalayay dibadbaxa ku amray inay goobta isaga tagaan, aysanna qaban wax dibadbax ah.

“Qof walba gurigiisa ha aado, waa la diiday in dibadbax la dhigo, mana garan karno sababta keentay,” ayaya dadkii dibadbaxa ka qaybgalayay u sheegeen xubnihii hor-boodayay bannaanbaxaas.

Bannaanbaxayaasha qaarkood oo iyaguna warbaahinta la hadlay ayaa yiri: “Waxaan doonaynay inaan aragtideenna muujinno, balse taas waa naloo diiday, khasab ayayna nagu noqotay inaan kala tagno.”

Qorshana lagu sameynayay dibadbaxa ayaa kusoo beegmaya xilli maalin ka hor ay xidhibaannada barlamaanka Somalia kalsoonida kala laabteen ra’iisul wasaaraha Soomaaliya, Cabdi Faarax Shirdoon (Saacid) iyo xukuumaddiisa.

Toddobaad ka hor ayay ahayd markii ciidamada nabadsugidda ay hor-istaag noocan oo kale ah ku sameeyeen dibadbax la doonayay in lagu taageero ra’iisul wasaare Saacid oo uu xilligaas khliaaf kala dhexeeyay madaxweynaha Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
12/4/2013 1:13 PM EST
Arbaco, December 04, 2013 (HOL) —Xulka kubadda cagta Soomaaliya ayaa galabta gabi ahaanba isaga haray koobka bartamaha iyo bariga Africa oo sanadkan ka soconaya wadanka Kenya,waxaana ciyaartoyda Soomaaliya ay ku guul-daraysteen in Group B ay dhibco ka heleen,iyadoo ciyaaro adag horey ula soo yeeshay xulalka kala ah Tanzania iyo Burundi.

12/4/2013 12:16 PM EST
Arbaco, December 04, 2013 (HOL) — Madaxweynaha Soomaaliya, Xasan Sh. Maxamuud ayaa maanta ka qayb-galay kulankan lagu soo gaba-gabeynayay xarunta AMISOM ee Muqdisho, kaasoo looga hadlayay doorka haweenku ay ku leeyihiin ka hortagga tacadiyada ka dhanka ah haweenka iyo kaalinta ay ku leeyihiin horumarka dalka, iyadoo xiritaanka kulankan ay goob-joog ka ahaayeen, wasiirka horumarinta adeegga bulshadda, Maryan Qaasim, dajire Nicholas Kay, danjirayaasha dalalka Talyaaniga, Sweden u jooga Soomaaliya iyo mas’uuliyiin kale.

12/4/2013 11:37 AM EST
Arbaco, December 04, 2013 (HOL) — Madaxweynaha Puntland, C/raxmaan Maxamed Maxamuud (Faroole) ayaa markii ugu horreysay ka jawaab celiyay diidmo ay kala horyimaadeen guddi uu magacaabay musharraxiinta Puntland oo iyagu madaxweyne Faroole kula tartamaya doorashada soo socota ee dhici doonta bisha Koowaad ee sannadka soo socda 2014-ka.

12/4/2013 11:25 AM EST
Arbaco, December 04, 2013 (HOL) — Magaalada Baydhabo ayaa waxaa ku soo badanaya iskuullada ama dugsiyada wax lagu barto sida dugsiga hoose, dhexe iyo kuwa sare kuwaas oo ay furayaan hay’ado caalimi ah, iyadoo ay iskuul degmada ka furtay dhawaan hay’adda ZAMZAM oo maxalli ah.

12/4/2013 11:01 AM EST
Arbaco, December 04, 2013 (HOL) — Wafdi uu hogaaminayo murrashaxa madaxweynaha Xisbiga UCID Jamaal Cali Xuseen ayaa maanta laga horjoogsaday inay galaan Gobolka Gabilay.

12/4/2013 6:50 AM EST
Arbaco, December 04, 2013 (HOL) — Maamulka gobolka Banaadir ayaa maanta sheegay inay la wareegi doonaan guryaha burbursan ee Muqdisho ku yaalla haddii milkiilayaasha iska leh ay ku dhisi waayaan muddo saddex bilood gudahood ah.

12/4/2013 6:30 AM EST
Arbaco, December 04, 2013 (HOL) — Xulka kubadda cagta Soomaaliya ayaa maanta kulankii seddexaad ee Group-ka B la yeelanaya xulka kubadda cagta Zambia ciyaar ka tirsan koobka bartamaha iyo bariga Afrika, iyadoo ciyaartan ay maanta afarta galabnimo ka dhacayso garoonka Nyanyo National Stadium ee Kenya.

12/4/2013 5:34 AM EST
Maxkamad ku taalla dalka Kenya ayaa go'aamisay inaan damaanad lagu sii dayn karin wiilal Soomaali ah oo lagu eedeeyay inay ku lug lahaayeen weeraradii lagu qaaday xarunta ganacsiga ee Westgate oo ay ku dhinteen dad kor u dhaafay 67 ruux.

12/4/2013 1:41 AM EST
Arbaco, December 04, 2013 (HOL) — Ugu yaraan saddex qof ayaa ku dhintay toddoba kalena way ku dhaawacmeen qaraxyo is-xigay oo xalay ka dhacay maqaahi ku taalla degmada Ceel-waaq ee gobolka Gedo.

12/4/2013 1:29 AM EST
Arbaco, December 04, 2013 (HOL) — Ugu yaraan laba ruux ayaa ku dhintay tiro intaas ka bandanna way ku dhaawacmeen iska-horimaad culus oo xalay ku dhexmaray degmada Huriwaa ciidamada dowladda Soomaaliya iyo kuwa Al-shabaab.