5/15/2021
Today from Hiiraan Online:  _
Wararka Maanta- Isniin, Dec 2 , 2013
Madaxweyne Xasan Shiikh oo soo dhaweeyay xil ka qaadistii Xildhibaanada Baarlamaanku ay ku Sameeyeen Ra'iisul Wasaare Saacid



Isniin, December 02, 2013 (HOL) — Madaxweynaha Soomaaliya, Xasan Sh. Maxamuud oo ka hadlay xil ka qaadistii lagu sameeyay ra’iisul wasaare Saacid ayaa ku tilmaamay mid dastuuri ah, isagoo sheegay inay xildhibaanada baarlamaanku muujiyeen howl-karnimo iyo mas’uuliyad.

Xasan ayaa sheegay in ra’iisul wasaare Saacid uu howlo badan soo qabtay muddadii halka sano ahayd ee uu xilka hayay, isagoo intaas ku daray inuu uga hambalyeynayo dadaalladii uu sameeyay muddadii uu xilka hayay.

“Go’aanka uu baarlamaanku qaatay waxay caddeyn u tahay in dalka ugu xoogeysanayso dimuqraadiyadda,” ayuu madaxweynuhu ku yiri shirka jaraa’id ee uu qabtay kaddib xil ka qaadistii ra’iisul wasaare Saacid.

Madaxweynaha oo uu muuqday mid ka jawaabaya hadal uu ra’iisul wasaare Saacid ku sheegay shir jaraa’id oo uu maanta qabtay oo ahaa in mooshinka laga geeyay xukuumadda uu ahaa mid lasoo abaabulay oo xubno wasiirro ah oo ku dhow madaxweynaha ay ka dambeeyaan, ayaa sheegay inuusan jirin haba yaraatee khilaaf ka dhexeeya isaga iyo Saacid, balse ay isku qabteen dib u habeynta xukuumadda taasoo muddo dheer soo socotay, maantana uu baarlamaanku go’aan ka gaaray.

“Anigu ma aanan oran ra’iisul wasaaraha ayaan xilka ka qaadayaa iyo sidan ayaan yeelayaa, balse isaga ayaa sheegay inuu khilaaf jiro, taas ayaana keentay sida aan filayo in baarlamaanku uu soo fara-geliyo uuna howshiisa ka qabsado,” ayuu madaxweynuhu hadalkiisa ku daray.

Sidoo kale, madaxweynaha oo sii hadlaya ayaa sheegay in maanta uu isaga dastuurku u ogol yahay inuu soo magacaabo ra’iisul wasaare cusub, ayna taasi qayb ka tahay awoodaha qaybsan ee dowladda Soomaaliya.

“Waan soo dhaweynayaa doorka baarlamaanku Somalia uu ku muujiyay inuu ku shaqeeyo dimuqraadiyad,” ayuu yiri madaxweynaha oo intaas ku daray: “Waa muhiim in howl kasta oo la qabanayo loo maro dastuurka, waxaan soo dhaweynayaa sidoo kale go’aanka ay baarlamaanku gaareen. Mahad ayaan u eclienayaa xildhibaannada baarlamaanka iyo hoggaankooda.”

Ugu dambeyn, madaxweynuhu wuxuu shacabka Soomaaliyeed ka dalbaday inay is-dajiyaan oo ay ku kalsoonaadaan hay’adaha dowladda aysanna jirin wax hallaabi doona, howluhuna ay intan iyo in ka badan gaari doonaan. Isagoo xusay in dowladdu ay gacan uga baahan tahay shacabkeeda si ay ugu guuleysato howlaha horyaalla.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
12/2/2013 10:55 AM EST
Ganacsade Maxamuud Xaaji Xassan Askar oo kamid ah ganacsatada waawayn ee Soomaalida ayaa geeri naxdin leh ku tilmaamay dhimashadii Axmed Maxamed Aadan (Qaybe) oo ahaa diblamaasigii ugu taariikhda dheeraa Soomaaliya soona maray xilal kala duwan oo ay kamid ahayd wasiirka arrimaha dibada ee Soomaaliya xilligii dawladii Maxamed Siyaad barre iyo sidoo kale C/laahi Maxamed Mire oo isna soo noqday wasiirkii waxbarashada ee Soomaaliya.

12/2/2013 8:56 AM EST
Isniin, December 02, 2013 (HOL) — Ergayga Qaramada Midoobay u qaabilsan arrimaha Soomaaliya, Nicholas Kay oo qoraal soo saaray ayaa sheegay inuu soo dhaweynayo go’aankii baarlamaanka Soomaaliya ee xilka looga qaaday xukuumaddii uu horkacayay ra’iisul wasaare Saacid.

12/2/2013 8:26 AM EST
Isniin, December 02, 2013 (HOL) — Hay’adda la dagaalanka iyo xakameynta cudurka HIV/AIDS, ayaa ka warbixiyey halka uu Somaliland ka marayo cudurkaas, waxaanu sheegay inay dadku soo fahmayaan jiritaanka cudurkan, isla markaana ay dawooyinka si toos ah usoo doontaan.

12/2/2013 7:57 AM EST
Isniin, December 02, 2013 (HOL) — Waxaa lasoo gaba-gabeeyay codeyntii loo qaadayay xukuumadda ra’iisul wasaare Saacid, iyadoo xildhibaanada ay si aqlabiyad ah codka ugu diideen xukuumadda.

12/2/2013 7:20 AM EST
Isniin, December 02, 2013 (HOL) — Guddoomiyaha Baarlamaanka Somalia Maxamed Sheekh Cismaan Jawaari ayaa ku dhawaaqay in codka kalsoonida loo qaadayo xukuumadda, isagoo sheegay in codku uu noqon doono mid gacan-taag ah.

12/2/2013 6:52 AM EST
Isniin, December 02, 2013 (HOL) — Xildhibaannada Baarlamaanka Soomaaliya ayaa isku diyaarinaya hadda inay codka kalsoonida u qaadaan xukuumadda Saacid, kaddib markii ay dhammaadeen hadalladii ay jeedinayeen xildhibaannadii ka hadlayay mooshinka baarlamaanka.

12/2/2013 6:39 AM EST
Isniin, December 02, 2013 (HOL) — Ra’iisul wasaaraha Somali, Cabdi Faarax Shirdoon (Saacid) oo la hadlay warbaahinta ayaa sheegay in go’aan walba oo kasoo baxa baarlamaanka uu aqbalayo, isagoo mooshinka baarlamaanka laga geeyay ku tilmaamay mid abaabulan.

12/2/2013 2:18 AM EST
Isniin, December 02, 2013 (HOL) — Turjubaan u shaqeynayay Ciidamada AMISOM ayay kooxo hubeysan ku dileen xaafadda Suuqa Xoolaha ee degmada Huriwaa iyadoo kooxihii hubeysnaa ee dilkaas geystay iyagana la toogtay.

12/2/2013 1:56 AM EST
Isniin, December 02, 2013 (HOL) — Maanta ayaa lagu wadaa inay mar kale ka doodaan xildhibaannada baarlamaanka Soomaaliya mooshinka ka dhanka ah xukuumadda uu hoggaaminayo ra’iisul wasaare Saacid, iyadoo qorshuhu yahay in maanta lasoo gaba-gabeeyo doodda.