5/15/2021
Today from Hiiraan Online:  _
Wararka Maanta- Isniin, Dec 2 , 2013
Turjubaan u shaqeynayay Ciidamada AMISOM oo lagu dilay Xaafadda Suuqa Xoolaha iyo Kooxihii dilka u geystay oo la dilay


Isniin, December 02, 2013 (HOL) — Turjubaan u shaqeynayay Ciidamada AMISOM ayay kooxo hubeysan ku dileen xaafadda Suuqa Xoolaha ee degmada Huriwaa iyadoo kooxihii hubeysnaa ee dilkaas geystay iyagana la toogtay.

Wiilka la toogtay oo dhallinyaro ahaa ayaa u turjubaan u ahaa ciidamada ku sugan xerada Maslax ee duleedka Suuqa Xoolaha, waxaana toogtay laba wiil oo dhallinyaro, balse markii ay dileen kaddib ayaa ciidammo goobtaas meel ku dhow ku sugnaa waxay durbadiiba toogteen labadii wiil ee dilka geystay.

“Maydka wiilkii turjubaanka ahaa waan ka qaadnay goobta waana aasnay; balse labadii dilka geystay ma jirto cid goobtii lagu dilay ka qaadday,” ayuu yiri guddoomiyaha degmada Huriwaa, Cumar Jacfaan oo warbaahinta la hadlay.

Sidoo kale, Cumar Jacfaan wuxuu sheegay in tallaabadan ay tahya mid lagu guuleystay in lagu dilo kooxo dhibaato ka waday Muqdisho, isgaoo xusay in tani ay digniin u tahay kooxaha falalka ammaan-darro ka wada degmadaas iyo qaybo ka tirsan Muqdisho.

Ciidamada AMISOM ee ku sugan Soomaaliya ayaa waxaa turjubaanno u ah dhallinyaro Soomaaliyeed oo bartay luuqadda Sawaaxiliga, kuwaasoo inta badan aan ka bixin saldhigyada ay AMISOM daggan tahay.

Degmada Huriwaa ayaa waxaa inta badan ka dhaca falal ammaan-darro oo isugu jira qaraxyo iyo dilal qorsheysan, kuwaasoo intooda badan ay sheegato Al-shabaab, inkastoo aysan weli ka hadlin dilkan.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
12/2/2013 12:17 PM EST
Isniin, December 02, 2013 (HOL) — Madaxweynaha Soomaaliya, Xasan Sh. Maxamuud oo ka hadlay xil ka qaadistii lagu sameeyay ra’iisul wasaare Saacid ayaa ku tilmaamay mid dastuuri ah, isagoo sheegay inay xildhibaanada baarlamaanku muujiyeen howl-karnimo iyo mas’uuliyad.

12/2/2013 10:55 AM EST
Ganacsade Maxamuud Xaaji Xassan Askar oo kamid ah ganacsatada waawayn ee Soomaalida ayaa geeri naxdin leh ku tilmaamay dhimashadii Axmed Maxamed Aadan (Qaybe) oo ahaa diblamaasigii ugu taariikhda dheeraa Soomaaliya soona maray xilal kala duwan oo ay kamid ahayd wasiirka arrimaha dibada ee Soomaaliya xilligii dawladii Maxamed Siyaad barre iyo sidoo kale C/laahi Maxamed Mire oo isna soo noqday wasiirkii waxbarashada ee Soomaaliya.

12/2/2013 8:56 AM EST
Isniin, December 02, 2013 (HOL) — Ergayga Qaramada Midoobay u qaabilsan arrimaha Soomaaliya, Nicholas Kay oo qoraal soo saaray ayaa sheegay inuu soo dhaweynayo go’aankii baarlamaanka Soomaaliya ee xilka looga qaaday xukuumaddii uu horkacayay ra’iisul wasaare Saacid.

12/2/2013 8:26 AM EST
Isniin, December 02, 2013 (HOL) — Hay’adda la dagaalanka iyo xakameynta cudurka HIV/AIDS, ayaa ka warbixiyey halka uu Somaliland ka marayo cudurkaas, waxaanu sheegay inay dadku soo fahmayaan jiritaanka cudurkan, isla markaana ay dawooyinka si toos ah usoo doontaan.

12/2/2013 7:57 AM EST
Isniin, December 02, 2013 (HOL) — Waxaa lasoo gaba-gabeeyay codeyntii loo qaadayay xukuumadda ra’iisul wasaare Saacid, iyadoo xildhibaanada ay si aqlabiyad ah codka ugu diideen xukuumadda.

12/2/2013 7:20 AM EST
Isniin, December 02, 2013 (HOL) — Guddoomiyaha Baarlamaanka Somalia Maxamed Sheekh Cismaan Jawaari ayaa ku dhawaaqay in codka kalsoonida loo qaadayo xukuumadda, isagoo sheegay in codku uu noqon doono mid gacan-taag ah.

12/2/2013 6:52 AM EST
Isniin, December 02, 2013 (HOL) — Xildhibaannada Baarlamaanka Soomaaliya ayaa isku diyaarinaya hadda inay codka kalsoonida u qaadaan xukuumadda Saacid, kaddib markii ay dhammaadeen hadalladii ay jeedinayeen xildhibaannadii ka hadlayay mooshinka baarlamaanka.

12/2/2013 6:39 AM EST
Isniin, December 02, 2013 (HOL) — Ra’iisul wasaaraha Somali, Cabdi Faarax Shirdoon (Saacid) oo la hadlay warbaahinta ayaa sheegay in go’aan walba oo kasoo baxa baarlamaanka uu aqbalayo, isagoo mooshinka baarlamaanka laga geeyay ku tilmaamay mid abaabulan.

12/2/2013 1:56 AM EST
Isniin, December 02, 2013 (HOL) — Maanta ayaa lagu wadaa inay mar kale ka doodaan xildhibaannada baarlamaanka Soomaaliya mooshinka ka dhanka ah xukuumadda uu hoggaaminayo ra’iisul wasaare Saacid, iyadoo qorshuhu yahay in maanta lasoo gaba-gabeeyo doodda.