Wasiirka warfaafinta Soomaaliya oo xaflad ballaaran oo soo dhawayn ah loogu sameeyay magaalada Nairobi (SAWIRRO)
Axad, August 18, 2013(HOL) - Xaflad si wayn loo soo agaasimay oo ay kasoo qaybgaleen masuuliyiin
iyo boqollaal dadweyne ah ayaa magaalada Nairobi loogu sameeyay wasiirka warfaafinta,boostada
iyo gaadiidka Soomaaliya C/laahi Ceelmooge Xirsi.
Xafladan ayaa waxaa sidoo kale kasoo qaybgalay taliyaha
ciidamada booliiska Soomaaliya C/xakiim Daahir Saciid (Gen. Saacid),xildhibaano
ka tirsan baarlamaanka Soomaaliya iyo sidoo kale masuuliyiin horay xilal uga
soo qabtay dawladihii hore ee dalka soo maray.
Kulankan oo ujeedkiisu uu ahaa taageero loo muujinayay
dawlada federaalka ah ee Soomaaliya iyo waxqabadkii intii ay jirtay ayaa Isagoo
ka hadlayay arrimaha jubbooyinka uu wasriirka warfaafinta Soomaaliya sheegay in
ay jiraan wadahadallo u dhexeeya dawlada Soomaaliya iyo maamulka Jubbaland oo
ka furmay magaalada Addisababa ee caasimada Itoobiya.
“Wadahadallo ayaa bilowday, arrinkan wuxuu ku dhammaan
doonaa guul, dawlada Soomaaliyana xaqa ay leedahay ayay qaadanaysaa, Jubbaland
iyaduna qaybteeda ayay helaysaa” ayuu yiri C/laahi Ceelmooge.
Waxaana uu ku dheeraaday waxqabadkii dawlada Soomaaliya oo
uu sheegay in tallaabooyin wax ku ool ah oo lagu soo celinayo sharafkii iyo
qaranimadii Soomaaliyeed la qaaday.
“Hawadeennii waa soo ceshannay,boostadii waa furnay,
manhajkii waxbarasho waa la dajiyay, 100 kun oo caruur ah ayaa sannadkaan
iskuulada inay aadaan dawladu u diyaarisay, nimankii shacabka dhibay waa la
sifaynayaa labo maalmood gudahoodna Xudur war aad ku faraxdaan ayaad ka maqli
doontaan” ayuu yiri wasiirka oo ka sheekeeyay waxqabadka guud ee dawlada iyo
kan gaar ahaaneed ee wasaaradiisa.
Ceelmooge ayaa sheegay in dawlada Soomaaliyeed ay si mid ah
isula jaanqaaday iyadoo aan filayo inaad ku faraxdeen in la maqli waayay
khilaafaadyadii ragaadiyay xukuumadihii KMG ahaa ee naga horreeyay.
“Dawlada Soomaaliyeed waxay ku shaqaynaysaa midnimo buuxda
oo aan lahayn wax khilaaf ah, shacabkana waxaa laga doonayaa inay midnimadooda
adkaystaanoo ka gudbaan wixii la haray labaatankii sano ee lasoo dhaafay” ayuu
yiri Ceelmooge.
Taliyaha ciidamada Booliiska Soomaaliya C/xakiim Daahir
Saciid (Gen. Saacid) oo goor dambe kulanka ku soo biiray ayaa sheegay in
taliska boolisku ay diyaariyeen qorshihii lagu xasilin lahaa caasimada iyo guud
ahaanba qaybaha kale ee dalka.
“Waxaan wadnaa qorshe ballaaran oo lagu xasilinayo dalka,
ammaanku sida dadka qaar u qabaan maahan, waxyaabo waa iska dhici karaan
laakiin waxaan idiin sheegayaa Ra’iisul wasaaraha dalka iyo xubno ka tirsan
xukuumada ayaa xataa xilli dambe oo habaynkii ah caasimada ku soo wareegay,
taasina waxay ku tusaysaa in amniga wax wayn iska badaleen" ayuu yiri taliyaha ciidamada booliska Soomaaliya.
"Inkastoo kooxaha
nabad-diidka ah ay isku dayayaan inay shacabka baqdin galiyaan,hadana shacabku
ma baqayo waa soo noqdeen kuwii xataa dibadaha jiray oo dalkooda ayay
maalgashanayaan” ayuu sii raaciyay Gen. Saacid.
Qaar ka tirsan xildhibaanada dawlada federaalka ah ee
Soomaaliya oo kulankaas ka qaybgalay ayaa sheegay inaan la aqbali doonin in
siyaasiyiin xilalka ka waayay dawlada ay ku awrkacsadaan arrimaha ka taagan Jubbooyinka.
Xildhibaan Maxamed Ismaaciil Shuuriye iyo xildhibaan Axmed
Aabi oo ka tirsan mudanayaasha baarlamaanka federaalka ah ee Soomaaliya ayaa
labaduba si kulul u naqdiyay siyaasiyiin ay ku tilmaameen inay dano gaar ah doonayaan
inay u isticmaalaan khilaafka Jubbaland kana dhigtaan jaranjaro ay ku weeraraan
dawlada Soomaaliya.
Inkastoo aysan si toos ah u magacaabin Ra’iisul wasaarihii
hore ee Soomaaliya Cali Maxamed Geedi iyo siyaasiyiin kale oo mucaarad ah oo dhawaanahaan
qabanayay shirar looga soo horjeedo dawlada ayaa hadana xildhibaanadani waxay
ka digeen in arrinkaas tarraq lagu sii daaro.
Xildhibaanad Aamina Maxamed Cabdi oo ah gabar dhalinyaro ah
oo ku jirta baarlamaanka Soomaaliya oo iyaduna halkaas ka hadashay ayaa
sheegtay in Soomaalida looga baahanyahay inaysan dumin dawlada hada jirta balse
ay sii diyaariyaan cidii badali lahayd siyaasiyiinta haatan kuraasta ugu
sarreysa ee dalka ku fadhiya hadii ay ku qanci waayaan waxqabadkooda.
“Kulligeen waxaan meesha u nimid inaan idiin adeegno waxaana
la idin karabaa inaad diyaarsataan dadkii na badali lahaa afarta sano markay
noo dhammaato, waxaana loo baahanyahay in mucaaradadu ay noqoto mid wax dhista”
ayay tiri xildhibaanadu.
Aamina ayaa sidoo
kale sheegtay in baarlamaanka Soomaaliya ay qaadeen tallaabooyin muhiim ah oo
shuruucdii dalka dib loogu dajinayo.
Waxaana dhammaan kasoo qaybgalayaashii kulanka ka hadlay ay
ka dhawaajiyeen muhiimada ay leedahay midnimada Soomaaliya iyagoo ugu baaqay
dhammaan dadka dhaliilsan dawlada inay miiska wadahadalka fariistaan.
Waxayna ka codsadeen dawlada Soomaaliya inay albaabada u
furto cid walba oo doonaysa inay talooyin ku darsato si dalka looga gudbiyo
marxalada adag ee uu haatan ku jiro.
Marka laga tago dhanka siyaasada waxaa kaloo xafladan lagu
soo bandhigay suugaan kala duwan oo ay ku jiraan gabayo,buraanbur,dhaanto iyo waliba
heeso wadani ah oo lagu ammaanayay qaranka Soomaaliyeed.
Axmed C/samad, Hiiraan Online
[email protected]
Nairobi , Kenya