3/29/2024
Today from Hiiraan Online:  _
Wararka Maanta- Sabti, Aug 17, 2013
Injinneerkii guud ee Farsamada u qaabilsanaa Raadiyo Muqdisho oo Maanta lagu dilay Degmada Shibbis ee Magaalada Muqdisho

Sabti, August 17, 2013 (HOL) — Kooxo ku hubeysanaa bastoolado ayaa ku dilay maanta degmada Shibbis ee magaalada Muqdisho injineerkii guud ee Raadiyo Muqdisho iyo telefishinka Qaranka, Axmed Shariif Xuseen xilli uu ku sugnaa gurigiisa.

Mas’uuliyiinta wasaaradda warfaafinta dowladda Soomaaliya ayaa sheegay in dilkaas ay ka dambeeyeen kooxo ka tisran Al-shabaab, iyagoo xusay in kuwii dilay ay yihiin kuwo kasoo horjeeda nabadda Soomaaliya iyo horumarka ay sameysay warbaahinta dowladda Soomaaliya.

“Axmed Shariif wuxuu ahaa farsamo-yaqaanka Radio Muqdisho iyo TV-ga Qaranka SNTV, waxaana dilay koox dhagar-qabayaal ah isagoo caruurtiisa la jooga,” ayuu yiri agaasimaha Radio Muqdisho, Sheekh C/raxiin Ciise Caddoow.

Sidoo kale, Sheekh C/raxiin Ciise wuxuu sheegay in marxuumka uu ifka uga tagay lix caruur ah iyo xaas uu leh. Isagoo Alle ka baryay inuu caruurtiisa u barakeeyo. Wuxuuna dilkiisa ku sheegay inuu ahaa mid aad looga naxo oo loo geystay ruux wax-tar u leh dalka iyo dadka Soomaaliyeed.

Mas’uuliyiinta Radio Muqdisho ayaa sheegay in Inj. Axmed Shariif horay uga shaqeyn jiray Raadiyaha haddana uu ahaa farsamo-yaqaanka guud, sidoo kalena uu ahaa ruux aqoon fiican u lahaa cillad-bixinta gaadiidka iyo dabka.

Isla maanta ayaa lagu aasay marxuumka magaalada Muqdisho, iyadoo ay si fudud ku baxsadeen kooxihii ka dambeeyay dilkiisa. Isagoo noqonaya ruuxii ugu horreeyay oo ka tirsan Radio Muqdisho oo sannadkan Muqdisho lagu dilo.

Ugu dambeyn, mas’uuliyiinta Radio Muqdisho oo ku hadla afka dowladda ayaa sheegay in howlaha idaacaddu aysan u joogsan doonin dilalka noocan oo kale ah ee loo geysanayo shaqaalaha idaacadda iyo telefishinka Somalia.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
8/17/2013 3:22 PM EST
Sabti, August 17, 2013 (HOL) — Xoogag taabacsan Al-shabaab ayaa maanta ka qafaashay waddada isku xirta Muqdisho iyo Baydhabo shan dhallinyaro ah oo ka tagay magaalada Baydhabo kuna socday magaalada Muqdisho, iyadoo aan la ogeyn halka ay la aadeen.

8/17/2013 1:56 PM EST
Sabti, August 17, 2013 (HOL) — Hay’adda Somali Relief Networ of North America oo fadhigeedu yahay magaalada Toronto ee dalka Canada ayaa waxay deeq raashin ah u qaybisay 300-qoys oo ku nool degmada Afgooye ee gobolka Shabeellada Hoose.

8/17/2013 11:30 AM EST
Sabti, August 17, 2013 (HOL) — Ciidamada Midowga Afrika ee AMISOM ayaa sheegay in dagaal ay ciidamadooda iyo kuwa dowladda Soomaaliya la galeen Al-shabaab kaga dileen saddex xubnood, tiro intaas ka badanna ay dhaawac uga geysteen.

8/17/2013 11:29 AM EST
Sabti, August 17, 2013 (HOL) — Ururka Dhallinyarada Kanava ayaa maanta deeq kala duwan ka qaybiyay magaalada Muqdisho, deeqdaasoo isugu jirtay dhar, kabo, gawaarida naafada, sariiro iyo qalab kale oo caafimaad.

8/17/2013 10:04 AM EST
Sabti, August 17, 2013 (HOL) — Guddiyo uu ra’iisul wasaaraha Soomaaliya, Cabdi Faarax Shirdoon (Saacid) uu u xilsaaray baaritaanka haweeney kufsi ay u geysteen ciidamada AMISOM oo ahaa guddi heer wasiir iyo mid farsamo ayaa maanta howshoodii ugu horreysya billaabay, iyagoo u tagay gabadhii dhibbanaha ahayd.

8/17/2013 10:03 AM EST
Sabti, August 17, 2013 (HOL) — Waxaa maanta siweyn loogu soo dhaweeyay magaalada Baladweyne guddoomiyihii hore ee maamulka gobolka Hiiraan C/fitaax Xassan Afrax iyo xubno wafdi ah uu horkacayo oo sida uu sheegay u yimid ka qeyb-galka shirweynaha la fillayo in uu maalinta beri ka furmo magaalada Baladweyne.

8/17/2013 9:28 AM EST
Sabti, August 17, 2013 (HOL) — Madaxweynaha Somalilnad Mudane Axmed Maxamed Maxamuud Siillaanyo, ayaa maanta xadhiga ka jaray dib u habayn iyo casriyeyn lagu sameeyey madaarka magaaladda Hargeysa.

8/17/2013 8:45 AM EST
Sabti, August 17, 2013 (HOL) — Kulankii ugu horreeyay noociisa noociisa ayaa waxaa magaalada Baladweyne ku yeeshay mas'uuliyiinta maamulka gobolka iyo qeybaha bulshada oo ay ka mid ahaayeen guddoomiyayaasha xaafaddaha magaalada, waxgarad, odayaal-dhaqmeed, ururada dhalinyarrada, haweenka iyo madaxda hay'addaha samafalka ka howlgala gobolka Hiiraan.

8/17/2013 8:18 AM EST
Sabti, August 17, 2013 (HOL) — Afar sarkaal oo ka tirsan booliiska Kenya ayaa lagu dilay weerar lagu qaaday deegaan lagu magacaabo Galmagalla oo ku yaalla xadka Somalia iyo Kenya u dhexeysa, kaddib markii ay weerareen deegaankaas 40-nin oo aad u hubeysan, kuwaasoo la rumeysan yahay inay ka tirsan yihiin Al-shabaabta Soomaaliya.

8/17/2013 7:47 AM EST
Sabti, August 17, 2013 (HOL) — Xoghayaha maamulka gobolka Banaadir, C/kaafi Hilowle Cismaan ayaa maanta sheegay in dadka loo qabto inay ka tirsan yihiin Al-shabaab la iibsado, inkastoo uusan sheegin cidda falkas ku lugta leh.

8/17/2013 7:31 AM EST
Sabti, August 17, 2013 (HOL) — Maxkamadda ciidamada qalabka sida ee dowladda Soomaaliya ayaa maanta xukun dil ah ku fulisay eedeysane lagu helay inuu sannadkii hore ee 2012 uu Muqdisho ku dilay ka tirsanaa bahda saxaafadda Muqdisho.

8/17/2013 7:18 AM EST
Sabti, August 17, 2013 (HOL) — Waxaa todobaadyadii u danbeeyey isa soo taraysey cabashada dadweynaha ku dhaqan magaalada Qardho ee xarunta gobolka Karkaar, kaddib markii ay halkaas biyuhu aad gabaabsi ugu noqdeen.

8/17/2013 5:23 AM EST
Sabti, August 17, 2013 (HOL) — Guddoomiyaha baarlamaanka Soomaaliya, Maxamed Sheekh Cismaan Jawaari iyo wafdiga uu hoggaaminayo oo socdaal ku jooga magaalada Kampala ee xarunta dalka Masar ayaa kulan la qaatay ardayda iyo jaaliyadda Soomaaliyeed ee ku sugna dalkan Uganda.

8/17/2013 4:15 AM EST
Sabti, August 17, 2013 (HOL) — Xiisado iyo deggenaasho la’aan ayaa weli ka jirta magaalada xarunta dalka Masar ee Al-Qaahira, kaddib markii xalay ay ka dhaceen dibadbaxyo waaweyn oo ay ku dhinteen in ka badan 100-qof oo ka mid ahaa dibadbaxayaasha taageersan Mursi.