1/18/2019
Today from Hiiraan Online:  _
Wararka Maanta- Talaado, Apr 9 , 2013
Kenya oo loo Dhaarinayo Madaxweyne Cusub iyo Madaxweynaha Soomaaliya oo ka qaybgalaya Caleemo-saarka


President-Elect Uhuru Muigai Kenyatta. FILE
Talaado, Abriil 09, 2013 (HOL) —Kenya ayaa waxaa maanta loo dhaarinayaa madaxweynihii afaraad ee dalkaas soo mara, kaasoo ah wiil uu dhalay madaxweynihii ugu horreeyay iyo aabbihii xorriyadda dalkaas, iyadoo lagu wado in caleemo-saarkiisa ay ka qaybgalaan madax afrikaan ah oo uu ka mid yahay madaxweynaha Soomaaliya, Xasan Sheekh Maxamuud

Uhuru Kenyatta oo 62-jir ah ayaa ku guuleysatay doorashadii madaxnimo ee ka dhacday Kenya bishii lasoo dhaafay, inkastoo caqabado badan ay ka hor-yimadeen haddana si fudud ayuu kaga gudbay.

Dhaarinta ayaa waxay ka dhacaysaa garoonka ciyaaraha ee Moi, iyadoo si aad ah loo adkeeyay ammaanka magaalada Nairobi, waxaana dhaarinta kaddib lagu wadaa in madaxweynaha cusub uu is toos ah xilka ugala wareego madaxweynihii ka horreeyay Mwai Kibaki.

Madaxweynaha Soomaaliya iyo wafdi uu hoggaaminayo oo isugu jira wasiirro iyo xildhibaanno ayaa goor dhow ka dhoofay garoonka diyaaradaha Muqdisho si ay uga qaybgalaan caleemo-saarka madaxweynaha cusub ee Kenya, iyadoo la sheegay in madaxweynuhu uu isla maanta dib ugu soo laaban doono Muqdisho.

Xasan Sheekh ayaa horay hambalyo ugu diray Kenyatta, isagoo hoosta ka xariiqay inuu rajeynayo in madaxweynaha cusub ee Kenya uu sii adkeyn doono xiriirka ka dhexeeya Soomaaliya iyo Kenya.

Waddanka Kenya ayaa waxaa Soomaaliya kaga sugan ciidammo qayb ka ah kuwa Midowga Afrika ee AMISOM, waxayna ciidamadaas ku sugan yihiin qaybo ka tirsan Koonfurta Soomaaliya oo ay ku jirto degmada Kismaayo ee xarunta gobolka Jubbada Hoose.

Inkastoo Uhuru Kenyatta uu noqonayo madaxweynihii ugu da’da yaraa ee soo mara dalka Kenya, haddana waxay dacwad kaga furan tahay maxkamadda caalamiga ah ee dambiyada, isagoo horay u sheegay inuu la tacaali doono dacwaddaas isagoo madaxweyne ah.

Kenya ayaa waxaa la fasaxay dhammaan shaqooyinka iyo iskuullada, iyadoo lagu wado in madaxweynaha cusub marka la dhaariyo uu kulan aan muddo badan qaadanayn la yeesho madaxweynayaasha ka imaanaya dalalka bariga Afrika.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
4/9/2013 3:01 PM EST
(Daawo) Qaar Ka Tirsan Xildhibaanada Golaha Deegaanka Berbera ,Cuqaal Odayaal Waxgarad Iyo Dadwaynaha Geella-Kor Ee Gobolka Saaxil Oo Baaq U Diray Xukuumada Joojiyay-na Koox Macdan Si Tuuga Ah U Guranaayay

4/9/2013 1:03 PM EST
Talaado, Abriil 09, 2013 (HOL) — Madaxweynaha Kenya, Uhuru Kenyata oo ka hadalyay xafladda dhaarintiisa ayaa sheegay inay rabaan in mustaqbalka dhow ay arkaan Soomaaliya oo nabad ah, isagoo sheegy in nabadda Kenya iyo tan Bariga Afrika ay ku xiran tahay deggenaasho ka dhasha Soomaaliya.

4/9/2013 1:01 PM EST
Talaado, Abriil 09, 2013 (HOL) — Xukuumadda Soomaaliya ayaa markii ugu horreysay weydiisatay dowladda Liibiya in xabsiyada dalkeeda ay kasii dayso maxaabiista Soomaalida ah ee ku xir-xiran, kaddib kulan dhexmaray wasiir ku xigeenka wasaaradda arrimaha dibadda Soomaaliya, Jamaal Maxamed Barroow iyo danjiraha Liibiya u fadhiya Soomaaliya, Daahir Siciid Cabdijaliil.

4/9/2013 10:19 AM EST
Talaado, Abriil 09, 2013 (HOL) — Guddoomiyaha baarlamaanka Somalia, Prof. Maxamed Sheekh Cismaan (Jawaari) iyo wafdiga uu hoggaaminayo ee socdaalka ku jooga dalka Norway ayaa kulan la qaatay wasiirka arrimaha dibadda Norway, iyagoo dhanka kalena booqday dhismaha baarlamaanka dalkaas.

4/9/2013 9:45 AM EST
Talaado, Abriil 09, 2013 (HOL) — Munaasabad siweyn loo soo agaasimaya oo ay goob joog ka ahaayeen wafdi ka socday dowladda Soomaaliya oo labadii cisho ee la soo dhaafay ku sugnaa magaalada Baladweyne, mas’uuliyiinta hore ee maamulka gobollka Hiiraan, maamulka cusub ee loo soo magacaabay gobollka, saraakiisha ciidamada dowladda, saraakiisha ciidamada Jabuuti ee howlgalka midowgga Africa AMISOM, waxgarad, odayaal dhaqameed iyo marti-sharaf kale, ayaa maanta lagu qabtay magaalada Baladweyne ee xarunta gobollka Hiiraan.

4/9/2013 7:07 AM EST
Xaflad ay kasoo qayb-galeen in ka badan 11 madaxweyne oo ka socda qaarada Afrika ayaa lagu caleema saaray madaxweynaha cusub ee Kenya Uhuru Kenyatta iyo ku xigeenkiisa William Ruto.

4/9/2013 1:41 AM EST
Talaado, Abriil 09, 2013 (HOL) — Madaxweynaha dalka Mareykanka, Barack Obama ayaa sheegay Isnintii shalay inuu go’aansaday inuu saanad ciidan uu siiyo dowladda Soomaaliya si loo xoojiyo ciidamada Soomaaliya, isagoo sheegay in tani ay xoojinayso xiriirka u dhexeeya Mareykanka iyo dalka ku yaalla geeska Afrika.

4/9/2013 1:10 AM EST
Talaado, Abriil 09, 2013 (HOL) — Waxaa xalay fiidkii magaalada Gaalkacayo ee xarunta gobolka Mudug lagu toogtey sarkaal ka tirsanaa wasaaradda amniga ee Puntland.Sarlkaalka la diley oo lagu magacaabi jirey Col. Axmed Maxamed Axmed ''Dhega-wayne'' , wuxuu ahaa isuduwaha xafiiska wasaaradda ee gobolka Mudug.

4/9/2013 1:06 AM EST
Talaado, Abriil 09, 2013 (HOL) — Iyadoo ay todobaadyadii u danbeeyey ciidamada booliska ee Puntland ku raad joogeen koox dabley ah oo bishii lasoo dhaafay ee Maarso dabayaaqadeedii dhacay xawaaladda KAAH xarunteeda magaalada Boosaasoo, islamarkaana diley labo kamid ahaa shaqaalaheeda, ayaa shalay magaalada Gaalkacayo lagu qabtay nin kooxdaas ka tirsanaa.