3/29/2024
Today from Hiiraan Online:  _
Wararka Maanta- Isniin, Apr 22, 2013
Boostada Soomaaliya iyo Boostada Imaaraadka oo kala Saxiixday Heshiis ku Aaddan Dib u Soo Celinta Adeeggii Boostada ee Soomaaliya (SAWIRO)


Madaxa Boostada Imaaraadka Carabta Fahad Eisa Al Hosani (Bidixda), Madaxa Hay'adda Boostada Adduunka Bishaar Xuseen (Dhexda) iyo Wasiirka WBI C/llaahi Ciilmooge Xersi, Bern, Switzerland


Isniin, Abriil 22, 2013 (HOL) - Wasaaradda war-faafinta, boostada iyo isgaarsiinta ee dalka Soomaaliya ayaa heshiis ku aadan soo celinta adeeggii boostada ee Soomaaliya waxay la gashay Wasaaradda Boostada ee dowladda Imaaraadka Carabta.

Heshiiskan oo dhowr qodob ka kooban waxaa dhinaca Soomaaliya u saxiixay wasiirka war-faafinta, boostada iyo isgaarsiinta C/laahi Ciilmooge Xirsi, halka dhinaca Imaaraadkana uu saxiixay Fahad Ciisa Al-xuseyni, oo isagu ah madaxa hay'adda boostada ee dalkaas.

Heshiiskaan ayaa wuxuu ka dhacay magaalada Bern ee dalka Swiiisarland xaruunta Boostada Adduunka. Waxaanaa halkaas goobjoog ka ahaa madaxa Boostada Adduunka Bishaar Xuseen oo horay madax uga ahaan jiray Boostada dalka Kenya.

Qodobada ugu muhiimsan heshiiska ay labada dhinac wada gaareenna waxaa kamid ah: In Dubai ay noqoto halka ay sii maraan boostooyinka Soomaaliya laga diro, loona soo marsiiyo; in hay'adda Boostooda ee Imaaraadku ay mas'uul ka noqon doonto qaadista boostooyinka Soomaaliya laga diro iyo kuwo loosoo diro; iyo in muddo 12-bilood ah kharashaadka dhanka maaliyadda ee dalalka kale ku baxaya ay dowladda Imaaraadku maareyso.

Ugu danbeyntii labada dhinac ayaa ku heshiiyey in si wada jir ah loo dhiso guddi madax banaan oo dabagal ku sameeya qodobada lagu heshiiyey iyo sidii ay u noqon lahaayeen kuwo si dhaqso ah u dhaqan gala.

Boostada Soomaaliya ayaa shaqada ka maqneyd muddo 23 sano ka badan, waxaana ugu danbeysey markii ay burburtey dowladdii dhexe ee maamulkii Maxamed Siyaad Barre.

Soo celinta adeeggii Boostada ee Soomaaliya ayaa noqoneysa tallaabo ay si weyn shacabka Soomaaliyeed usoo dhoweeyaan, waxayna gacan ka geysan doontaa isku xirka Soomaalida ku nool gudaha dalka iyo kuwa qurbe-joogta ah.


|Maxamed Salaad Xaaji Dirir, Hiiraan Online
[email protected]
Puntland, Soomaaliya













Click here
4/22/2013 12:53 PM EST
Isniin, Abriil 22, 2013 (HOL) — Howlihii garoonka diyaaradaha ee Gaalkacyo ayaa maanta hakad galay kaddib markii ay degmadaas saakay aroortii hore ka dhacday israsaaseyn u dhexeysay maamullada Galmudug iyo Puntland oo ka kala taliya Waqooyiga iyo Koonfurta Gaalkacyo.

4/22/2013 12:17 PM EST
Isniin, Abriil 22, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa ku amaray hay’adaha ammaanka dalka inay sharciga horkeenaan kooxihii ka dambeeyay dilka wariye Maxamed Ibraahim Raage oo shalay gellinkii dambe lagu dilay gurigiisa oo ku yaalla degmada Dharkeenley ee gobolka Banaadir.

4/22/2013 12:15 PM EST
Isniin, Abriil 22, 2013 (HOL) — Wasiir ku-xigeenka wasaaradda arrimaha dibadda iyo iskaashiga caalamiga, Jamaal Maxamed Barrow ayaa maanta xafiiskiisa ku qaabilay hormuudka hay’adda ACCORD u qaabilsan Soomaaliya, Kwezi Mngqibisa, waxayna ka wadahadleen arrimo dan u ah dalka, dadka iyo Qaranka Soomaaliyeed.

4/22/2013 7:41 AM EST
Isniin, Abriil 22, 2013 (HOL) — Guddoomiyaha gobolka Banaadir ahna duqa Muqdisho, Maxamuud Axmed Nuur (Tarsan) ayaa shaaciyay in nalalka ku shaqeeya cadceedda ee la gelinayo waddooyinka Muqdisho ay qayb weyn ka qaadanayaan sugidda amniga iyo horumarka ganacsiga xarunta Soomaaliya ee Muqdisho.

4/22/2013 7:23 AM EST
Isniin, Abriil 22, 2013 (HOL) — Dadweynaha Somaliland, ayaa siyaabo kala duwan uga hadlay go’aankii madaxweynuhu ku diiday inuu ka qaybgallo shirka loo qabanayo soomalidda ee magaaladda London bisha soo socota loogu qaban doono.

4/22/2013 7:16 AM EST
Isniin, Abriil 22, 2013 (HOL) — Ugu yaraan lxi qof ayaa ku dhintay tiro intaa ka badanna way ku dhaawacmeen kaddib markii dagaallo culus oo billowday salay gellinkii dambe ay ka qarxeen deegaanno ku dhow degmada Xudur ee gobolka Bakool.

4/22/2013 6:59 AM EST
Isniin, Abriil 22, 2013 (HOL) — Xildhibaannada baarlamaanka Soomaaliya ayaa maanta su’aalo weydiiyay wasiirka gaashaandhigga Somalia, C/xakiin Maxamuud Xaaji Fiqi iyadoo kulanka maanta uu shir-guddoominayay guddoomiyaha baarlamaanka Soomaaliya, Prof. Maxamed Sheekh Cismaan (Jawaari).

4/22/2013 6:46 AM EST
Isniin, Abriil 22, 2013 (HOL) — Madaxweynaha Puntland Cabdiraxmaan Maxamed Maxamuud Faroole ayaa sheegay in mashaariicda ay dowladda Turkigu ugu deeqdo Soomaaliya ay yihiin kuwa ku kooban magaalada caasimadda ah ee Muqdisho.