1/18/2019
Today from Hiiraan Online:  _
Wararka Maanta- Axad, Apr 14, 2013
Madaxweynaha iyo Guddoomiyaha Baarlamaanka Somalia oo Cambaareeyay Weerarkii Maxkamada Gobolka Banaadir


Axad, Abriil 14, 2013 (HOL) — Madaxweynaha Soomaaliya, Xasan Sheekh Maxamuud iyo guddoomiyaha baarlamaanka, Maxamed Sheekh Cimsaan (Jawaari) iyo ra’iisul wasaare Cabdi Faarax Shirdoon (Saacid) ayaa cambaareeyay weerar maanta lagu qaaday dhismaha maxkamadda gobolka Banaadir, kaasoo ay ku dhinteen dad aad u badan.

Mas’uuliyiintan ayaa mas’uuliyadda weerarkan dusha ka saaray Al-shabaab iyagoo ku tilmaamay mid argagaxiso oo la doonayo in lagu waxyeelleeyo horumarka ay dowladdu ku tallaabsatay dhowrkii bilood ee ay jirtay.

“Weerarkan wuxuu muujinayaa in cadowga looga guuleystay lagana qabsaday dhamaan goobihii muhiimka u ahaa ay ku lahaayeen guud ahaan gobollada Soomaaliya, wuxuuna calaamad u yahay jabka gaaray Shabaab,” ayuu yiri madaxweynaha Soomaaliya Xasan Sheekh.

Madaxweynaha oo hadalkiisa sii wata ayaa yiri: “Annagu horay ayaan u soconaa, laakiin cadowga Soomaaliya iyo kan bani-aadamka ayaa isku dayaya inuu naga hor-istaago horumarka. Waxaan rabaa in Al-shabaab iyo Al-qaacida ay ogaadaan in Soomaaliya horumarka iyo nabadda aysan ka hor istaagi karin koox yar oo argagixisa ah.“

Guddoomiyaha baarlamaanka Prof. Jawaari oo isaguna warsaxaafadeed kasoo saaray xafiiskiisa Muqdisho ayaa sheegay in weerarkan uu ahaa mid muujinaya in Al-shabaab ay weli qalalaase kawaddo Soomaaliya isagoo u hambalyeeyay ciidamadii dowladda ee ku guuleystay inay ka hortagaan.

"Shacabka Soomaaliyeed waxaan kula talinayaa inay gacan ku siiyaan ciidamada dowladda Soomaaliya sidii ay u sugi lahaayeen ammaanka ayna uga hortegi lahaayeen kooxaha ammaan-darrada ka wada caasimadda iyo deegaannada kale ee dalka," ayuu yiri Prof. Jawaari.

Weerarkii lagu qaaday maxkamadda gobolka Banaadir ayaa noqonaya kii ugu horreeyay noociisa oo ka dhaca Muqdisho, iyadoo su’aalo badan la iska weydiinayo sababta keentay in xoogag Al-shabaab ka tirsan ay gudaha u galaan maxkamadda oo ilaalo xooggan laga hayo.

Ugu dambeyn, madaxweynaha iyo guddoomiyuhu waxay tacsi u direen ehellada askatii iyo dadkii shacabka ahaa ee ku dhintay weerarkaas, iyagoo kuwa ku dhaawacmayna u rajeeyay caafimaad deg-deg ah, iyagoo sheegay in dowladdu ay tallaabo ammaanka lagu adkeynayo qaadi doonto.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
4/14/2013 4:22 PM EST
Axad, Abriil 14, 2013— Bandhig si heer sare ah loo soo agaasimay ayaa waxaa uu ka dhacay Magaalada Magalada Salalah ee Waddanka Cummaan . Bandhiggan ayaa waxaa ka qeybgalayay Dhammaan jaaliyadaha ku nool waddankaan Cumaan , waxaana lagusoo bandhigayay Cuntooyinka Waddan walba uu ku faano.

4/14/2013 3:56 PM EST
Axad, Abriil 14, 2013 (HOL) — Xarakada Al-shabaab oo dagaal hubeysan kula jirta dowladda Soomaaliya ayaa sheegatay mas’uuliyadda weerarro kala duwan oo maanta lagu qaaday xarunta maxkamadda gobolka Banaadir oo ku taalla degmada Xamarweyne.

4/14/2013 11:19 AM EST
Axad, Abriil 14, 2013 (HOL) — Afar cunug ayaa maanta ku sumoobay miyiga degmada Balli-Busle ee gobolka Sanaag, kadib markii ay cabeen biyo sumeysan. Labo kamid ah caruurtaas ayaa isla goobta ku geeriyoodey halka labada kalena ay xaaladoodu xilligan aad u liidato.

4/14/2013 11:13 AM EST
Axad, Abriil 14, 2013 (HOL) — Inta la ogyahay 20-qof oo isugu jira kooxihii weeraray maxkamada gobolka Banaadir, ciidamada dowladda Soomaaliya, mas’uuliyiin ka tirsan maxkamada iyo dad shacab ah ayaa ku dhintay weerar ay kooxo hubeysan ku qaadeen maanta dhimasha maxkamada gobolka Banaadir ee Muqdisho.

4/14/2013 9:33 AM EST
Axad, Abriil 14, 2013 (HOL) — Qarax ay ku dhinteen labo ruux oo u dhashay dalka Turkiga, haweeney Soomaali ah iyo qofkii weerarka fuliya ayaa ka dhacay waddada isku xirta garoonka diyaaradaha ee Muqdisho iyo isgoyska KM4 ee magaalada Muqdisho.

4/14/2013 9:05 AM EST
Axad, April 14, 2013(HOL)—Xildhibaano ka tirsan Baarlamaanka Federaalka Soomaaliya oo todobaad ku sugnaa dalka Sweden ayaa waxay fursad u heleen in ay arkaan sida uu u shaqeeyo baarlamaanka dalka Sweden, iyagoo sidoo kale la kulmay qaar ka mid ah Soomaalida ku nool dalka Sweden.

4/14/2013 8:55 AM EST
Axad, Abriil 14, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) iyo wafdi uu hoggaaminayo oo maalmihii ugu dambeeyay booqashooyin ku marayey dalalka ay ciidamadu ka joogaan Soomaaliya ayaa dib ugu soo laabtay maanta Muqdisho, isagoo ka warbixiyay safarkiisa.

4/14/2013 8:41 AM EST
Axad, Abriil 14, 2013 (HOL) — Maxkamadda gobolka Hargeysa, ayaa maanta xukuntay Jaamac Cilmi Jiir oo ah muwaadin maqaalo taxane ah oo ku dhaliili jiray xukuumadda madaxweyne Siillaanyo ku qoray

4/14/2013 7:07 AM EST
Axad, Abriil 14, 2013 (HOL) — Golaha Deegaanka magaaladda Hargeysa, ayaa Saaka doortay gudoomiyihii golaha deegaanka Hargeysa oo noqon dooona maayarka magaaladda.

4/14/2013 7:03 AM EST
Axad, Abriil 14, 2013 (HOL) — In ka badan 10-qof ayaa ku dhintay tiro intaas ka badanna way ku dhaawacmeen weerarro isugu jiray toos iyo ismiidaamin oo maanta lagu qaaday xarunta maamulka gobolka Banaadir, halkaasoo ay ka socotay dacwad lagu qaaday dad eedeysanayaal ah.

4/14/2013 6:26 AM EST
Axad, 14 April, 2013 (HOl) :- Ciidamo gadoodsan oo ka tirsan kuwa dowladda Soomaaliya ayaa maanta jidgooyooyin dhigtay inta badan wadooyinka waaweyn ee magaalada Kismaayo, iyadoona uu gabi ahaanba manta xiranyahay dhaqdhaqaaqii ganacsi ee ka jiray magaalada.

4/14/2013 2:14 AM EST
Axad, Abriil 14, 2013 (HOL) — Magaalada Addis Ababa ee xartunta dalka Itoobiya ayaa waxaa lagu soo gabagabeeyay shirka arrimaha bulshada iyo shaqaalaha ee ururka Midowga Afrika. Shirkan oo looga hadlayay arrimaha shaqada, bulshada iyo shaqaalaha Afrika.

4/14/2013 1:44 AM EST
Axad, Abriil 14, 2013 (HOL) — Madaxweynaha Soomaaliya, Xasan Sheekh Maxamuud iyo wafdigii kala qaybgalay shirkii Turkiga oo isugu jiray wasiirro iyo xildhibaanno ka tirsan dowladda ayaa dib ugu soo laabtay saakay magaalada Muqdisho ee xarunta Soomaaliya.

4/14/2013 1:38 AM EST
Axad, Abriil 14, 2013 (HOL) — Madaxweynaha Somaliland, Axmed Maxamed Maxamuud (Siilaanyo) ayaa sheegay in heshiiskii ay isaga iyo madaxweyne Xasan Sheekh Maxamuud kala la saxiixday uu nuxukiisu ahaa sidii ay labada dal uga wadashaqeyn lahaayeen danahooda.