6/26/2019
Today from Hiiraan Online:  _
Wararka Maanta- Arbaco, Apr 10, 2013
Ra'iisul Wasaaraha Soomaaliya oo Kulan Hordhac ah kula yeeshay Magaalada Kampala Dhiggiisa Uganda (SAWIRRO)



Arbaco, Abriil 10, 2013 (HOL) — Ra'iisul wasaaraha Somalia, Cabdi Faarax Shirdoon (Saacid) iyo wafdi uu hoggaaminayo oo booqasho ku jooga dalka Uganda ayaa kulan hordhac ah la yeeshay ra'iisul wasaaraha Uganda, Amama Mbabazi.

Labada ra'iisul wasaare ayaa si qoto dheer uga hadlay arrimaha iskaashiga labada dal, gaar ahaana dhinaca amniga, dhaqaalaha iyo horumarka, iyadoo ugu horreyn uu ra'iisul wasaaruhu ka mahad-celiyay doorka Uganda uga jirto dadaalka sida rasmiga ah loogu nabadeynayo Soomaaliya.

"Waxaan dowladda Uganndaha iyo shacabkeedaba uga mahad-celinayaa doorkeeda muuqda ee howlgalka nabad-ilaalinta AMISOM, waxayna ahayd dawladdii u horreysay ee ku timaada gurmadka AMISOM u gashay bad-baadada Soomaaliya," ayuu yiri ra'iisal wasaare Saacid.

Ra'iisul wasaaraha ayaa faah-faahin ka bixiyay ujeeddada socdaalka uu ku marayo dalalka bariga Afrika iyo midka uu ku tagay dalka Ugvanda, isagoo sheegay inay qayb ka tahay sidii loo xoojin lahaa xiriirka howlaha lagu sugayo ammaanka Soomaaliya.

"Waxaan idin kugu nimid inaan dardargelino howlaha sugidda ammaanka iyo xasilinta dalka, innagoo wadna qorsheyaal cusub oo aanu doonayno inaan si buuxda ula kaashano AMISOM oo Uganda ay safka hore kaga jirto," ayuu yiri Saacid oo intaas ku daray in khatarta argagixiso aysan ahayn mid la sahlan karo una baahan tahay iskaashi buuxa.

Dhanka kale, ra'iisul wasaaraha Uganda, Amama Mbabazi oo dhankiisa ka hadlay kulanka ayaa ka mahad-celiyay booqashada ra'iisul wasaare Saacid uu ku tagay dalkaas, wuxuuna aad u soo dhaweeyey qorshaha cusub ee dowladdu ay ku dooneyso inay kusoo celiso amniga iyo xasiloonida guud ahaan Soomaaliya.

Wadahada u dhexeeya wafdiga ra'iisal wasaaraha iyo dowladda Uganda ayaa sii socon doona, waxaana qorshaysan in ra'iisul easaaruhu la kulmo madaxweynaha Uganda, Yuweri Mesevini isagoo kala hadli doona iskaashiga labada dal.







Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
4/10/2013 10:17 AM EST
Arbaco, Abriil 10, 2013 (HOL) — Guddoomiyaha baarlamaanka Somalia, Prof. Maxamed Sheekh Cismaan (Jawaaari) iyo wafdi uu hoggaaminayo oo socdaal shaqo ku jooga dalka Norway magaalada Oslo kula kulmay Jaaliyadda Soomaaliyeed ee dalkaas ku nool, isagoo ku boorriyay inay kaalin muuqata ka qaataan dib u dhiska dalka iyo nabadeyntiisa.

4/10/2013 10:05 AM EST
Arbaco, Abriil 10, 2013 (HOL) — Masjidka Qadiimka ee Balad-xaawo waxaa la dhisay sannadkii 1970-kii waana masjidkii ugu horreeyay oo degmadaas laga dhiso, isagoo sidoo kalena dhismihii ugu horreeyay oo dhagax ah oo laga dhiso degmadaas. Markii ay bateen shacabka ku nool degmada Balad-xaawo ayaa waxaa la ballaariyay sannadkii 19983-kii.

4/10/2013 7:57 AM EST
Arbaco, Abriil 10, 2013 (HOL) — Laba qof ayaa ku dhintay, is rasaasayn ka dhacday duleedka koonfur galbeed ee deegaanka Kaba dheere ee magaaladda Burco ee gobolka Togdheer.

4/10/2013 7:51 AM EST
Arbaco, Abriil 10, 2013 (HOL) — Madaxweynaha Soomaaliya, Xasan Sheekh Maxamuud ayaa ballanqaaday in ay ula dagaalami doonaan ciidamada geysta kufsiga iyo dhaca sida ay ula dagaalamaan Al-shabaab, isagoo qiray in kooxo yar oo ciidamo ka mid ah kuwa dowladda ay kufsi iyo dhac u geystaan shacabka Soomaaliyeed.

4/10/2013 7:09 AM EST
Arbaco, Abriil 10, 2013 (HOL) — Golaha wasiirrada ee Puntland ayaa shirkoodii todobaadlaha ahaa asbuucan ku meel mariyey gobol cusub oo lagu soo daray gobollada Puntland iyo degmooyin cusub oo la magacaabay.

4/10/2013 1:50 AM EST
Arbaco, Abriil 10, 2013 (HOL) — Madaxweynaha Soomaaliya, Xasan Sheekh Maxamuud oo ka mid ahaa madaxdii ka qaybgalay caleemo-saarkii Uhuru Keyatta oo loo dhaariyay xilka madaxnimo ee Kenya ayaa xalay kulan gaar ah la yeeshay madaxweynaha cusub ee Kenya, isagoo kala hadlay xiriirka labada dal iyo sidii loo xooji lahaa.

4/10/2013 1:36 AM EST
Arbaco, Abriil 10, 2013 (HOL) — Kufsiga lagula kaco haweenka ku jira xeryaha barkacayaasha ee ku yaalla Muqdisho ayaa soo kordhaya, iyadoo la sheego in kufsigaas ay intiisa badan geystaan dad xiran direyska ciidamada dowladda Soomaaliya.

4/10/2013 1:29 AM EST
Arbaco, Abriil 10, 2013 (HOL) — Shir lagu horumarinayo gobollada, Awdal, Salal iyo Gabileey ayaa shalay lagu qabtay magaalada Boorame, kaasoo ay soo qabanqaabiyeen haweenka saddexdan gobol, waxaana hadallo ka jeediyay haween ay ka mid ahayd, Caasha Kaluunle oo ka mid ahayd qaban-qaabiyayaasha kulanka.