8/18/2022
Today from Hiiraan Online:  _
Wararka Maanta- Talaado, Sept 25, 2012
Kenya oo sheegay inay hubka ka dhigtay Askari Ciidankeeda ka tirsanaa oo si bareer ah u toogtay Xoolo dhaqato Soomaaliyeed
Talaado, September 25, 2012 (HOL) — Dowladda Kenya ayaa sheegtay inay hubka ka dhigtay askari ciidamadeeda ka tirsan oo si bareer ah u toogtay lix qof oo ahaa xoolo dhaqato Soomaaliyeed kuwaasoo ku sugnaa deegaanka Janaay-cabdalla ee gobolka Jubbada Hoose.

Afhayeenka ciidamada Kenya, Col. Cyrus Oguna oo warbaahinta kula hadlay Nairobi ayaa sheegay in falkaas ay aad uga qoomameynayaan, isagoo sheegay in howsha baarista dhacadan ay waddo AMISOM oo ay ciidamadooda ka tirsan yihiin, iyaguna ay baaris ku sameyn doonaan askariga.

"Mid ka mid ah askarteenna ku sugan Jubbada hoose ayaa toogasho ku dilay lix qof oo Soomaali ah. Askari si dhaqso ah ayaa hubka looga dhigay, waxaana marinayaa ciqaab adag haddii uu dilka ku caddaado," ayuu yiri Col. Oguna.

Kenya ma aysan sheegin magaca askariga falkaas geystay, iyadoo saraakiisha dowladda Soomaaliya ee ku sugan Jubbooyinka ay xaqiijiyeen in askariga iyo laba qof oo uu dhaawacay loo qaaday magaalada Nairobi ee dalka Kenya.

Afhayeenka ciidamada Soomaalida ee ku sugan Jubbooyinka Aadan Axmed Xirsi (Rufle) ayaa sheegay in ciidamada Kenya ay dadkan oo shacab ahaa kasoo ururiyeen dhul howd ah, ayna toogteen iyagoo aan la socodsiin, taasoo uu sheegay inay aad uga caroodeen, mar kalena aysan u dulqaadan doonin.

Dilka loo geystay dadkan shacabka ah, qaarka kalena lagu dhaawacay ayaa waxaa aad uga carooday dadka ku nool Jubbooyinka, iyadoo lagu tilmaamay xasuuq ay ciidamada Kenya u geysanayana shacabka Soomaaliyeed.

Col. Oguna ayaa ugu dambeyn sheegay in sababta ay u joogaan Soomaaliya aysan ahayn inay shacabka dhibaateeyaan, balse ay tahay inay caawiyaan, isagoo sheegay in dowladdiisu ay raalligelin weyn ka bixisay dilkaas.

Dhanka kale, safiirka Soomaaliya ee Kenya, Maxamed Cali Ameerika ayaa sheegay in dowladda Kenya ay weydiisteen inay mag-dhow ka bixiyaan shacabka la gumaaday, isagoo xusay inuu xukuumadda Kenya ka sugayo jawaab.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/25/2012 8:48 AM EST
Talaado, September 25, 2012 (HOL) — Madaxweynaha dalka Kenya, Mwai Kibaki ayaa ugu baaqay ha'yadaha gargaarka ee caalamka iyo kuwa Qaramada Midoobay inay u guuraan gudaha Soomaaliya, si ay halkaas ugu caawiyaan dadka gargaarka u baahan.

9/25/2012 7:33 AM EST
Talaado, September 25, 2012 (HOL) — Diyaarado dagaal oo aan la garaneyn cidda iska leh ayaa maanta duqeymo xooggan ka geystay garoonka diyaaradaha magaalada Kismaayo ee xarunta gobolka Jubbada Hoose.

9/25/2012 6:49 AM EST
Talaado, September 25, 2012 (HOL) — Maxkamada sare ee Somaliland, ayaa nin hore loogu xukumay inuu kooxaha Al-shabaab ka tirsan oo qaraabadiisu racfaanka qaadatay ku xukuntay 14 bilood oo xadhig ah, kaas oo ka bilaabmaysa maalintii la xidhay.

9/25/2012 6:21 AM EST
Talaado, September 25, 2012 (HOL) — Ciidamada ka socda dalka Jabuuti ee qeybta ka ah howlgalka midowgga Africa ee AMISOM ayaa gaaray xaafadda Howl-wadaag ee magaalada Baladweyne ee gobolka Hiiraan oo ay horay saldhigyo ugu lahaayeen ciidamada dowladda Itoobiya.

9/25/2012 4:07 AM EST
Talaado, September 25, 2012 (HOL) — Madaxweyne ku Xigeenka Somaliland, Cabdiraxmaan Cabdullaahi Ismaaciil (Saylici) ayaa furay shir dib loogu eegayo mashruuca Maamul daadejinta dawladaha hoose ee mudada Shanta Sanno ka socday degmooyinka Somaliland.

9/25/2012 4:07 AM EST
Talaado, September 25, 2012 (HOL) — Madaxii wafaafinta ee ururkii Xisbul Islaam, Sheekh Maxamed Macallin Cali ayaa sheegay inay ka baxeen Xarakada Al-shabaab oo ay ku biireen sannadkii 2010, isagoo sheegay inay soo saareen lix qodob oo ay ku caddeynayaan go'aannadooda.

9/25/2012 3:00 AM EST
Talaado, September 25, 2012 (HOL) — Ugu yaraan shan ka tirsanaa ciidamada dowladda Soomaaliya ayaa ku dhintay iskahorimaad ciidammo dowladda kawada tirsan ku dhexmaray deegaanka Lafoole oo u dhexeeya Muqdisho iyo Afgooye, iyadoo dagaalkaas ay markii dambe ku biireen ciidammada AMISOM oo gubay mid ka mid ah gaari ay lahaayeen ciidamada dowladda.

9/25/2012 2:49 AM EST
Talaado, September 25, 2012 (HOL) — Wafdi uu horkacayo safiirka dalka Denmark u qaabilsan Soomaaliya, Geert Aagaard Andersen ayaa shalay booqasho ku tagay magaalada Garoowe ee xarunta Puntland, waxayna madaxtooyada kula kulmeen madaxweyne Cabdiraxmaan Maxamed Faroole iyo qaar ka mid ah golihiisa wasiirrada.