8/18/2022
Today from Hiiraan Online:  _
Wararka Maanta- Isniin, Sept 17, 2012
Xubno cusub oo dhowaan kusoo biiray golaha wasiirada Puntland oo maanta la dhaariyey.


Isniin, September , 17, 2012 (HOL)- Xarunta madaxtooyada ee magaalada Garoowe waxaa maanta lagu dhaariyey xubno cusub oo dhowaan uu madaxweyne Cabdiraxmaan Maxamed Faroole kusoo daray golaha wasiirada. Mas’uuliyiintan oo ay  tiradoodu 6 tahay ayaa isugu jira 2 wasiir iyo 4 wasiir ku-xigeen.

 

Munaasabadda dhaarinta ayaa kusoo beegan tahay furitaanka shirka tolobaadlaha ah ee ay golaha xukuumaddu isugu yimaadaan maalin walba oo Isniin ah, waxaana shir gudoominayey madaxweynaha iyadoo madaxweyne ku xigeenkuna uu goob joog ahaa.

 

Wasiirada iyo wasiir ku-xigeenada cusub ee la dhaariyeyna waxay kala yihiin:

 

1- Saleebaan Maxamuud Siciid – wasiiru dowlaha dalxiiska, deegaanka iyo duurjoogta.

 

2- Maxamuud Caydiid Dirir – wasiirka warfaafinta, isgaarsiinta, hidaha iyo dhaqanka.

 

3- Caasho Maxamed Axmed – wasiir ku-xigeenka haweenka iyo horumarinta arimaha qoyska.

 

 

4- Jaamac Yaasiin Jaamac- wasiir ku-xigeenka waxbarashada.

 

5- Yuusuf Cali Siciid – wasiir ku-xigeenka shaqada iyo shaqaalaha.

 

6- Axmed Ibraahim Cabdiraxmaan – wasiir ku-xigeenka qorsheynta iyo xiriirka caalamiga ah.

 


Madaxweyne Faroole oo dhaarinta kadib war fidiyeenada la hadlay, ayaa si kooban uga warbixiyey isku shaandheyntii uu labo beri kahor ku sameeyey golaha wasiirada.

 

Wuxuuna sheegay in ay wax iska caadi ah tahay in hadba mar golaha dib u habeyn lagu sameeyo, islamarkaana ay muhiim tahay in qofkii howshiisa si wanaagsan u gudan waaya qof kale oo ka howl karsan lagu soo bedelo. 

 

“Cusbooneysiinta golaha wasiiradu mid cid loogu daraanayo ma ahan, mid cid gaar ah loogu eexanayana ma ahan, waxa weeyey sidii dhaqanku ahaan jirey mid la isugu qiimeynayo shaqada meesha ka socota iyo waayaha cusub ee uu dalku galay” madaxweyne Cabdiraxmaan ayaa yiri.

 

Madaxweynaha oo hadalkiisa sii wata ayaa intaas raaciyey: “Xilalka dowladda waa loo siman yahay, hadba nin baa yimaada  nin kalena wuu ka baxaa. Waxaa lagama maarmaan ah in dad isla jaanqaadi karaa ay isla shaqeeyaan, mudooyinkii u danbeeyeyna waxan u janjeernay dhanka dhalinyarada, jiil cusub baa soo gelaya meesha oo is bedel baa socda”

 

Labo beri kahor ayey ahayd markii uu madaxweynaha Puntland isku shaandheyn ku sameeyey goalaha wasiirada, islamarkaana uu xilalka ka qaaday mas’uuliyiin dhowr ah oo wasiiro iyo wasiir ku-xigeeno isugu jirey.



 

Maxamed Salaad Xaaji Dirir, Hiiraan Online

[email protected]

Puntland, Somalia













Click here
9/17/2012 11:53 AM EST
Isniin, September , 17, 2012 (HOL)- Madaxweynaha Somaliland Axmed Maxamed Maxamuud (Siilaanyo) ayaa dhagax dhigay mashruuc balaadhan oo loo dhisayo xarun lagu daryeelayo Caruurta agoomaha ee Somaliland.

9/17/2012 11:51 AM EST
Isniin, September , 17, 2012 (HOL)- Taliska ciidamada Booliska ee Puntland ayaa ka warbixiyey sida uu xiligan yahay ammaanka magaalada Gaalkacayo ee xarunta gobolka Mudug.

9/17/2012 4:55 AM EST
Isniin, September 17, 2012 (HOL) — Ciidamada dowladda Soomaaliya oo garab ka helaya kuwa Kenya ayaa shalay gelinkii danbe la wareegay deegaanka Birta Dheer oo qiyaastii 60-km u jira magaalada Kismaayo kadib dagaallo faraha looga gubtay oo ay Al-shabaab kula galeen inta u dhexeysa deegaanada Birta Dheer Qalaawile ee gobolka Jubbada Hoose.

9/17/2012 3:33 AM EST
Isniin, September 17, 2012 (HOL) — Gabar Soomaali ah oo lahayd uur sagaal bilood ah ayaa lagu dilay magaalada Port Elezaberth ee dalka Koonfur Africa kaddib markii kooxo huubeysan ay u galeen guriga ay ka degenayd magaaladaas.

9/17/2012 3:31 AM EST
Isniin, September 17, 2012 (HOL) — Kooxo bastoolado ku hubeysan ayaa xalay ku dilay degmada Shibbis ee gobolka Banaadir wiil dhalinyaro ah oo lagu magacaabi jiray, Zakariye Maxamed Maxamuud kaddib markii ay ku weerareen maqaayad uu ka casheynayay.

9/17/2012 3:13 AM EST
Isniin, September 17, 2012 (HOL) — Taliyaha ciidamada Midowga Afria ee AMISOM, Jen. Adrew Gutti ayaa raalli-gelin ka bixiyay shil uu mid ka mid ah gaadiidkooda ku dilay wiil dhallinyaro ah shalay oo Axad ahayd, xilli ay socotay munaasabad lagu caleemo-saarayay madaxweynaha Soomaaliya, Xasan Sheekh Maxamuud.

9/17/2012 2:51 AM EST
Isniin, September 17, 2012 (HOL) — Ugu yaraan 40-qof oo dhinacyadii dagaalamay ah ayaa ku dhintay dagaallo culus oo ka dhacay deegaanno u dhexeeya magaalada Kismaayo iyo degmada Afmadow ee gobolka Jubbada Hoose, tiro intaas ka badanna ay ku dhaawacmeen.