8/18/2022
Today from Hiiraan Online:  _
Wararka Maanta- Isniin, Sept 17, 2012
Taliska Booliska Puntland oo sheegay in ammaanka magaalada Gaalkacayo uu yahay xiligan mid sugan.


Isniin, September , 17, 2012 (HOL)- Taliska ciidamada Booliska ee Puntland ayaa ka warbixiyey sida uu xiligan yahay ammaanka magaalada Gaalkacayo ee xarunta gobolka Mudug.

 

Taliye ku xigeenka Booliska Puntland G/le sare Muxiyadiin Axmed Muuse oo maanta warbaahinta maxalliga ah la hadlay, ayaa sheegay in todobaadyadii u danbeeyey ammaanka magaaladu uu ahaa mid aad u wanaagsan.

 

Wuxuuna intaas ku daray in ciidamadu ay si joogto ah u sameeyaan howlgalo baaritaan iyo roondo isugu jira, dad badan oo laga shekisan yahayna ay soo qaqabteen.

 

 “Ciidamadu habeen iyo maalin way shaqeeyaan, dad badan oo la tuhunsan yahay ayaa la qabtay, Hoteelo badan ayaa la baaray, gaadiid dhowr ahna gacanta ayaa lagu soo dhigay” sidaas waxa yiri taliye ku xigeenka Booliska Puntland.

 

Dhinaca kale waxaa magaalada Mudiqsho ku sugan wefdi ka socda Puntland oo uu horkacayo wasiirka amniga Col. Khaliif Ciise Mudan. Ujeedada socdaalka wefdigan ayaa la sheegay in ay tahay sidii ay madaxda sare ee dalka ula yeelan lahaayeen kulan looga arinsanayo sida ugu haboon ee ay Puntland iyo xukuumadda Federaalku  arimaha ammaanka isaga kaashan karaan.

 

Magaalada Gaalkacayo oo ah magaalo xudun u ah inta badan gobolada dalka, islamarkaana u qaybsan labo dhinac oo ay maamulada Galmudug iyo Puntland ka kala arimiyaan, waxaa labadii sano ee u danbeeyey ka dhacay falal badan oo ammaanka liddi ku ah.

 

Waxaana dhowaan dhinaca uu maamulka Puntland ka taliyo gaarey ciidamo badan oo Daraawiish iyo Boolis isugu jira, si dib loogu soo celiyo xasiloonida guud ee magaalada, kadib markii ay rabshadaha Burcad badeeda iyo dilalka qorsheysni aad kor ugu kaceen.

 

Maxamed Salaad Xaaji Dirir, Hiiraan Online

[email protected]

Puntland, Somalia













Click here
9/17/2012 11:53 AM EST
Isniin, September , 17, 2012 (HOL)- Madaxweynaha Somaliland Axmed Maxamed Maxamuud (Siilaanyo) ayaa dhagax dhigay mashruuc balaadhan oo loo dhisayo xarun lagu daryeelayo Caruurta agoomaha ee Somaliland.

9/17/2012 11:52 AM EST
Isniin, September , 17, 2012 (HOL)- Xarunta madaxtooyada ee magaalada Garoowe waxaa maanta lagu dhaariyey xubno cusub oo dhowaan uu madaxweyne Cabdiraxmaan Maxamed Faroole kusoo daray golaha wasiirada. Mas’uuliyiintan oo ay tiradoodu 6 tahay ayaa isugu jira 2 wasiir iyo 4 wasiir ku-xigeen.

9/17/2012 4:55 AM EST
Isniin, September 17, 2012 (HOL) — Ciidamada dowladda Soomaaliya oo garab ka helaya kuwa Kenya ayaa shalay gelinkii danbe la wareegay deegaanka Birta Dheer oo qiyaastii 60-km u jira magaalada Kismaayo kadib dagaallo faraha looga gubtay oo ay Al-shabaab kula galeen inta u dhexeysa deegaanada Birta Dheer Qalaawile ee gobolka Jubbada Hoose.

9/17/2012 3:33 AM EST
Isniin, September 17, 2012 (HOL) — Gabar Soomaali ah oo lahayd uur sagaal bilood ah ayaa lagu dilay magaalada Port Elezaberth ee dalka Koonfur Africa kaddib markii kooxo huubeysan ay u galeen guriga ay ka degenayd magaaladaas.

9/17/2012 3:31 AM EST
Isniin, September 17, 2012 (HOL) — Kooxo bastoolado ku hubeysan ayaa xalay ku dilay degmada Shibbis ee gobolka Banaadir wiil dhalinyaro ah oo lagu magacaabi jiray, Zakariye Maxamed Maxamuud kaddib markii ay ku weerareen maqaayad uu ka casheynayay.

9/17/2012 3:13 AM EST
Isniin, September 17, 2012 (HOL) — Taliyaha ciidamada Midowga Afria ee AMISOM, Jen. Adrew Gutti ayaa raalli-gelin ka bixiyay shil uu mid ka mid ah gaadiidkooda ku dilay wiil dhallinyaro ah shalay oo Axad ahayd, xilli ay socotay munaasabad lagu caleemo-saarayay madaxweynaha Soomaaliya, Xasan Sheekh Maxamuud.

9/17/2012 2:51 AM EST
Isniin, September 17, 2012 (HOL) — Ugu yaraan 40-qof oo dhinacyadii dagaalamay ah ayaa ku dhintay dagaallo culus oo ka dhacay deegaanno u dhexeeya magaalada Kismaayo iyo degmada Afmadow ee gobolka Jubbada Hoose, tiro intaas ka badanna ay ku dhaawacmeen.