8/8/2022
Today from Hiiraan Online:  _
Wararka Maanta- Isniin, Sept 17, 2012
Burcad Koonfur Afrikaan ah oo Gabar Soomaaliyeed oo uur lahayd kufsi iyo dil ugu geystay Magaalada Port Elizabeth

Isniin, September 17, 2012 (HOL) — Gabar Soomaali ah oo lahayd uur sagaal bilood ah ayaa lagu dilay magaalada Port Elezaberth ee dalka Koonfur Africa kaddib markii kooxo huubeysan ay u galeen guriga ay ka degenayd magaaladaas.

Dhaqaatiirta Koonfur Afrika ayaa caddeeyay inta aanan la dilin gabadha in la fara-xumeeyay isla markaana ay rag badan u galmoodeen; iyagoo markii dambe u yeeray booliska daabaca faraha kuwasoo iyagana sheegay inay heleen faro rag kuwaasoo baaritaan lagu sameynayo si loo helo kuwii ay ahaayeen.

Waa dhacdo xanuun badan isla markaana noqonaysa tii labaad ee kufsi lagula kaco haweeney Soomaaliyeed; iyadoo Soomaalida Koonfur Africa aysan weli illaawin hooya Soomaaliyeed iyo saddex caruur ah oo ay dhashay oo sidan oo kale loogu dilay dalka isla magaalada Port Elezaberth.

Hadaba qaar ka mid ah madaxda Jaaliyada Soomaalida Koonfur Africa oo aan kula kulanay Cape Town ayaa sheegay in ay aad ugu xunyihiin isla markaana fariin u diray Dowlada South Africa iyo Tan Soomaaliya.

Guddoomiyaha jaaliyadda banaadiriga ee Koonfur Afrika, Muuse Muudde Afrax ayaa sheegay inay aad ugu xun yihiin isla markaana dadkii sameeyay falkaasi lasoo qabto lana horkeeno sharciga.

Sidoo kale, Maxamed Cabdi Maalin oo ku magac-dheer Sanka kana mid ah madaxda jaaliyadda Soomaaliyeed ee Koonfur Afrika ayaa dowladda dalkaas ugu baaqay inay wax ka qabato falalka noocan oo kale ah kuwaasoo xad-dhaaf noqday, maadaama loosoo dhigtay hablaha Soomaaliyeed.

Si kastaba ha ahaatee Soomaalida ku nool dalka Koonfur Afrika ayaa maalin kasta maqlaya ama arkaya wax ku cusub isla markaana iyagoo niyad-jabay iyo quus ka jooga inay dalkaas kusii noolaadaan.

Maxamed Deeq Muuse Nuur (Deeqdarajo)
[email protected]
Cape Town, Koonfur Afrika













Click here
9/17/2012 11:53 AM EST
Isniin, September , 17, 2012 (HOL)- Madaxweynaha Somaliland Axmed Maxamed Maxamuud (Siilaanyo) ayaa dhagax dhigay mashruuc balaadhan oo loo dhisayo xarun lagu daryeelayo Caruurta agoomaha ee Somaliland.

9/17/2012 11:52 AM EST
Isniin, September , 17, 2012 (HOL)- Xarunta madaxtooyada ee magaalada Garoowe waxaa maanta lagu dhaariyey xubno cusub oo dhowaan uu madaxweyne Cabdiraxmaan Maxamed Faroole kusoo daray golaha wasiirada. Mas’uuliyiintan oo ay tiradoodu 6 tahay ayaa isugu jira 2 wasiir iyo 4 wasiir ku-xigeen.

9/17/2012 11:51 AM EST
Isniin, September , 17, 2012 (HOL)- Taliska ciidamada Booliska ee Puntland ayaa ka warbixiyey sida uu xiligan yahay ammaanka magaalada Gaalkacayo ee xarunta gobolka Mudug.

9/17/2012 4:55 AM EST
Isniin, September 17, 2012 (HOL) — Ciidamada dowladda Soomaaliya oo garab ka helaya kuwa Kenya ayaa shalay gelinkii danbe la wareegay deegaanka Birta Dheer oo qiyaastii 60-km u jira magaalada Kismaayo kadib dagaallo faraha looga gubtay oo ay Al-shabaab kula galeen inta u dhexeysa deegaanada Birta Dheer Qalaawile ee gobolka Jubbada Hoose.

9/17/2012 3:31 AM EST
Isniin, September 17, 2012 (HOL) — Kooxo bastoolado ku hubeysan ayaa xalay ku dilay degmada Shibbis ee gobolka Banaadir wiil dhalinyaro ah oo lagu magacaabi jiray, Zakariye Maxamed Maxamuud kaddib markii ay ku weerareen maqaayad uu ka casheynayay.

9/17/2012 3:13 AM EST
Isniin, September 17, 2012 (HOL) — Taliyaha ciidamada Midowga Afria ee AMISOM, Jen. Adrew Gutti ayaa raalli-gelin ka bixiyay shil uu mid ka mid ah gaadiidkooda ku dilay wiil dhallinyaro ah shalay oo Axad ahayd, xilli ay socotay munaasabad lagu caleemo-saarayay madaxweynaha Soomaaliya, Xasan Sheekh Maxamuud.

9/17/2012 2:51 AM EST
Isniin, September 17, 2012 (HOL) — Ugu yaraan 40-qof oo dhinacyadii dagaalamay ah ayaa ku dhintay dagaallo culus oo ka dhacay deegaanno u dhexeeya magaalada Kismaayo iyo degmada Afmadow ee gobolka Jubbada Hoose, tiro intaas ka badanna ay ku dhaawacmeen.