8/18/2022
Today from Hiiraan Online:  _
Wararka Maanta- Axad, Sept 16, 2012
Madaxweynaha Soomaaliya oo sheegay inuu xoogga saari doono Xasilinta dalka, soo celinta Sharciga iyo Xoojinta Midnimada

Axad, September 16, 2012 (HOL) — Madaxweynaha Soomaaliya, Xasan Sheekh Maxamuud oo maanta si rasmi ah ula wareegay xilka madaxweynimo ee dalka ayaa sheegay in dowladda uu dhisayo ay xoogga saari doonto lix qodob oo muhiim ah, kuwaasoo ay ka mid yihiin xasilinta dalka, dib u dhiska dhaqaalaha, soo celinta sharciga iyo adkeynta midnimada Soomaaliya.

Mudane Xasan Sheekh wuxuu sheegay in dowladdiisu ay ka shaqeyn doonto sidii dib loogu dhisi lahaa dhaqaalaha qoyska oo uu sheegay inuu saldhig u yahay dhaqaalaha guu dee dalka, sidoo kalena ay dhallinyarada u abuuri doonaan fursado shaqo iyo xirfado ay ku shaqeystaan.



"Hadafkeenna koowaad waa inaan xasilinno dalka, waxaana xigi doonta inaan dhisno garsoor madax-babnnaan oo waxtar ah oo horseeda hab cadaaladeed oo shacabku uu raalli ka yahay," ayuu madaxweynaha Soomaaliya ku sheegay khubad uu maanta ka jeediyay munaasabaddii uu xilka kula wareegayay.

Sidoo kale, madaxweynuhu wuxuu sheegay in howsha labaad ee ay qaban doonaan ay tahay soo nooleynta dhaqalaaha dalka, isagoo si gaar ah u xusay inay ka go'an tahay inay kobciyaan dhaqaalaha qoyska oo uu sheegay inuu saldhig u yahay kan guud ee dalka.

Madaxweynuhu wuxuu sheegay in muddadii 21-kii sano ee ay dalka colaaduhu ka jireen ay dadka Soomaaliyeed dhibaato xooggan kala martay, isagoo xusay inay ka shaqeyn doonaan sidii dhibaatooyinkaas lagu masaxi lahaa.

"Waxaan u istaagi doonnaa sidii dadka Sooamalida ay uga heshiin lahaayeen wixii horay u dhexmaray, inagoo ka hortegi doonna wax walba oo dadka kala qaybin karana waan ka ilaalin doonnaa," ayuu yiri Xasan Sheekh oo intaas raaciyay. "Waxaan ka shaqeyn doonnaa sidii ay culummada iyo waxgaradka Soomaaliyeed oo sita calanka nabadda oo bulsho kasta oo wax sheeganaysa ay ugu baaqi lahaayeen nabadda."

Midnimada Soomaaliya ayuu ka hadlay, isagoo sheegay in Soomaaliya ay midowday sannadkii 1960-kii, wxuuuna sheegay in wadahadallada u billowday Soomaaliya iyo Somaliland ay halkooda kasii socon doonaan.

"Kama shaqeyn doonno midnimo jajuub ah ama xoog dulamaasiyadeed ku timaadda. Balse waxaan ka shaqeyn doonnaa midnimo ku timaadda wadahadal, isqadarin iyo istixgelin walaalnimo oo raalli laga wada yahay," ayuu yiri Xasan Sheekh.

Dhanka kale, madaxweynuhu wuxuu sheegay in dowladdiisa ay ka shaqeyn doonto wanaajinta xiriirka dalalka calaamka ay la leedahay, isagoo xusay inuu u mahadcelinayo dalalkii iyo ururradii caawiyay Soomaaliya intii uu burburku jiray.

"Beesha caalamka iyo ururrada waxaan ka codsanaynaa inay markaan gashadaan ookiyaale ka duwan kuwii markii hore ay gashan jireen. Waxaana ka cosanaynaa in kaalmooyinkii ay Soomaaliya siin jireen ay noqdaan kuwo toos ah oo aysan u dhexeyn dhexdhexaadiyeyaal," ayuu yiri madaxweynaha Soomaaliya.

Wuxuu hadalkiisa ku daray in haddii Soomaaliya aysan helin kaalmooyin iyo gacanta ay dunida uga baahan tahay aysan suurogal noqon karin in la dhiso dowlad awood leh, caalamkuna ay inta ay ka xoogeysanayaan ay si daacadnimo ku jiro u garab istaagaan.

Ugu dambeyn, wuxuu sheeagy in Soomaaliya ay doonayso inay ka baxdo dhibka ay kusoo jirtay muddada dheer oo ay ka mid yihiin: burcadbadeedda, argagaxisada iyo nidaam-xumada, isagoo codsaday in gacan laga siiyo sidii ay uga bixi lahaayeen dhibaatadaas. Isagoo sheegay in dal dhibaato ku dhacay uu soo kaban karo oo keliya marka la caawiyo.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
9/16/2012 3:34 PM EST
Xaflad taariikhi ah oo ay kasoo qaybgaleen qaar kamid ah hogaamiyayaasha gobolka iyo wufuud ka socota caalamka oo lagu maamuusayay caleema saarka madaxweynaha cusub ee Soomaaliya Xassan Sheekh Maxamuud ayaa lagu qabtay magaalada Muqdisho ee caasimada Soomaaliya.

9/16/2012 8:58 AM EST
Axad, September 16, 2012 (HOL) — Taliska booliiska maamulka gobolka Hiiraan ayaa warbaahinta uga warbixiyay dilal siyaabo kala duwan uga dhacay galinkii danbe ee maalintii shalay magaalada Baladweyne.

9/16/2012 8:14 AM EST
Axad, September 16, 2012(HOL): Magaalada Västerås ee gobolka Västmanland ee dalka Sweden ayaa waxaa lagu qabtay xaflad lagu taageerayay isbedelka ka dhacay dalka Soomaaliya oo hadda helay dowlad buuxda oo aan KMG ahayn.

9/16/2012 7:34 AM EST
Axad, September 16, 2012 (HOL) — Dab xooggan islamarkaasina sababay khasaaro hantiyadeed ayaa maanta duhurkii waxa uu ka kacay suuqa weyn ee shidaalka lagu iibiyo ee loo yaqaan Umbultooriyo, iyadoona dabku sababay burbur soo gaaray qaar kamid ah goobo ganacsi oo ku yaalla halka uu dabka ka kacay.

9/16/2012 7:21 AM EST
Axad, September 16, 2012 (HOL) — Madaxweynihii hore ee Soomaaliya, Shariif Sheekh Axmed oo hadal ka jeediyay munaasabadda xil wareejinta ayaa sheegay in uu aad ugu faraxsan yahay in Soomaaliya ay ka baxday KMG ay u gudubto xilli ay talinayso dowlad joogto ah.

9/16/2012 5:28 AM EST
Axad, September 16, 2012 (HOL) — Xiisado dagaal ayaa lagu soo waramayaa inay ka taaganyihiin nawaaxiga deegaanka Birta-dheer halkaas oo ay isku horfadhiyaan ciidamada dowladda KMG, kuwa Raaskaambooni iyo Militariga Kenya oo iskaashanaya.

9/16/2012 3:30 AM EST
Axad, September 16, 2012 (HOL) — Wufuud ay ka mid yihiin madaxweynaha dalka Jabuuti, Ismaaciil Cumar Geelle, ra'iisul wasaaraha dalka Itoobiya ee aan weli la dhaarin, Haile Mariam Desaleng, ra'iisul wasaare ku xigeenka dalka Turkiga, Baker Buzdag iyo madaxweyne ku xigeenka Suudaan, Maxamed Cismaan Daaha ayaa soo gaaray Muqdisho, kuwaasoo ka qayb-galaya munaasabadda caleemo-saarka loo sameynayo madaxweynaha Soomaaliya oo Muqdisho ka socota.

9/16/2012 3:01 AM EST
Axad, September 16, 2012 (HOL) — Madaxweynaha Soomaaliya, Xasan Sheekh Maxamuud ayaa ugu baaqay dagaalyahannada Al-shabaab ka tirsan ee Soomaalida ah inay kusoo biiraan hannaanka nabadeed ee dalka, kuwa ajnabiga ahna ay isaga baxaan dalka, isagoo sheegay in ciddii intaas diidda ay dowladdiisu la dagaalami doonto.

9/16/2012 2:56 AM EST
Axad, September 16, 2012 (HOL) — Diyaargarowga xafladda lagu caleemo-saarayo madaxweynaha cusub ee Soomaaliya, Xasan Sheekh Maxamuud ayaa si weyn uga socota Muqdisho, iyadoo la xiray garoonka diyaaradaha ee Muqdisho sidoo kalena la fasaxay shaqaalaha dowladda iyo ardayda.