8/8/2022
Today from Hiiraan Online:  _
Wararka Maanta- Sabti, Sept 15, 2012
Guddoomiyaha Guddiga Madaxa-bannaan ee la dagaalanka Musuq-maasuqa Somalia oo ka Warbixisay halka ay marayaan howlahooda
Sabti, September 15, 2012 (HOL) — Guddiga madaxa-annaan ee la dagaallanka musuqmaasuqa ayaa ka warbixiyay howl in muddo ah uu soo waday oo la xiriirta diiwaan-gelinta hantida Qaranka maadaama dalka uu ku jiro xilli kala guur ah.


Guddoomiyaha guddigan, Khadra Maxamed Ciise oo wareysi gaar ah siisay Radio Bar-kulan ayaa sheegtay in keliya labo wasaaradood ay kasoo jawaabeen codsi ay horey ugu gudbiyeen hay’adaha xukuumaddii KMG ahayd, kaasoo ku saabsanaa soo gudbinta hantida isugu jirta guurtada iyo ma-guurtada ee Qaranka Soomaaliyeed uu leeyahay.

Khadra waxay sheegtay in wasaaradaha arrimaha dibadda iyo tan qorsheynta ay soo gudbiyeen diiwaanka shaqaalihii u shaqeynayay oo isugu jira kuwo joogta ah iyo kuwo aan joogto ahayn. Sidoo kalena ay wasaaradda qorsheynta soo gudbisay hal baabuur oo duq ah, halka wasaaradda arrimaha dibadda aanayn soo gudbin wax baabuur ah, iyadoo labadan wasaaradoodna ay soo wada gudbiyeen fallakii ay ku shaqeynayeen.

Guddoomiyaha guddiga la-dagaalanka musuqmaasuqa waxay sheegay inay wasaaarad kasta ka codsadeen inay si deg-deg ah u soo gudbiso diiwaanka hantida iyo shaqaalaha si dowladda cusub ay u hesho meel ay wax ka billowdo. Waxayna intaas ku dartay in haddii aan hantidaas aan la helin ama aan la diiwaan-gelin ay dowladda cusub ku khasbanaan doonto inay howsha ka billowdo eber oo la mid ah in hantida Qaranka iyo dhaqaalaha dalka ay baaba’een.

“Qalin hadduu yahay waxaan codsaneynaa in wasiirka, madaxweynaha, ra'iisul wasaaraha ama afhayeenka baarlamaanka uu soo gudbiyo, isla markaana uu kaga tago miiskii uu ku shaqeynayay,” ayay tiri khatra.

Ugu dambeyn, Khadra waxay sheegtay inay hay'adaha dowladda ka dalbadeen inay soo gudbiyaan liiska shaqaalaha dowladda oo tifaftiran, heerarkooda, waxay yihiin iyo jagooyinkooda, iyadoo walaac ka muujisay in haddii liiska shaqaalaha la waayo ay noqon doonto in howsha laga soo bilaabo eber.

Guddiga madaxa bannaan ee qaabilsan la dagaallanka musuqmaasuqa ayaa waxaa la magacaabay bishii Jannaayo ee sannadkan 2012, wuxuuna ka koobana yahay sagaal xubnood oo rag iyo dumar isugu jira.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/15/2012 9:37 AM EST
Sabti, September 15, 2012 (HOL) — Xarakada Al-shabaab ee ka dagaalanta dalka Soomaaliya ayaa ugu baaqay shacabka Soomaaliyeed maanta oo Sabti ah inay muujiyaan caradooda ku aaddan filimkii lagu sameeyay Mareykanka ee lagu Nebi Muxamed (NNKH) iyo diinta Islaamka lagu afla-gaadeeyay.

9/15/2012 9:22 AM EST
Sabti, September 15, 2012 (HOL) — Madaxweynaha cusub ee Soomaaliya, Xasan Sheekh Maxamuud ayaa maanta kulankiisii ugu horreeyay kula yeeshay xafiiskiisa madaxtooyada wafdi ka socday Qaramada Midoobay, kuwaasoo uu hoggaaminayay ku xigeenka xoghayaha guud Qaramada Midoobay u qaabilsan arrimaha Soomaaliya, Antinomy Burneury.

9/15/2012 8:50 AM EST
Sabti, September 15, 2012 (HOL) — Dood-cilmiyeed looga hadlayay guurka qasabka ee gabdhaha lagu guuriyo iyo dhibaatooyinka ka dhalan kara ayaa maanta lagu qabtay magaalada Muqdisho, kaasoo ay ka qayb-galeen Haween ka socday 16-ka degmo ee gobolka Banaadir iyo ururrada haweenka.

9/15/2012 8:39 AM EST
Sabti, September 15, 2012 (HOL) — Madaxweynaha Somaliland, Axmed Maxamed Maxamuud (Siillaanyo), ayaa maanta ka qaybgalay munaasibad ay 637 arday ka qalinjabiyeen jaamacadda Hargeysa.

9/15/2012 7:31 AM EST
Sabti, September 15, 2012 (HOL) — War goor-dhow naga soo gaaray deegaanka Birta dheer ayaa sheegaya in nawaaxiga deegaankaasi uu ka qarxay dagaal xooggan oo u dhexeeya ciidamada dowladda KMG oo kaashanaya kuwa Kenya iyo Xarakada Al-shabaab.

9/15/2012 7:30 AM EST
Sabti, September 15, 2012 (HOL) — Allaha u naxariisteen waxaa xalay ku geeriyooday magaalada Muqdisho ee xarunta Soomaaliya guddoomiyhii hore ee degmada Baladweyne Aadan Cabdi Ciise (Aadan Garaaso) sida ay HOL u xaqiijiyeen mas’uuliyiinta maamulka gobolka Hiiraan.

9/15/2012 3:33 AM EST
Sabti, September 15, 2012 (HOL) — Waxaa sii kordhaya carrada dadka muslimiinta ah ee caalamku nool ay ka qaadeen gafka ay gaaladu kula kacaan suubanaheenna Muxammed (NNKH) iyadoo malaayiin muslimiin ah ay kacdoon ka samaynayaan filim lagu aflagaadeeyey islaamka oo lagu jilay Maraykanka.

9/15/2012 3:22 AM EST
Sabti, September 15, 2012 (HOL) — Taliska ciidamada AMISOM ayaa war ay soo saareen ku sheegay in ciidamadooda iyo kuwa dowladda oo is-garabsanaya ay la wareegeen gacan ku haynta deegaanka Biibi oo ku dhow degmada Kismaayo ee xarunta gobolka Jubbada hoose.

9/15/2012 3:18 AM EST
Sabti, September 15, 2012 (HOL) — Booliska dalka Kenya ayaa gacanta ku dhigay rag la tuhunsanyahay in ay ka tirsan yihiin Al-shabaab iyo hub ay siteen oo ay ka mid ahaayeen suumanka nooca isqarxinta loo isticmaalo, kuwaasoo laga soo qabtay guri ku yaal xaafadda ay Soomaalidu degto ee Eastleigh ama Islii.