8/8/2022
Today from Hiiraan Online:  _
Wararka Maanta- Sabti, Sept 15, 2012
Madaxweynaha Somaliland Axmed Siilaanyo oo ka qayb-galay Qalinjabinta 637 arday oo dhamaystay Jaamacadda Hargeysa

Sabti, September 15, 2012 (HOL) — Madaxweynaha Somaliland, Axmed Maxamed Maxamuud (Siilaanyo), ayaa maanta ka qaybgalay munaasibad ay 637 arday ka qalinjabiyeen jaamacadda Hargeysa.

Ardaydan ka qalinjabisay jaamacada Hargeysa ayaa noqonaya dufcadii 9aad ee ka baxda jaamacadda, taas oo ah dufcadii ugu badnayd ee ka baxda jaamacada, iyagoo sanad walba ay kor u sii kordhayso ardayda ka baxaysa jaamacadda Hargeysa.

Ugu horeyn waxa halkaasi ka hadlay gudoomiyaha jaamacadda Hargeysa Dr: Cabdi Xuseen Gaas iyo wasiirka Qorsheynta Qaranka Dr: Sacad Cali Shire oo ka mid ah guddidda Jaamacadda, kuwaas oo ka waramay marxaladihii kala duwanaa ee ay jaamacadu soo martay, ardaydana kula dardaarmay inay shaqooyinka abuurtaaan, meelo badan oo laga shaqeyn karana u tilmaamay.

Gudoomiyaha jaamacadda Camuud Prof: Saleebaan Axmed Guuleed oo ku hadlayey afka jaamacadaha dalka ka jira, Gudomiyaha Xisbiga UCID Eng: Faysal Cali Waraabe, gudoomiyaha xisbiga KULMIYE Muuse Biixi Cabdi, wasiirka waxbarashadda Samsam Cabdi Aadan, oo madasha ka hadlay ayaa dhamaantood hambalyeeyey ardayda, una rajeeyey mustaqbal fiican.


Madaxweyne ku xigeenkii hore ee Somaliland Md: Cabdiraxmaan Aw Cali Faarax oo ka mid ahaa ardaydii ka qalinjabisay ayaa isaguna ku hadlayey afka ardayda qalinjabinaysay, waxaanu sheegay inuu sanadkii labaad ee uu jaamcadad Hargeysa ka qalinjabiyo ay tahay, isago sanadkii hore dhamaystay kuuliyadda sharciga, halka uu maanta dhamaystay kuuliyadda xalinta khilaafaadka iyo Nabadda, waxaanu ardaydu ku booriyey in aanay weynaan lahayn waxbarashadu.

Sidoo kale, waxa xusid mudan ardayda  qalinjabinaysay waxa ka mid ahaa musharxa madaxweyne ee xisbiga UDUB, Cali Maxamed Warancade, wasiirkii hore boosaha iyo isgaadhsiinta, siyaasiin kale iyo xildhibaano, kuwaas oo dhamaantood uu shahaadadoodda gudoonsiiyey madaxweynuhu.

Madaxweynaha Somaliland, Axmed Maxamed Maxamuud (Siillaanyo) ayaa isna u hambalyeeyey ardayda iyo waalidkii ku soo tabcay, isagoo balanqaaday inuu gacan ka gaysan doono horumarka jaamcaddan iyo guud ahaan jaamacadaha dalka.


Jaamacadda Hargeysa ayaa ah midda ugu ardayda badan jamacadaha Somaliland, iyadoo 637 arday ay ka qalinjabiyeen toban kuuliyadood oo kala duwan kuwaasoo ay jiraan 21 dhamaystay kuuliyadda caafimaadka ee dhakhtarnimadda oo 12 wiil iyo 9 hablood iskugu jiray.

Jaamacadda Hargeysa ayaa waxaa sanad walba ka qalinjabiya arday fara badan oo ay ku jiraan siyaasiyiinta hoggaanka dalka haya, waxaana sannadkii hore ka qalin-jabiyay guddoomiyaha golaha wakiiiladda Somaliland, C/raxmaan Cabdullaahi Cirro, guddoomiyaha Muuse Biixi, wasiirka maaliyadda C/casiis Samaale iyo siyaasiyiin kale oo caan ah, taasina waxay dhiiri-galin u tahay ardayda waxbaranaysa ee qaarkood ay isku fasalka yihiin madaxdoodda waxna wada dhigtaan.







Barkhad-Ladiif  M. Cumar, Hiiraan Online 
[email protected]
Hargeysa, Somaliland












Click here
9/15/2012 9:49 AM EST
Sabti, September 15, 2012 (HOL) — Guddiga madaxa-annaan ee la dagaallanka musuqmaasuqa ayaa ka warbixiyay howl in muddo ah uu soo waday oo la xiriirta diiwaan-gelinta hantida Qaranka maadaama dalka uu ku jiro xilli kala guur ah.

9/15/2012 9:37 AM EST
Sabti, September 15, 2012 (HOL) — Xarakada Al-shabaab ee ka dagaalanta dalka Soomaaliya ayaa ugu baaqay shacabka Soomaaliyeed maanta oo Sabti ah inay muujiyaan caradooda ku aaddan filimkii lagu sameeyay Mareykanka ee lagu Nebi Muxamed (NNKH) iyo diinta Islaamka lagu afla-gaadeeyay.

9/15/2012 9:22 AM EST
Sabti, September 15, 2012 (HOL) — Madaxweynaha cusub ee Soomaaliya, Xasan Sheekh Maxamuud ayaa maanta kulankiisii ugu horreeyay kula yeeshay xafiiskiisa madaxtooyada wafdi ka socday Qaramada Midoobay, kuwaasoo uu hoggaaminayay ku xigeenka xoghayaha guud Qaramada Midoobay u qaabilsan arrimaha Soomaaliya, Antinomy Burneury.

9/15/2012 8:50 AM EST
Sabti, September 15, 2012 (HOL) — Dood-cilmiyeed looga hadlayay guurka qasabka ee gabdhaha lagu guuriyo iyo dhibaatooyinka ka dhalan kara ayaa maanta lagu qabtay magaalada Muqdisho, kaasoo ay ka qayb-galeen Haween ka socday 16-ka degmo ee gobolka Banaadir iyo ururrada haweenka.

9/15/2012 7:31 AM EST
Sabti, September 15, 2012 (HOL) — War goor-dhow naga soo gaaray deegaanka Birta dheer ayaa sheegaya in nawaaxiga deegaankaasi uu ka qarxay dagaal xooggan oo u dhexeeya ciidamada dowladda KMG oo kaashanaya kuwa Kenya iyo Xarakada Al-shabaab.

9/15/2012 7:30 AM EST
Sabti, September 15, 2012 (HOL) — Allaha u naxariisteen waxaa xalay ku geeriyooday magaalada Muqdisho ee xarunta Soomaaliya guddoomiyhii hore ee degmada Baladweyne Aadan Cabdi Ciise (Aadan Garaaso) sida ay HOL u xaqiijiyeen mas’uuliyiinta maamulka gobolka Hiiraan.

9/15/2012 3:33 AM EST
Sabti, September 15, 2012 (HOL) — Waxaa sii kordhaya carrada dadka muslimiinta ah ee caalamku nool ay ka qaadeen gafka ay gaaladu kula kacaan suubanaheenna Muxammed (NNKH) iyadoo malaayiin muslimiin ah ay kacdoon ka samaynayaan filim lagu aflagaadeeyey islaamka oo lagu jilay Maraykanka.

9/15/2012 3:22 AM EST
Sabti, September 15, 2012 (HOL) — Taliska ciidamada AMISOM ayaa war ay soo saareen ku sheegay in ciidamadooda iyo kuwa dowladda oo is-garabsanaya ay la wareegeen gacan ku haynta deegaanka Biibi oo ku dhow degmada Kismaayo ee xarunta gobolka Jubbada hoose.

9/15/2012 3:18 AM EST
Sabti, September 15, 2012 (HOL) — Booliska dalka Kenya ayaa gacanta ku dhigay rag la tuhunsanyahay in ay ka tirsan yihiin Al-shabaab iyo hub ay siteen oo ay ka mid ahaayeen suumanka nooca isqarxinta loo isticmaalo, kuwaasoo laga soo qabtay guri ku yaal xaafadda ay Soomaalidu degto ee Eastleigh ama Islii.