3/29/2024
Today from Hiiraan Online:  _
Wararka Maanta- Isniin, Oct 8 , 2012
Suxufiyiinta Ingiriiska iyo Ireland oo taagero weyn u muujiyay suxufiyiinta Soomaaliyeed


Isniin, October 08, 2012(HOL): Shirweynaha Suxufiyiinta dalalka Ingiriiska iyo Ireland oo lagu qabtay Newcastle ayaa markii ugu horreysay ka hadlay xaaladda dhibka badan ee ay ku shaqeeyaan suxufiyiinta Soomaaliyeed.

 

Dalalka Ingiriiska iyo Ireland oo leh hal urur ayaa waxaa ay si weyn uga hadleen mashaakilaadka saxaafadda caalamka heysta, waxaanay shirkooda xoogga ku saarayeen dalalka Soomaaliya iyo Burma.

 

Marka ay timaado  Soomaaliya waxaa ay si gaar ah uga hadlay John McDonnell oo ah xildhiban ka tirsan baarlamaanka dalka Ingiriiska oo u ololeeya difaacitaanka suxufiyiinta. John McDonnell ayaa waxaa uu shirka u sheegay in 47 xildhibaan oo ka tirsan baarlamaanka Ingiriiska ay qoraal wada jir ah ay u gudbiyeen dowladda Ingiriiska, taasi oo ay uga hadlayaan dhibaatada heysata suxufiyiinta Soomaaliyeed.

 

McDonnell waxaa uu sheegay in ay cadaadin ku saarayaan dowladaha caalamka sidii loo difaaci lahaa suxufiyiinta Soomaaliyeed isagoo xusay in dowladda Ingiriiska ay dadaal xoog leh ku bixineyso sidii ay u xasilin laheyd dalka.

 

“Haddii la rabo in ay Soomaaliya xasillooni ku soo laabato, waa in xuquuqda hadalka la  dhowro, sidoo kalena suxufiyiinteeda la nabadgeliyaa, ayna helaan deegaan nabdoon oo ay ku shaqeeyaan” ayuu yiri John McDonnell oo ah mudanhihii ugu horreeyay ee u istaaga difaacitaanka suxufiyiinta Soomaaliyeed.

 

Sidoo kale Michelle Stanistreet oo ah Xoghayaha Guud ee ururka saxafiyiinta Ingiriiska iyo Ireland ee loo yaqaano NUJ ayaa sheegtay in waxa Soomaaliya ka dhacaya ay tahay wax aan indhaha laga qabsan karin oo u baahan in suxufiyiinta korka u dhaafaya 40 kun ee ay hoggaamiso looga baahan yahay in ay garab istaagaan suxufiyiinta Soomaaliyeed.

 


Ururka Qaranka Suxufiyiinta Soomaaliyeed ee NUSOJ ayaa lagu martiqaaday shirkan si uu uga warbixiyo xaaladaha shaqo ee suxufiyiinta Soomaaliyeed iyo khataraha soo wajaha suxufiyiinta Soomaaliyeed.

Xoghayaha Guud ee NUSOJ Cumar Faaruuq Cusmaan ayaa  lagu soo dhaweeyay shirkan wuxuuna shirka ka  jeediyay khudbad dheer oo taabanayso dhinacyo kala duwan sida  caburinta lagu hayo saxaafadda madaxa banaan, dilalka loo geysanayo suxufiyiinta Soomaaliyeed, ku tumashada xuquuqyado shaqo ee suxufiyiinta Soomaaliyeed iyo qodobo kale.

 

“Saxaafadda Soomaaliya waxaa ay maanta arkaysaa wax aysan weligeed arag. Dilkii waa uu sii batay, caburintii xadka ayay dhaaftay, suxufiyiintii waxaa ay noqdeen kuwa aan xuquuq laheyn” ayuu yiri Cumar Faaruq oo ergooyinka shirweynaha hortooda ka hadlayay. “Sanadkan kaliya ayaa waxaa la dilay 15 suxufi iyadoo 7 ka mid ah la dilay bisha September oo kaliya iyagoo lagu dilay magaalada Muqdisho” ayuu hadalkiisa ku sii daray Cumar Faaruuq.

 


“Waxaad isdhihi kartaan in suxufiyiinta dil uun loo geysto, balse waxaan rabaa in aan idiin sheego in ay jiraan dad usoo shaqo tagay in ay suxufiyiinta xuquuqyadooda shaqo ee aas aasiga ah ku tuntaan. Marka waxaa halkaan idinkaga muuqanaya in suxufiyiinta meel kasta laga dhibaateynayo” ayuu mar kale yiri Cumar Faaruuq. 

 

Intaas kaddib  shirweynaha ayaa meel mariyay go’aan lagu taageerayo ururka NUSOJ iyo suxufiyiinta Soomaaliyeed, iyadoo taageeradanna ayaa isugu jirto mid maaliyadeed iyo mid siyaasadeed, wuxuuna Shirweynaha go’aankan u meel mariyay si aqlabiyad ah.



Salaad Iidow Xasan (Xiis), Hiiraan Online

[email protected]

 













Click here
10/8/2012 11:54 AM EST
Isniin, October 08, 2012(HOL): Madaxweynaha Soomaaliya Xasan Shiikh Maxamuud oo maanta markii ugu horreysay dalka dibaddiisa safar ugu amba baxay ayaa waxaa si weyn loogu soo dhaweeyay garoonka diyaaradaha Entebbe ee magaalada Kampala ee dalka Uganda.

10/8/2012 11:08 AM EST
Isniin, October,08, 2012 (HOL)-Dhawr kun oo qof, ayaa maanta ka qaybgalay aaska Marxuum Maxamed Xaashi Dhamac Gaariye oo barqadii maanta la keenay magaaladda Hargeysa.

10/8/2012 10:16 AM EST
Isniin, Oktoobar 08, 2012 (HOL) — Magaalada Muqdisho ayaa waxaa maanta lagu qabtay xaflad lagu taageerayo ra'iisul wasaaraha cusub ee Soomaaliya, Cabdi Faarax Shir-doon oo maalin ka hor uu madaxweynaha Soomaaliya u magacaabay xil ra'iisul wasaaraha.

10/8/2012 9:48 AM EST
Isniin, Oktoobar 08, 2012 (HOL) — Shirkadda Isgaarsiinta Hormuud ayaa maanta ballanqaaday inay bixinayso mushaaraadka macallimiinta wax ka dhiga laba iskuul oo ay wax ka bartaan dadka dhegaha la'a oo Muqdisho ku yaalla kaddib kulan ay la yeelatay mas'uuliyiinta iyo qaar ka mid ah ardayda iskuulladaas wax ka barta.

10/8/2012 8:48 AM EST
Isniin, Oktoobar 08, 2012 (HOL) — Guddida ruqsad bixinta iyo anshax marinta Qareenadda ayaa sheegay natiijada imtixaan ay ka qaadeen kooxdii u horreysay ee qareenadda Somaliland.

10/8/2012 8:22 AM EST
Isniin, Oktoobar 08, 2012 (HOL) — Wafdi ka socda hay’addaha samafalka QM ayaa maanta gaaray magaalada Baladweyne ee xarunta gobolka Hiiraan oo dhawaan ay ku dhuftay fatahaad uu sameeyay wabiga Shabeelle.

10/8/2012 6:55 AM EST
Isniin, Oktoobar 08, 2012 (HOL) — Ugu yaraan lix qof oo dhinacyadii dagaalamay ka tirsan ayaa ku dhintya dagaal culus oo deegaanka Goof-guduud ee duleedka Baydhabo ku dhexmaray ciidamada dowladda Soomaaliya, kuwa Itoobiya iyo xoogagga Al-shabaab.

10/8/2012 6:20 AM EST
Isniin, Oktoobar 08, 2012 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo ayaa maanta u dhoogay dalka Uganda, halkaas oo uu uga qaybgalayo munaasabad lagu xusayo 50-sano guuradii kasoo wareegtay markii Uganda ay xorriyadda qaadatay.

10/8/2012 5:57 AM EST
Isniin, Oktoobar 08, 2012 (HOL) — Xarakada Al-shabaab ayaa deegaannada ay ka taliso ka mamnuucday maanta oo Isniin ah hay'adda Islaamiga ah ee Islamic Relief oo fadhigeedu yahay magaalada London ee dalka Britain.

10/8/2012 5:45 AM EST
Isniin, Oktoobar 08, 2012 (HOL) — Maamulka Jaamacadda Kismaayo ayaa cabasho ka muujiyay ciidamada dowladda iyo kuwa AMISOM oo dhawaan saldhig ciidan ka sameystay xarunta jaamacadda Kismayo oo ku taal duleedka waqooyi ee magaalada.

10/8/2012 3:16 AM EST
Isniin, Oktoobar 08, 2012 (HOL) — Taliye ku xigeenka ciidamada milateriga Somalia, Jen. C/kariin Yuusuf Aadan (Dhega-badan) ayaa sheegay in qorshahoodu uu yahay mid ay ku doonayaan inay isugu furaan magaalada Muqdisho, degmada Baydhabo ee gobolka Bay, degmada Baladweyne ee gobolka Hiiraan iyo degmada Kismaayo ee gobolka Jubbada Hoose.