3/29/2024
Today from Hiiraan Online:  _
Wararka Maanta- Arbaco, Oct 3 , 2012
Xaaladda Magaalada Kismaayo oo saaka deggen, kaddib Qaraxyo sababay dhimasho iyo dhaawac oo shalay ka dhacay magaaladaas

Arbaco, Oktoobar 03, 2012 (HOL) — Xaaladda magaalada Kismaayo ee gobolka Jubbada hoose aya daggan maanta oo Arbaco kaddib markii ay qaraxyo ka dhaceen shalay gallinkii dambe, kuwaasoo geystay khasaare isugu jira dhimasho iyo dhaawac.

Afhayeenka ciidamada Soomaalida ee ku sugan Jubbooyinka, Col. Aadan Axmed Xirsi (Rufle) ayaa saxaafadda u sheegay in laba qof oo rayid ah ay ku dhinteen shan qarax oo ka dhacay Kismaayo ayna ku dhaawacmeen dad shacab ah.

"Qarax ka dhacay bartamaha magaalada waxaa ku dhintay laba qof oo shacab ah, dhowr kalena way ku dhaawacmeen. Ma jirto khasaare ciidamada kasoo gaaray qaraxyadii dhacay," ayuu yiri Col. Aadan Rufle oo saxaafadda la hadlayay isagoo ku sugan Kismaayo.

Ciidamada dowladda, kuwa Kenya iyo xoogagga Raaskambooni ee la socda ayaa waxay saldhigyo ka sameysteen, garoonka diyaaradaha Kismaayo, dekedda, xarunta maamulka gobolka, saldhigga booliiska iyo goobo kale oo muhiim ah.

"Markii ciidamadu ay si buuxda ula wareegeen gacan ku haynta magaalada waxaan maqalnay qaraxyo waaweyn, waxay ahaayeen kuwo ka dhashay miinooyin halkaas lagu qariyay. Midda ugu weyn waxay ka dhacday dekedda, mana garanayno cid ay khasaare kasoo gaartay," ayuu saxaafadda u sheegay goobjooge Kismaayo ku sugan.

Goobjoogayaal kale oo Kismaayo ku sugan ayaa iyaguna sheegay inay xaaladdu tahay saakay mid aad u daggan, ayna gudaha magaalada ku sugan yihiin ciidamadii dowladda iyo kuwa caawinaya ee Kenya.

Magaalada Kismaayo oo muddo shan sano ay ka talinaysay Xarakada Al-shabaab ayaa waxay isaga baxeen Sabtidii lasoo dhaafay, kaddib markii culeysyo milateri ay kala kulmeen ciidamada Kenya iyo kuwa Soomaalida oo ka galay magaalada dhinaca xeebta badweynta Hindiya.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
10/3/2012 10:22 AM EST
Arbaco, Oktoobar 03, 2012 (HOL) — Dowladda Britain ayaa ku dhawaaqay inay 38-milyan oo Pound oo lacagta Ingiriiska ah ku caawinayso dowladda cusub ee Somalia si wax looga qabato dhinacyada ammaanka, horumarinta adeegyada bulshada iyo cadaaladda, kaddib markii wafdi ka socda dowladda Birtain ay Muqdisho kula kulmay madaxweynaha Soomaaliya, Xasan Sheekh Maxamuud.

10/3/2012 10:07 AM EST
Arbaco, Oktoobar 03, 2012 (HOL) — Oktoobar, 03, 2012 (HOL) -- Shirkada isgaarsiinta Hormuud ayaa ugu deeqday lacag dhan ilaa $100,000 doolar, dadkii ay dhibaatadu ka soo gaartay Fatahaadii ku dhufatay dhawaan magaalada Baladweyne ee xarunta gobolka Hiiraan.

10/3/2012 10:04 AM EST
Arbaco, Oktoobar 03, 2012 (HOL) — Guddoomiyaha baarlamaanka Soomaaliya, Prof. Maxamed Sheekh Cismaan Jawaari ayaa maanta kulan kula qaatay xarunta golaha shacabka ee Muqdisho in ka badan laba boqol oo xildhibaan oo ka mid ahaa xubnihii hore ee baarlamaankii waqtigiisu dhammaaday.

10/3/2012 8:11 AM EST
Arbaco, Oktoobar 03, 2012 (HOL) — Diyaarado dagaal ayaa lagu arkay iyagoo dul-heehaabaya maanta deegaanno ka tirsan degmada Xarardheere ee gobolka Mudug, halkaasoo la sheegay in kooxaha burcadbadeedda ah ay ku haystaan ajnabi ay ku haystaan afduub.

10/3/2012 3:45 AM EST
Arbaco, Oktoobar 03, 2012 (HOL) — Madaxweynaha dowladda Federaalka Soomaaliya, Xasan Sheekh Maxamuud ayaa ku jira wadatashiyo ku saabsan sidii uu kusoo magacaabi lahaa ra'iisul wasaaraha cusub ee Soomaaliya, iyadoo jagadan ay ku loolamayaan mas'uuliyiin fara badan oo uu ku jiro ra'iisul wasaaraha xilligiisu sii dhammaanayo.