8/8/2022
Today from Hiiraan Online:  _
Wararka Maanta- Khamiis, Oct 18, 2012
Madaxweynaha Soomaaliya oo sheegay inay la dagaalamayaan Xarakada Al-shabaab illaa inta ay ka Adkaanayaan
Khamiis, Oktoobar 18, 2012 (HOL) — Madaxweynaha Soomaaliya, Xasan Sheekh Maxamuud ayaa sheegay inay sii socon doonaan dagaallada ay ciidamada dowladda Soomaaliya kuwa AMISOM kula jiraan Al-shabaab inta kooxdan laga adkaanayo ama dalka oo dhan laga saarayo.


Xasan Sheeh ayaa hadalkan ka sheegay golaha baarlamaanka Soomaaliya oo uu shalay u akhriay khudbad uu codka kalsoonida ugu raadinayay ra'iisul wasaaraha cusub ee Soomaaliya si uu u soo dhiso xukuumad tayo leh oo wax ka qabata xaaladda uu dalku ku sugan yahay.

"Howgallada lagula dagaalamayo Al-shabaab ma joogsan doonaan illaa inta laga adkaanayo ama dalka oo dhan laga saarayo. Ciidamada dowladda iyo kuwa AMISOM ee caawinayana guulo ayay ka gaareen howgallada ay wadaan," ayuu yiri Xasan Sheekh.

Sidoo kale, madaxweynaha Soomaaliya, wuxuu sheegay in muddada uu xukunka dalka hayo ay la wareegeen deegaanno iyo degmooyin ay ku sugnaayeen xoogagga Al-shabaab, kuwaasoo ay booqasho ku tageen saraakiil ciidan iyo xildhibaanno ka tirsan baarlamaanka Soomaaliya.

“Xilligii koobnaa ee aan xafiiska joogay waxaa suurogal noo noqotay arrimo ay ka mid yihiin: sameynta miisaaniyaadda seddaxda bilood ee sannadka ka dhimman, xadididda kharashaadka ay dowladdu isticmaasho, in ciidamada dowladda la siiyo gunnooyinkoodii garaamaadkii ay lahaayeen," ayuu yiri madaxweynaha Soomaaliya.

Madaxweynuhu wuxuu sheegay in bixinta gunnooyinka ciidamada ay sababeen inay sii socdaan howgallada ay ciidamadu ku xoreynayaan gobollada iyo degmooyinka dalka ay kaga sugan yihiin xoogagga Al-shabaab isagoo si gaar ah u tilmaamay qabashadii magaalooyinka Kismaayo, Wanlaweyn iyo garoonka diyaaradaha Balli-Doogle.

Hadalkan madaxweynaha ayaa u muuqda mid ka horimaanaya hadal uu saxaafadda siiyay markii xilkan loo doortay, kaasoo uu ku sheegay inuu qorsheynayo inuu wadahadal la furo xoogagga Al-shabaab ee Soomaalida ah, isagoo isla xilligaas ugu baaqay dagaalyahannada ajnabiga ah ee la safan inay Soomaaliya isaga baxaan.

Ugu dambeyn, Xasan Sheekh wuxu sheegay inuu si wanaagswan ula shaqeynayo xukuumadda Soomaaliya, isla markaana uu ka fogaanayo wax walba oo khilaaf dhalin kara, isagoo sheegay inuu tixgelin gaar ah siin doono go'aannada ay soo saarto xukuumadda, inkastoo uu xusay in bani'aadamku aysan isku fikir noqon karin.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
10/18/2012 8:26 AM EST
Khamiis, Oktoobar 18, 2012 (HOL) — Ra'iisul wasaaraha Soomaaliya, Cabdi Faarax Shir-doon (Saacid) ayaa maanta si rasmi ah ula wareegay xafiiska shaqada, kaddib munaasabad lagu qabtay Madaxtooyada Soomaaliya, taasoo madaxweyne, Xasan Sheekh Maxamuud uu ka qaybgalay.

10/18/2012 8:06 AM EST
Khamiis, Oktoobar 18, 2012 (HOL) — Xildhibaannada baarlamaanka Soomaaliya ayaa dib u dhigay maanta ansixinta miinaasiyad loogu talogalay inay dowaddu ku shaqeyso bilaha ka haray sannadkan 2012, kaddib doodo adag oo ay xildhibaannadu ka yeesheen miisaaniyaddan.

10/18/2012 7:55 AM EST
Khamiis, Oktoobar 18, 2012 (HOL) — Khubaradii caalamiga ahaa ee ka socotay ururka EPAF ee Baadha xasuuqyadda caalamka ka dhaca, ayaa soo gabogabaysay xabaal-wadareedyado ay muddo bil ah ka baadhayeen koonfurta magaaladda Hargeysa, iyagoo qalfoofkii dadkaasi la laayey isku ururiyeen, isla markaana 38 qof oo ku jiray xabaashaasi qof walba xubnihii lafihiisa isku habeeyey si loo garto cida uu yahay iyo eheladoodda.

10/18/2012 7:53 AM EST
Khamiis, Oktoobar 18, 2012 (HOL) — Madaxweynaha Somaliland Axmed Maxamed Maxamuud (Siilaanyo), ayaa xadhiga ka jaray balaadhinta baahintii Idaacada Radio Hargeysa oo lagu rakibay War-laliye weyn oo dunida laga dhagaysan doono, kaas oo wax ka tari doona baahidda loo qabay dhagaysiga Idaacadda Radio Hargeysa oo labaatankii sanadood ee u dambeeyey aan dhaafin dhagaysigeeddu magaaladda Hargeysa iyo agagaarkeedda.

10/18/2012 7:52 AM EST
Khamiis, Oktoobar 18, 2012 (HOL) — Shirkada Xawaaladda Ammaana oo maalmihii ugu dambeeyayba si weyn ugu mashquulsaneyd caawinta dadkii ay dhibaatadu ka soo gaartay fatahaadii dhawaan ku dhuftay magaalada Baladweyne ayaa deeqo kala duwan gaarsiisay dad ku dhibaateysan magaalada Baladweyne iyo goobaha ku dhow-dhow.

10/18/2012 6:45 AM EST
Khamiis, Oktoobar 18, 2012 (HOL) — Wafdi ka socda urur goboleedka IGAD ayaa maanta gaaray magaalada Kismaayo ee xarunta gobolka Jubada hoose, halkaasoo ay si diirran ugu soo dhaweeyeen masuuliyiinta ka tirsan dowladda Soomaaliya iyo kuwa Raaskaambooni ee ku sugan magaaladaasi.

10/18/2012 6:43 AM EST
Khamiis, Oktoobar 18, 2012 (HOL) — Dhallinyaro tiradoodu gaarayso 200 oo ka kala yimid degmada Marko iyo deegaanno ku dhow-dhow ayaa markii ugu horreysay loogu qabtay maanta degmada Marko kulan wacyi-gelin ah.

10/18/2012 3:59 AM EST
Khamiis, Oktoobar 18, 2012 (HOL) — Dalbley ku hubeysan bastoolado ayaa saakay si gaadmo ah ugu dilay xaafadda Jiiro-maskiin ee degmada Wadajir guddoomiye waaxeed lagu magacaabo jiray, Burus, iyadoo kooxihii dilkiisa geystay ay goobta ka baxsadeen.

10/18/2012 2:38 AM EST
Khamiis, Oktoobar 18, 2012 (HOL) — Xildhibaannad baarlamaanka Soomaaliya ayaa kulan ay maanta ku yeelanayaan xarunta golaha shacabka kaasoo ay kaga doodayaan miisaaniyadda ay dowladdu ku shaqeynayso saddexda bilood ee soo socota.

10/18/2012 2:37 AM EST
Khamiis, Oktoobar 18, 2012 (HOL) — Xukuumadda Masar ayaa diiday inay dalkeeda galaan Soomaali kasoo carartay dagaallada ka socda dalka Suuriya, kaddib markii ay ka dageen garoonka diyaaradaha ee Masar shalay oo Arbaco ahayd iyadoo wata dal-ku-gal ama fiisooyin sharci ah.