8/18/2022
Today from Hiiraan Online:  _
Wararka Maanta- Isniin, Oct 1 , 2012
Askar ka tirsan Ciidamada Ammaanka Kenya oo xalay lagu toogtay Magaalada Garissa ee Gobolka Waqooyi-bari Kenya
Isniin, Oktoobar 01, 2012 (HOL) — Kooxo hubeysan ayaa xalay ku dilay magaalada Gaarisa oo ah xarunta gobolka Waqooyi-bari ee dalka Kenya laba askari oo ka tirsan ciidamada ammaanka Kenya, iyagoo ay u suurogashay inay ka baxsadaan goobta markii ay dilka askarta fuliyeen.

Goobjoogayaal ku sugan Gaarisa ayaa sheegay in askarta lagu toogtay bartamaha magaalada xilli ay howlahooda ku gudo jireen, iyadoo kooxaha dilka geystay ay ka qaateen askarta qoryihii ay wateen, inkastoo goor dambe ay booliisku heleen.

"Labadan askari madaxa ayaa laga toogtay wayna geeriyoodeen. Ma garan karno cidda dilkooda ka dambeysa balse waxaa socda baaritaanno," ayuu laga soo xigtay guddoomiyaha degmada Gaarisa.

Taliye ku xigeenka booliiska magaalada Gaarisa, Herman Ndiema ayaa warbaahinta u sheegay in weerarka lagu dilay ciidamada booliiska ay uga shakisan yihiin xubno Al-shabaab xiriir la leh.

"Weerarka lagu dilay labada askari ee booliiska Kenya ka tirsan waxaa fuliyay xubno Al-shabaab ka tirsan, waxaana socda baaritaanno lagu doonayo in lagu soo helo," ayuu yiri Ndiema oo intaas ku daray inay u suurogashay inay isla xalay soo helaan qoryihii laga furtay askarta la dilay.

Dhanka kale, afhayeenka booliiska Kenya, Charles Owino ayaa isaguna sheegay inay dhowr qof u qabqabteen qarax bambaano oo shalay lagu weeraray Kaniisad ku taalla magaalada Nairobi, taasoo uu ku dhintay wiil sagaal jir ah, dhowr caruur ahna ay ku dhaawacmeen.

"Weerarka wuxuu ahaa mid ay Al-shabaab ka dambeysay, waxaana fulinay xubno u jooga Kenya. Dad badan ayaa weerarkan loo qabqabtay baaritaanno ayaana ku socda," ayuu yiri Owino.

Xarakada Al-shabaab ayaan weli ka hadlin weerarrada ka dhacay Gaarisa iyo Nairobi, iyadoo weerarradan ay imaanayaan xilli ay ciidamada Kenya qarka u saaran yihiin inay gudaha u galaan magaalada Kismaayo ee gobolka Jubbada Hoose.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
10/1/2012 10:31 AM EST
Isniin, October, 01, 2012 (HOL)- Alla ha u naxariistee waxa xalay dalka Norway ku geeriyooday abwaankii caanka ahaa Maxamed Xaashi Dhaamac Gaariye oo billihii u dambeeyey ku xanuunsanayey dalkaasi.

10/1/2012 9:51 AM EST
Isniin, Oktoobar 01, 2012 (HOL) — Taliyaha hay'adda nabadsugidda gobolka Banaadir, Col. Axmed Ereg ayaa sheegay in ammaanka Muqdisho ay adkeeyeen kadidb markii ay howlgallo isdaba-joog ah ka sameeyeen degmooyinka gobolka Banaadir.

10/1/2012 8:31 AM EST
Isniin, Oktoobar 01, 2012 (HOL) — Ciidamada dowladda Federaalka Soomaaliya, kuwa Raaskaambooni iyo Militariga Kenya oo isgarabsanaya ayaa goordhawayd gudaha u galay magaalada Kismaayo iyadoona ay ciidamadu magaalada kasoo galeen dhowr jiho.

10/1/2012 8:21 AM EST
Isniin, Oktoobar 01, 2012 (HOL) — Kooxo bastoolado ku hubeysan ayaa goor-dhaw ku toogtay magaalada Baladweyne ee xarunta gobolka Hiiraan nabadoon caan ka ahaa Baladweyne.

10/1/2012 6:53 AM EST
Isniin, Oktoobar 01, 2012 (HOL) — Ciidamada dowladda KMG iyo kuwa Kenya ayaa maalintii sedexaad ku sugan daafaha magaalada Kismaayo, iyadoona ay arintaasi keentay in dhaqdhaqaaqii ganacsi ee magaalada Kismaayo iyo deegaanada ku xeeran uu hakad galo.

10/1/2012 6:49 AM EST
Isniin, Oktoobar 01, 2012 (HOL) — Kaddib markii ay ciidamada dowladda Itoobiya iyo AMISOM ee ka socda dalka Jabuuti ka baxeen saldhigyadii ay ka daganaayeen magaalada Baladweyne, waxaa arintaa ka hadllay mas’uuliyiinta maamulka gobolka Hiiraan.

10/1/2012 4:17 AM EST
Isniin, Oktoobar 01, 2012 (HOL) — Afhayeenka baarlamaanka Soomaaliya, Maxamed Sheekh Cismaan Jawaari ayaa sheegay in ajnadaha ugu horreeya ee baarlamaanku uu ka doodi doono uu yahay dastuurka cusub ee Soomaaliya, isagoo sheegay inay dib u eegis ay ku sameyn doonaan qodobbada dastuurka oo dhan.

10/1/2012 3:12 AM EST
Isniin, Oktoobar 01, 2012 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo oo xildhibaanno ah ayaa u dhoofay magaalada Baydhabo ee gobolka Bay halkaasoo ay maanta kulammo kula yeelanayana maamulka gobolka, kan degmada iyo saraakiisha ciidamada dowladda Soomaaliya, kuwa Itoobiya iyo AMISOM ee ka socda dalalka Uganda iyo Burundi.