3/19/2024
Today from Hiiraan Online:  _
Wararka Maanta- Talaado, May 29, 2012
Faahfaahin Dheeraad ah oo kasoo baxeysa duqeyntii saakay ka dhacday Magaalada Kismaayo ee Gobolka Jubbada Hoose

Talaado, May 29, 2012 (HOL) — Faahfaahin dheerad ah ayaa kasoo baxeyso khasaaraha ka dhashay duqeyntii saaka ay maraakiibta dagaal ka geysteen magaalada Kismaayo ee xarunta Gobolka Jubada Hoose.

Illaa hadda inta la xaqiijiyay hal qof ayaa ku dhintay qof kale oo haweeney ahna dhaawac ayaa kasoo gaaray, iyadoona sidoo kale lagu soo waramayo in ay jiraan dhismayaal uu burbur kasoo gaaray duqeyntii saaka.

Qofka geeriyooday iyo kan dhaawacmay ayaa ahaa wiil iyo hooyadii oo uu gantaal kusoo dhacay xilli ay ku sugnaayeen gurigooda, waxaana dhintay wiilkii yaraa, halka uu dhaawac soo gaaray hooyadii cunuga dhashay, waxaana dhaawaca maamada lagu daweeynayaa isbitalka guud ee magaalada Kismaayo.

Qaar kamid ah dadka ku dhaqan magaalad Kismaayo oo HOL u waramay ayaa sheegay in maraakiibta wax duqeeysay ay ahaayeen ilaa shan markab, iyagoona intaa ku daray in duqeynta ay bilaabatay kadib markii dagaalyahanno katirsan Al-shabaab ay gantaallo ku tuureen maraakiibtan oo ku sugnayd meel ku dhow xeebta Kismaayo, waxayna taasi keentay in Maraakiibta oo ahayd nooca dagaalka ay Gantaallo ku asqeeyaan magaalada.

Warar hoose ayaa sheegaya in maraakiibtani ay mudooyinkii u danbeeyay ku sugnaayeen xeebta gobolka Jubada Hoose, islamarkaasina ay ilaalo ka hayeen dhaqdhaqaaq dhinaca badda ee gobollada Jubooyinka.

Maraakiibta duqeynta geeysatay ayaa haatan ku sugan meel aan sidaa uga fogeyn magaalada Kismaayo, waxaana weli jirta cabsi ay qabaan dadka ku dhaqan magaalada, taasoo ah in maraakiibtu ay markale duqeymo ka bilaabaan magaalada Kismaayo.

Xasan Nuur, Hiiraan Online
[email protected]
Kismaayo, Soomaaliya













Click here
5/29/2012 6:34 PM EST
Istanbul, May 29, 2012-----Ra’iisul Wasaaraha Soomaaliya Dr. Cabdiweli Maxamed Cali Gaas iyo wefdi ballaaran oo uu hogaaminayo ayaa maanta gelinkii dambe soo gaaray magaalada Istanbul ee caasimadda labaad ee dalka Turkiga halkaasoo si diiran loogu soo dhoweeyey.

5/29/2012 3:46 PM EST
Talaado, May 29, 2012(HOL):Maraakiibtii dagaal ee ku sugnayd xeebta magaalada Kismaayo ayaa caawa markale duqeymo ka bilowday magaalada, iyadoona gantaalada ay maraakiibta tuurayaan ay ku dhacayaan xaafadaha kala duwan ee degmada Kismaayo.

5/29/2012 9:21 AM EST
Talaado, May 29, 2012 (HOL) — Waxaa lagu wadaa in maalinta bari ah soo gaaraan magaalada Beledweyne ciidamo ka socda dowladda dalka Jabuuti, kuwaasoo qeyb ka ah howlgalka AMISOM ee dalka Soomaaliya.

5/29/2012 9:13 AM EST
Waxaa May 26 - 28, 2012 ka furmey magaalada Blaine ee Gobolka Minnesota USA koobka lagu magacaabo National Sports Center Cup ( NSC Cup) . Koobkan oo ah kii 20-aad ee Midwest's premier Memorial Day tournament gaar ahaan kubadda Cagta ( NSC Cup Soccer Tournament ) ayaa inta badan waxaa Tartan ku dhexmaraa Iskuuladda isugu soo hara ama soo gaara Cayaaraha kama danbeysta ah (Semi-Finals) .

5/29/2012 9:02 AM EST
Talaado, May 29, 2012 (HOL) — Maxkamadda sare ee somaliland, ayaa maanta go’aan ka gaadhay khilaafkii u dhexeeyey labadda garab ee xisbiga mucaaradka ah ee UDUB u kala jabay,waxaanay ayideen go’aankii guddidda diiwaangelinta ururadda Siyaasaddu ka soo saareen laba liis oo labadda garab u soo kala gudbiyeen, iyagoo qaatay liiska garabka uu hogaaminayo gudoomiyaha xisbiga UDUB Mr:Daahir Rayaale Kaahin.

5/29/2012 8:11 AM EST
Talaado, May 29, 2012 (HOL) — Labadan ruux oo midkood uu mayd ahaa ayaa lagu soo bandhigay gudaha suuqa Bakaaraha ee magaalada Muqdisho iyadoo saraakiisha dowladda ee halkaas ka hadlay ay sheegeen in midka maydka ah uu isku dayay inuu baxsado ciidamaduna ay toogteen.

5/29/2012 7:02 AM EST
Talaado, May 29, 2012 (HOL) — Maxkamadda gobolka Banaadir ayaa maanta ku ridday xukunno isugu jira dil toogasho ah iyo xabsi u dhexeeya hal sano illaa shan sano, eedeysanayaan dambiyo kala duwan loo haystay.

5/29/2012 6:49 AM EST
Talaado, May 29, 2012 (HOL) — Madaxweynaha Soomaaliya, Sheekh Shariif Sheekh Axmed iyo wafdi uu hoggaaminayo ayaa maanta booqasho ku tagay degmada Afgooye ee gobolka Shabeellada hoose oo ciidamada DKMG ah iyo kuwa AMISOM ay kala wareegeen Jimcihii Al-shabaab, inkastoo markii ay Afgooye kasoo laabteen ay kula kulmeen inta u dhexeysa Ceelasha iyo Calamada weerar ay kusoo qaadeen xoogag taabacsan Al-shabaab.

5/29/2012 6:24 AM EST
Talaado, May 29, 2012(HOL): Shirkii odayaasha dhaqanka iyo ururada Bulshada Rayidka ah ayaa si habsami leh uga soconaya magaalada Istanbuul ee dalka Turkiga halkaasoo ay ku shirsan yihiin ku dhowaad 400 oo ergooyin kala matalaya qeybaha Bulshada Rayidka, Qurba joogta, Odayaasha dhaqanka, Culimaa’udiinka, waxgaradka iyo dowladda KMG ah ee Soomaaliya.

5/29/2012 3:18 AM EST
Talaado, May 29, 2012 (HOL) — Dowladda Soomaaliya iyo Xarakada Al-shabaab ayaa guulo ka kala sheegtay weerarro ka dhacay inta u dhexeysa Muqdisho iyo Afgooye, halkaasoo ay maalmo ka hor ciidamada dowladdu iyo kuwa AMISOM kula wareegeen dagaal saddex maalmood socday.

5/29/2012 3:00 AM EST
Talaado, May 29, 2012 (HOL) — Booliiska Denmark ayaa sheegay inay xireen laba qof oo Soomaali ah, kuwaasoo haysata dhalashada dalkooda, kuwaasoo ay ku eedeeyeen inay qorsheynayeen qaraxyo argagaxiso oo ay dalkaas ka geystaan.

5/29/2012 2:35 AM EST
Talaado, May 29, 2012 (HOL) — Maraakiib nooca dagaalka oo aan ilaa imika la garaneyn cida iska leh ayaa saaka duqeymo ba'an ku wada Magaalada Kismaayo ee xarunta gobolka Jubada Hoose, iyadoona duqeymahaasi ay sababeen qasaarooyin lixaad leh.

5/29/2012 2:26 AM EST
Talaado, May 29, 2012 (HOL) — Ra'iisul wasaaraha dalka Kenya, Raila Odinga oo ka hadlay qaraxii shalay ka dhacay magaalada Nairobi ee dhaawacay 35-ka qof ayaa sheegay inuu ahaa mid ka dhashay weerar bambaano oo Kenya lagu soo qaaday.