11/12/2018
Today from Hiiraan Online:  _
Wararka Maanta- Talaado, May 1 , 2012
Afhayeenka Dowladda KMG Soomaaliya oo ku tilmaamay Qas-wadayaal dadka kasoo horjeeda dastuurka sheegay in tallaabo laga qaadi doono


Talaado, May 01, 2012 (HOL) — Afhayeenka xukuumadda KMG ah ee Soomaaliya ahna la-taliyaha ra’iisul wasaaraha Soomaaliya, Inj. C/ramxaan Cumar Cismaan (Yariisow) oo si kulul uga jawaabay hadallo kasoo yeeray kooxo uu ku tilmaamay qaswadayaal kuwasoo uu sheegay inay maalmahan bulshada Muqdishu ku kiciyaan hab beel iyagoo si khalad ah ugu fasiraya qabyo-qoraalka-dastuurka.

Inj. Yarisow ayaa sheegay in dowladda KMG ah iyo beesha caalamka ay ka go'an tahay in kooxaha qas-wadayaasha ah ee sida bareerka ah uga soo horjeeda in laga gudbo xilliga KMG ah oo la helo isbedel dhab ah oo shacabka u keena horumar iyo maamul wanaag in lagu dari doono liiska qas-wadayaasha, taasoo keeni karta in lagu soo rogo cunno-qabateyn, isla markaana la hor-geeyo maxkamadda caalamiga ah.

"Beryahan waxaa Muqdisho isku abaabulayay kooxo doonaya in xaaladihii murugada lahaa ee laga soo gudbay ay shacabka Soomaaliyeed dib-ugu celiyaan iyadoo ay shacabku heleen amni iyo nabad, sidoo kalena ay dib-u-dhis xoog leh ka wadaan Muqdisho si ay u soo celiyaan bilicdii iyo rajadii caasimadda.

Afhayeenka xukuumadda KMG ah wuxuu sheegay in shacabku aysan diyaar u ahayn in dib loo noqdo dhibaatadii laga soo gudbay, isagoo ku eedeeyay in kooxaha kasoo horjeeda dastuurka ay diiddan yihiin isbedel iyo in la ansixiyo dastuurka sidoo kalena aysan doonayn in la helo dowlad rasmi ah oo ku dhaqanta shareecada Islaamka iyo maamul wanaag.

Inj. Yariisow wuxuu sheegay in 23-kii Febraayo ee sannadkan ay Hillary Clinton sheegtay in qas-wadayaasha isku-dayaya inay is-hortaagaan barnaamijka xilliga kala guurka ah in caalamku uu kusoo rogayo cunaqabateen, sidoo kale Qaramada Midoobay iyo Midowga Afrika in badan ayay sheegeen buu yiri inaan marna la aqbali karin in kooxo ama shaqsiyaadka caqabadda ku noqda horumarka, nabadeynta iyo xasilinta dalka.

Sidoo kale, afhayeenku wuxuu sheegay in kooxahan ay caadeysteen inay si khaldan u sharaxaan qabyo-qoraalka-dastuurka ayna ujeeddadoodu tahay inaan la ansixin dastuurka.

"Dastuurku waxuu ku ansixi karaa oo kaliya afdi dadweyne, shaqsi walbana wuxuu heli doonaa fursad uu ku sameeyo isbedel, ku daris iyo ka dhimis. kooxdan iyagoon akhrisan dastuurka ayay ayay ka been abuurayaan qodobbada arrimaha dastuurka sida jinsiyada iyo diinta. Qabyo-qoraalka dastuurka ayaa sheegaya dhanka jinsiyada sidan: (Shacbiga Soomaaliyeed waa mid lamana kala qeybin karo, waxuuna ka kooban yahay dhammaan muwaadiniinta. Jinsiyadd Soomaaliyeed waa mid qur ah, sharci gaar ah ayaana xaddidaya sida lagu helayo, lagu laalayo ama lagu waayayo. Qof leh jinisyadda Soomaaliyeed lagama qaadi karo jinisiyadiisa, xitaa hadduu qaato jinsiyad dal kale. Diidmada, laalista iyo ka qaadista jinsiyadda laguma xiri karo arrimo siyaasadeed," ayuu yiri Inj. Yariisow.

Afhayeenka oo hadalkiisa sii wata ayaa yiri: "Dastuurku wuxuu dhina diinta ka yiri sidan: "Dastuurka Soomaaliya waxaa saldhig u ah Qur’aanka Kariimka iyo Sunnada Nabigeenna Muxammed (NNK), waxuuna ilaalinayaa maqaasidda (ujeeddooyinka) shareecada iyo caddaaladda bulshada. Soomaaliya waa dal Islaam ah, kana mid ah ummadaha Afrika iyo Carabta. Islaamka waa diinta dowladda. Diin aan ahayn diinta Islaamka laguma faafin karo dalka."

Ugu dambeyn, afhayeenku wuxuu sheegay in sababaha keenaya in kooxahan ay been-abuur cad ka sheegaan dastuurka ay tahay iyagoo diiddan in isbedel dhaco rabana inay sii-joogaan oo ay sidii hore Soomaaliya kusoo noqoto sida collaado, dagaallo iyo amni-darro waarta.

Dowladda iyo shacabka Soomaaliyeed waxaa ka go’an inay sii xoojiyaan horumarka ballaaran ee dhan walba ah isla markaana lasoo afjaro xilliga kala guurka ah bisha Ogoosto si loo helo dowlad caadil ah oo karti iyo hufnaan leh, awoodna u leh inay dalka u horseeddo midnimo, walaaltinimo, horumar iyo barwaaqo.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/1/2012 4:14 PM EST
Talaado, May 01, 2012(HOL): Qaraxan oo ay ku dhinteen Xildhibaan Yuusuf Mire Maxamuud Seeraar iyo Xildhibaan C/weli Shiikh Maxamed Aw-MaxamuudMaxamuud oo Baarlamaanka Soomaaliya ka tirsan, waxaana qaraxaas ku dhaawacmay Siyaasiga Axmed C/salaam Xaaji Aadan oo horay uga soo noqday Ra’iisal Wasaare ku xigeen iyo Xildhibaanno ay ka mid yihiin Xildhibaan Xuseen Samatar iyo Xildhibaan C/risaaq Isaaq Biixi.

5/1/2012 4:11 PM EST
Talaado,May 1, 2012 (HOL)- Madaxweyne ku xigeenka Somaliland Md:Cabdiraxmaan Cabdilaahi Ismaaciil (Saylici) ayaa kulan la yeeshay madax dhaqameedka Somaliland, kuwaas oo ka kala yimid goboladda Somaliland.

5/1/2012 10:35 AM EST
Talaado, May 01, 2012 (HOL) — Ugu yaraan saddex oo uu ku jiro nin ganacsade ah oo gaadiidka iibiya iyo ayaa ku dhintay qarax gallinkii dambe ee maanta ka dhacay jidka isku xiragaroonka isgoyska KM4 iyo garoonka diyaaradaha Muqdisho.

5/1/2012 10:17 AM EST
Talaado, May 01, 2012(HOL): Qarax is-miidaamin ah ayaa goor dhaweyd ka dhacay magaalada Dhuusamareeb ee bartamaha Soomaaliya.

5/1/2012 8:38 AM EST
Talaado, May 01, 2012 (HOL) — Ururka Midowga Afrika, Qaramada Midoobay iyo urur goboleedka IGAD ayaa warsaxaafadeed ay si wadajir ah u soo saareen maanta oo Talaado ah waxay digniin ugu jeediyeen kooxaha kasoo horjeeda dhameystirka Roadmap-ka iyo in laga gudbo xilliga KMG ah.

5/1/2012 8:11 AM EST
Talaado, May 01, 2012 (HOL) — Diyaarad maanta kasoo qaadi lahayd Degmada Doolow ee gGedo odayaal ka qayb-geli lahaa shirka lagu ansixinayo dastuurka cusub ee Soomaaliya oo Muqdisho ka dhici doona ayaa lagu rasaaseeyay, sida ay sheegeen mas'uuliyiinta dowladda ee gobolka Gedo.

5/1/2012 7:58 AM EST
Talaado, May 01, 2012 (HOL) — Samiira Xaashi oo ah gabar Soomaaliyeed oo 21-jir ah kuna noo dalka Britain oo ay dharka ka xayeysiiso ayaa Muqdisho dhawaan soo booqatay iyadoo ka sheekeysay dhibaatooyinkii ay ku aragtay, gaar ahaan dhibka haysta haweenka Soomaaliyeed ee barakacayaasha ah.

5/1/2012 7:10 AM EST
Talaado, May 01, 2012 (HOL) — Ururaddii siyaasaddda Somaliland ee qiimeyntii ku hadhay oo maanta qorshaynayey inay mudaharaad balaadhan ka dhigaan magaalooyinka ayaanay u dhicin siday rabeen, maadaama oo awood ciidan loo adeegsaday, isla markaana goobihii ay filayeen in ay iskugu yimaadaan ciidamo badan la dhigay.

5/1/2012 3:59 AM EST
Talaado, May 01, 2012 (HOL) — Xildhibaan Muuse Suudi Yalaxoow oo ka mid ah waxgaradka iyo xildhibaanno ku shiray Muqdisho kana soo horjeestay dastuurka cusub ee Soomaaliya ayaa sheegay inaysan aqbalayn dastuurka.

5/1/2012 3:39 AM EST
Talaado, May 01, 2012 (HOL) — Ururka dhalinyarada SYL II ayaa siminaar bileedkii koowaad u qabtay illaa iyo 500 oo arday ah oo ka kala tirsan qaybaha kala duwan ee ururku uu baro xirfadaha kala duwan, waxaana goobjoog ka ahaa macalimiinta, marti sharaf kale iyo masuuliyiinta SYL II.

5/1/2012 3:19 AM EST
Talaado, May 01, 2012 (HOL) — Ugu yaraan 11-qof oo dhinacyadii dagaalamay iyo shacab isugu jira ayaa ku dhintay dagaal xalay gudaha degmada Xudur ee xarunta gobolka Bakool ku dhexmaray ciidamada DKMG ah oo garabsanaya kuwa Itoobiya iyo xoogagga Al-shabaab.

5/1/2012 3:03 AM EST
Talaado, May 01, 2012 (HOL) — Danjirihii Soomaaliya u fadhiyay dalka Yemen Allaha u naxariisteen, Axmed Aadan Cismaan ayaa xalay ku geeriyooday isbitaal ku yaalla magaalada Sanca ee xarunta dalka Yemen, isagoo u geeriyooday xanuun ka asiibay beerka.