3/28/2024
Today from Hiiraan Online:  _
Wararka Maanta- Isniin, July 16, 2012
Ra'iisul Wasaaraha Xukuumadda Soomaaliya oo sheegay in Marxaladda kala guurka ay heer gabo-gabo ah marayso
Isniin, July 16, 2012 (HOL) — Ra'iisul wasaaraha xukuumadda Soomaaliya, C/wali Maxamed Cali ayaa sheegay inay heer gabo-gabo ah marayaan howlaha looga gudbayo xilliga KMG ah ee Soomaaliya, isagoo sheegay inuu rajo wanaagsan ka qabo in howshan ay ku dhammaanto xilligii loo qabtay.

Xukuumadda KMG ah ayaa wuxuu waqtigeedu ku eg-yahay 20-ka bisha Ogoosto ee soo socota taasoo ay naga xigto muddo 35-maalmood ah, iyadoo ra'iisul wasaaruhu ku adkeystay inaysan filayn inay dib uga dhacaan waqtigaas.

"Heshiiska Roadmap-ka wuxuu ahaa bilowga qorshaha kala guurka ee dalka looga saarayo KMG-nimada, qodobbada uu heshiiskan ka kooban yahay guulo la taaban karo ayaa laga gaaray," ayuu yiri ra'iisul wasaaraha Soomaaliya.

Sidoo kale, ra'iisul wasaaruhu wuxuu sheegay in dastuurka ay soo gabgabeyn doonaan maalmaha soo socda, isagoo xusay in odayaasha dhaqanka ay maalmaha soo socda kusoo gudbin doonaan liiska ergooyinka laga sugayo.

"Bishan 19-keeda ayaan rajeynaynaa in lasoo gudbiyo liiska ergada, waxaana 21-ka isla bishan furmi doona shirka... haddii la helo 180-xubnood waa furmi karaa shirku, muddo todobaad ayuu soconayaa," ayuu ra'iisul wasaaruhu hadalkiisa ku daray.

Ansixinta dastuurka kaddib ayuu ra'iisul wasaaruhu sheegay in lasoo xuli doono xildhibaannada cusub ee baarlamaanka kuwaasoo bedeli doona kuwa hadda jira, isagoo xusay in odayaashu ay garanayaan xubnaha ay soo xulayaan.

"Markii lasoo xulo xildhibaannada baarlamaanka cusub waxay dooran doonaan afhayeenka iyo ku xigeennadiisa, waxaana raaci doonta doorashada madaxweynaha cusub ee Soomaaliya," ayuu yiri ra'iisul wasaaraha Soomaaliya.

Inkastoo uu dib u dhac ku yimid shirka odayaasha, ayna jiraan muranno ku saabsan dhinaca dastuurka oo ay odayaashu qabaan in qaar ka mid ah qodobbadiisa la saxo ayaa haddana madaxda dowladda KMG ah waxay ku adkeysanayaan in 20-ka bisha Ogoosto ee sannadkan lasoo afjaro xilliga KMG ah ayna Soomaaliya marxalad cusub gasho.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
7/16/2012 1:29 PM EST
Isniin, July 16, 2012 (HOL) - Waxaa maanta albaabada loo laabay in badan oo kamid ah goobaha ganacsiga ee magaalada Boosaaso, oo iyadu ah xarunta ganacsiga iyo dhaqaalaha ee dowlad goboleedka Puntland.

7/16/2012 9:47 AM EST
Isniin, July 16, 2012 (HOL) — Kooxo sita labiska ciidamada DKMG ah ee Soomaaliya ayaa xalay ku toogtay degmada Afgooye ganacsade iyo wiil uu dhalay oo lagu kala magacaabi jiray, Cismaan Axmed Xuseen iyo wiilkiisa Maxamed Cismaan Axmed, kaddib markii ay ku weerareen dukaankooda oo ku yaala bartamaha degmadaas.

7/16/2012 9:45 AM EST
Isniin, July 16, 2012 (HOL) - Ra'iisul wasaarihii hore ee Soomaaliya Maxamed C/laahi Farmaajo ayaa si deggan uga jawaabay warbixintii qaramada midoobay ay soo saartay ee qaar kamid hogaamiyayaasha dawlada ku eedaysay musuqmaasuq iyo lunsashada hantida qaranka.

7/16/2012 8:37 AM EST
Isniin, July 16, 2012 (HOL) — Madaxweyne ku xigeenka Somaliland Md: Cabdiraxmaan Cabdilaahi Ismaaciil (Saylici) oo safar xaqiiqo raadis ah u tagay goboladda galbeedka Somaliland ee abaaruhu aad u dhibaateeyeen, kuwaas oo dad iyo duunyaba saamaysay, waxaanu caalamka iyo bulshadda ku booriyey inay gurmad u fidiyaan dadkaasi.

7/16/2012 8:31 AM EST
Isniin, July 16, 2012 (HOL) — Xarakada Al-shabaab ayaa maanta sheegtay inay difaacaynayso magaalada Kismaayo ee gobolka Jubbada hoose, halkaasoo ay ku wajahan yihiin ciidamada Kenya ee ka mid noqday AMISOM, kuwa Dowladda KMG ah iyo xoogagga Raaskambooni.

7/16/2012 8:11 AM EST
Isniin, July 16, 2012 (HOL) — Dowladda Soomaaliya ayaa maamul cusub maanta u magacowday gobolka Galguduud ee bartamaha Soomaaliya oo ay ka kala taliyaan Ururrada Ahlusunna Waljmaaaca iyo Xarakada Al-shabaab.

7/16/2012 8:09 AM EST
Isniin, July 16, 2012 (HOL) — Ra'iisul wasaaraha Itoobiya, Meles Zenawi ayaan ka qaybgalay shirka madaxda ururka Midowga Afrika uga socda Addis Ababa, iyadoo ay ilo wareedyo hoose sheegayaan inuu aad u xanuunsan yahay.

7/16/2012 6:33 AM EST
Isniin, July 16, 2012 (HOL) — Maxamuud Cabdi Ibraahim (Garweyne) oo ka mid ahaa xildhibaannada baarlamaanka Soomaaliya horayna u soo noqday wasiir ayaa ku dhintay qarax maanta oo Isniin ah ka dhacay degmada Xamar-weyne ee gobolka Banaadir; iyadoo qaraxaas ay ku dhaawacmeen sideed qof oo laba ka mid ah ay la saarnaayeen gaariga.

7/16/2012 3:55 AM EST
Isniin, July 16, 2012 (HOL) — Dhallinyaro Soomaaliyeed oo ay xabsi ku hayaan koox malleeshiyo ah oo gacanta ku haysa magaalada Misraata ee dalka Liibiya ayaa ka cabanaya dhibaatooyin lagu hayo.

7/16/2012 3:35 AM EST
Isniin, July 16, 2012 (HOL) — Madaxda ururka Midowga Afrika ayaa xalay u doortay in haweeney ay markii ugu horreysay hoggaamiso ururka Midowga Afrika, taasoo ah wasiirradda arrimaha gudaha ee dalka Koonfur Afrika, Nkosazana Dlamini-Zuma oo dhowr wareeg oo doorasho ah kaga guleysatay hoggaamiyihii Midowga Afrika, Jean Ping oo u dhashay dalka Gaaboon.