9/23/2019
Today from Hiiraan Online:  _
Wararka Maanta- Arbaco, July 11, 2012
Dowladda KMG Soomaaliya iyo Xarakada Al-shabaab oo guulo ka kala sheegtay dagaal xalay ku dhexmaray Muqdisho


Arbaco, July 11, 2012 (HOL) — Dowladda KMG ah iyo Xarakada Al-shabaab ayaa guulo ka kala sheegtay dagaal xalay ku dhexmaray degmada Yaaqshiid ee gobolka Banaadir, iyadoo aysan jirin warar sugan oo ku saabsan khasaaraha ka dhashay dagaalkaas inta uu le'eg tahay.

Taliyaha ciidamada nabadsugidda gobolka Banaadir, Col. Khaliif Axmed Ereg oo ka hadlay dagaalkaas ayaa sheegay in Al-shabaab ay isku dayday inay weerarto saldhig ay ciidamada nabadsugiddu ku lahaayeen balse laga warhelay taasna ay keentay in iyaga lagu weeraro meel ka saldhigga.

"Ma jiraan wax khasaare ah oo dhankeenna nasoo gaaray, dhankooda khasaare kala duwan ayaa gaaray, waxaana helnay hub kala duwan oo qaarkiis ay guryo ku aaseen," ayuu yiri Col. Ereg.

Xarakada Al-shabaab ayaa iyaduna sheegay in weerar ay ku qaadday saldhig ay ciidamada dowadda KMG ah ku lahaayeen degmada Yaaqshiid ay khasaare xooggan ku gaarsiiyeen ciidamada dowladda sidoo kalena ay qabsadeen saldhigga.

"Mujaahidiintu waxay xalay ku takbiirsadeen saldhig ay maleeshiyada dowladdu ku lahaayeen degmada Yaaqshiid, halkaasna waxaa lagu dilay dhowr iyaga ka mid ah," ayuu yiri afhayeen u hadlay Al-shabaab.

Afhayeenku wuxuu hadalkiisa ku daray inaysan jirin khasaare dhankooda soo gaaray ayna xoogaggoodu dib uga baxeen halkaas markii ay ka gaareen ujeedkii ay ka lahaayeen, isagoo aan sheegin halka ay dagaalyahannadoodu aadeen.

Ma jiraan ilo madaxbannaan oo xaqiijinaya khasaaraha ka dhashay dagaalkaas oo ahaa mid laga maqlay degmooyinka dhinaca waqooyi ee Muqdisho ku yaala, iyadoo dagaalkan uu imaanayo xilli ay ciidamada dowladda iyo kuwa AMISOM howgallo lagu soo qabqaabtay boqolaal qof ay ka sameeyeen degmooyin ay Yaaqshiid ku jirto.

Dhanka kale, hay'adda nabadsugidda DKMG ah ayaa sheegtay in ciidamadoodu ay heleen hub lagu aasay guryo ku yaalla deegaanka Ceelasha biyaha oo ay gacanta ku hayaan ciidamada dowladda iyo kuwa AMISOM.

Maxamed Xaaji Xuseen, Hiiraan Online
[email protected]
Muqdisho, Soomaaliya









Click here
7/11/2012 9:18 AM EST
Arbaco, July 11, 2012(HOL): Wefdi ka socda UN-ka, oo uu horkacayo xiriiriyaha gargaarka Qaramada Midoobey ee Soomaaliya Mark Bowden ayaa maanta magaalada Boosaaso soo gaarey.

7/11/2012 9:08 AM EST
Arbaco, July 11, 2012(HOL): Magaalada Boosaaso waxaa maanta soo gaarey Eng. Maxamed Axmed Saalax oo ah musharax u taagan xilka madaxtinimada ee dalka. waxaana si diiran usoo dhoweeyey boqolaal kamid ah dadweynaha magaalada Boosaaso ku dhaqan.

7/11/2012 8:46 AM EST
Arbaco, July 11, 2012 (HOL) — Kulan looga hadlayay xoojinta amaanka degmada Balcad ee gobolka Shabeellada dhexe ayaa maanta ka dhacay warshadii dharka ee Balcad, kaasoo ay ka qeyb-galeen waxgarad, nabadoonno iyo culumaa'uddiinka degmadaas.

7/11/2012 8:01 AM EST
Arbaco, July 11, 2012 (HOL) — Hay'adda dhaqaatiirta aan xuduudda lahayn ee MSF ayaa warbixin ay soo saartay ku sheegtay in magaalada Kismaayo ee koonfurta Soomaaliya uu ka dilaacay cudurka daacuunka kaasoo saameyn ku yeeshay caruurta iyo dadka waaweyn ee ku nool degmadaas.

7/11/2012 7:33 AM EST
Arbaco, July 11, 2012 (HOL) — Ra'iisul wasaarihii hore ee Soomaaliya, Maxamed Cabdullaahi Farmaajo ayaa sheegay inuu ka qaybgalayo doorashada madaxnimo ee Soomaaliya oo dhacaysa bisha soo socota ee sannadkan ka dhici doona Muqdisho.

7/11/2012 6:44 AM EST
Arbaco, July 11, 2012 (HOL) — Ciidamada DKMG Soomaaliya iyo oo gacan ka helaya kuwa AMISOM ayaa dagaal ku qabsaday maanta deegaanka Laanta-buuro ee gobolka Shabeellada hoose, halkaasoo ahayd saldhig weyn oo Al-shabaab ay ku tababarto xoogaggeeda.

7/11/2012 6:34 AM EST
Arbaco, July 11, 2012 (HOL) — Maamulka gobollka Hiiraan ayaa markii ugu horeysay ka dalbaday dowladda KMG in la soo gaarsiiyo magaalada Baladweyne howlaha durbaba ay ka bilaawday gobolladii dhawaan laga xureeyay Al-shabaab maxkamada ciidamada qalabka sida.