10/3/2022
Today from Hiiraan Online:  _
Wararka Maanta- Arbaco, Dec 19, 2012
JEN. SAMATAR: "Puntland waxay ku jirtaa xaalad adag, waxayna la mid tahay sidii doon bad-weynta ku luntay"
Arbaco, December 19, 2012 (HOL) — Jen. Cabdilaahi Siciid Samatar oo ah siyaasi horay xilal kala duwan uga soo qabtay Puntland, dhawaanna sheegay inuu yahay musharrax u taagan xilka madaxtinimada ee Puntland ayaa waraysi uu maanta oo Arbaca ah bixiyay kaga hadlay arrimo badan.

Siyaasigu wuxuu sheegay in Puntland ay xiligan ku jirto xaalad adag, isla markaana ay tahay in wax laga qabto, isagoo ugu baaqay Isimada iyo waxgaradka inay isu taagaan sidii dhibka jira xal loogu heli lahaa; waa sida uu hadalka u dhigaye.

"Puntland meel adag bay maraysaa, maalin ay ka xuntahay maanta horay uma soo marin, Isimada waxaan leeyahay hawshiinii ayaa taagan, waana inaad arinta soo fara gelisaan, Puntland waxay maanta la mid tahay sidii doon badweynta ku luntay" Gen. Samatar ayaa yiri.

Mar wax laga weydiiyey muddada sanadka ah ee goleyaasha dowladda loogu daray, wuxuu sheegay in aysan taasi sharci lahayn, islamarkaana aan sinaba loo aqbali karin, isagoo taas ka hadlaya waxuu yiri: "Sharciga uu Cabdiraxmaan Faroole ku dhaartay waa 4-sano, anagu 8-da Janaayo doorasho ayaan sugeynaa, Baarlamaankana sharciyaddii way ka dhacday".

Dastuurka Puntland ee la ansixiyey bishii April ee sanadkan mar uu ka hadlayeyna wuxuu sheegay in Dastuurka ay ku lifaaqan yihiin qodobo aan sharci ahayn, qaabkii lagu ansixiyeyna uu ahaa mid aan munaasib ahayn. Dhinaca xoriyatul-qowlka, wuxuu tilmaamay in xukuumaddu ay caburin aad ah ku hayso dadka, isagoo xusay in ay jiraan dad badan oo la xiray iyo qaar badan oo loo diidey in ay shirar qabsadaan.

Cabdilaahi Siciid Samatar oo horay usoo noqday taliyaha ciidamada Booliska iyo wasiirka amniga ee Puntland wuxuu kamid yahay siyaasiyiinta sida aadka ah u dhaliila xukuumadda madaxweyne Dr. Cabdiraxmaan Maxamed Maxamuud Faroole. Wuxuuna horay u shaaciyey in uu yahay musharax u taagan xilka madax-tinimada ee Puntland.

Maxamed Salaad Xaaji Dirir, Hiiraan Online
[email protected]
Puntland, Soomaaliya












Click here
12/19/2012 3:02 PM EST
Arboco, December 19, 2012 (HOL) - Kadib qaraxyo iyo weeraro is xigxigay oo ka dhacay xaafadda Islii ee ay Soomaalida ugu badan ka deggan tahay Nairobi caasimadda dalka Kenya ayaa waxay Hay'adda qaxootiga u qaabilsan qaramada midoobay ee UNHCR iyo dowladda Kenya ay isku waafaqeen in Qaxootiga Soomalaida ee ku sugan magaalooyinka kala duwan ee Kenya ay iska xaadiriyaan xeryaha Qaxootiga ee Kakuma ama Dadaab.

12/19/2012 8:33 AM EST
Arbaco, December 19, 2012 (HOL) — Markab la yiraahdo MV Daesan oo waddanka waqooyiga Kuuriya laga leeyahay oo 18-kii bishii hore ee November ay ciidamada badda Puntland kasoo qabteen meel dhowr iyo toban mayl u jirta Boosaaso xilli uu badda sibir (Shimiito) ku daadinayay ayaa lala baxsaday.

12/19/2012 8:19 AM EST
Arbaco, December 19, 2012 (HOL) — Madaxweynaha Soomaaliya, Xasan Sheekh Maxamuud ayaa maanta ku qaabilay madaxtooyada Soomaaliya ergayga gaarka ah ee Qaramada Middobay u qaabilsan arrimaah Soomaaliya danjire, Augustine Mahiga.

12/19/2012 8:05 AM EST
Arbaco, December 19, 2012 (HOL) — Dowladda Puntland ayaa si kulul uga jawaabtey eedeymo dhowr ah oo uu maanta u jeediyey Jen. Cabdullaahi Siciid Samatar oo ah siyaasi horay xilal kala duwan uga soo qabtay Puntland, dhowaanna shaaciyey in uu yahay musharrax u taagan xilka madaxweyne-nimada.

12/19/2012 8:01 AM EST
Arbaco, December 19, 2012 (HOL) — Hay'adda qoxootiga adduunka ee UNHCR ayaa sheegtay inay sii wadayso diiwaan-gelinta qoxootiga ku nool magaalooyinka Kenya, iyadoo dowladda Kenya ay dhawaan sheegtay inay xirtay xafiisyadii lagu diiwaan-gelin jiray qoxootiga.

12/19/2012 7:29 AM EST
Arbaco, December 19, 2012 (HOL) — Askari ka tirsan ciidamada dowladda Somalia ayaa baqonimadii maanta ku dhaawacay afaafka hore ee madaxtooyada sarkaal ka tirsanaa xarunta madaxtooyada, iyadoo askariga uu markiiba goobta ka baxsaday.

12/19/2012 7:05 AM EST
Arbaco, December 19, 2012 (HOL) — Kooxo hubeysan oo la sheegay inay wateen mootooyin ayaa maanta barqonimadii ku toogtay magaalada daarusalaam ganacsade Soomaali ah, iyagoo ka dhacay lacago fara badan oo uu watay.

12/19/2012 5:59 AM EST
Arbaco, December, 19, 2012 (HOL) – Xilli xaalado nolaleed oo aad u liita ay soo food saareen kumanaan qoysas ah oo bishii September ka barakacay fatahadii ku dhuftaay magaalada Baladweyne, ayaa dhinaca kale waxaa soo baxaya in la la lunsaday lacago malaayiin doolar ah oo ay hay’addaha safamalka ugu talagaleen in lagu kaalmeeyo dadka dhibaateysan.

12/19/2012 2:00 AM EST
Arbaco, December 19, 2012 (HOL) — Dowladda Kenya ayaa amar ku siisay qoxootiga Soomaalida ah ee ku nool magaalooyinka Kenya inay dib ugu laabtaan xeryaha qoxootiga, gaar ahaan xeryaha adduunka ugu weyn ee Dhadhaab.

12/19/2012 1:40 AM EST
Arbaco, December 19, 2012 (HOL) — Ciidammo ka tirsan kuwa dowladda Soomaaliya oo tiradooda lagu sheegay in ka badan boqol askari ayaa sameeyay gadood, kuwaasoo sheegay inaysan wax mushaaraad iyo xuquuq ah ka helin dowladda Soomaaliya muddo bilooyin ah.