3/29/2024
Today from Hiiraan Online:  _
Wararka Maanta- Isniin, Dec 17, 2012
Al-shabaab oo sheegtay in Abuu-Mansuur Al-Amriiki uusan ku hadli karin magaca Dagaalyahannada Ajnabiga ah
Isniin, December 17, 2012 (HOL) — Bayaan kasoo baxay xafiiska warfaafinta ee Al-shabaab maanta oo Isniin ah ayaa lagu sheegay in Cumar Xamaami oo loo yaqaan Abuu-Mansuur Al-Amriiki uusan matelin kuna hadli karin magaca dagaalyahannada ajnabiga ah ee ka barbar dagaalama xoogagga Al-shabaab, sidoo kalena aysan jirin jago uu ka hayo Al-shabaab.


“Kaddib filimkii uu baahiyay iyo warar aan jirin oo uu ku sheegay in Al-shabaab ay ka dhex-jirto kala qaybsanaa ayaa Al-shabaab waxay caddeynaysaa in Abuu-Mansuur Al-Amriiki aanu matalin, kuna hadli karin magaca dagaalyahannada ajnabiga ah ee ku sugan Soomaaliya," ayaa lagu yiri bayaanka ay Al-shabaab soo saartay.

Sidoo kale, bayaanka waxay Al-shabaab ku sheegtay in hadallada Abuu-Mansuur ay dhammaantood yihiin ruwaayado buuxiyay warbaahinta reer galbeedka, kuwaasoo jah-wareer ku beeray muslimiinta caalamka - qaabab kala duwanna looga warceliyay.

"Hadalladii Abuu-Mansuur uu warbaahinta ku baahiyay waa kuwo muujinaya inuu yahay qof u jajaban inuu is-muujiyo, balse waa kuwo aanay waxba ka jirin marka xaqiiqada loo yimaado," ayaa sidoo kale lagu yiri bayaanka kasoo baxay Al-shabaab.

Bayaanka ayaa intaas ku daray in mujaahidiinta oo qaadaya dhariiqii Nabiga (NNKH) ay ka go'an tahay hammigooda ku aadan inay sare u qaadaan diinta Islaamka isla markaana ay xoojianya xiriirka walaalnimo ee kala dhexeeya walaalahooda la jooga.

Ugu dambeyn, Al-shabaab waxay bayaanka ku sheegtay in Abuu-Mansuur uusan wax jago ah ka hayn maamulka Al-shabaab; waxaana sidoo kale bayaanka lagu beeniyay inuu yahay saraakiisha dagaalka geliya xoogagga Al-shabaab ama lacagaha u soo ururiya.

Abuu-Mansuur Al-Amriiki oo kasoo jeeda gobolka Alabama ee dalka Mareykanka ayaa dhowr sano ka hor kusoo biiray Al-shabaab, isagoo sheegay inuu jiro khilaaf ka dhex-taagan Al-shabaab, sidoo kalena wuxuu ku sheegay cajalad maqal ah oo uu horraantii sannadkan soo duubay inuu baqdin ka qabo in la dilo.

Hadalkan ayaa wuxuu kusoo beegmayaa iyadoo tan iyo sannadkii hore uu jiray khilaaf weyn oo u dhexeeyay Al-shabaab iyo hoggaamiyahan Mareykanka ah, kaasoo dhowr jeer lagu arkay fagaarayaasha waaweyn ee ay ku kulmaan Al-shabaab, isagoo ku hadlaya afka Soomaaliga oo aad u jajaban.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
12/17/2012 7:15 AM EST
Isniin, December 17, 2012 (HOL) — Ra'iisul wasaaraha Soomaaliya, Cabdi Faarax Shir-doon (Saacid) oo warbaahinta la hadlay kaddib kulan ay golaha wasiirradu ku yeesheen maanta xaruntooda Muqdisho ayaa ka hadlay sababihii keenay in wasaarad walba uu u magcaabo laba wasiir ku xigeen.

12/17/2012 7:01 AM EST
Isniin, December 17, 2012 (HOL) — Madaxweynaha Soomaaliya, Xasan Sheekh iyo madaxweynaha Jabuuti Ismaaciil Cumar Geelle ayaa maanta ka hadlay munaasabad lagu xusayay sannadguuradii 40-aad ee kasoo wareegtay markii la qoray farta Soomaaliga, waxayna ku baaqeen in la xoojiyo horumarinta afka Soomaaliga.

12/17/2012 6:36 AM EST
Isniin, December 17, 2012 (HOL) — Ciidamada ammaanka dalka Kenya ayaa maanta buuxiyay xaafadda Islii ee magaalada Nairobi halkaasoo ay baaritaanno kawadaan, iyadoo la sheegay in ka badan 30-qof lagu qabqbatay baaritaannadaas.

12/17/2012 5:24 AM EST
Isniin, December 17, 2012 (HOL) — Kooxo hubeysan ayaa isgoyska Aadan Cadde oo ku dhow suuqa bakaaraha ee Muqdisho ku toogtay mid ka mid ah saraakiisha nabadsugidda dowladda Soomaaliya oo magaciisa lagu soo gaabiyay Afloow; iyadoo kooxaha dilka geystay ay u suurogashay inay si nabadgalyo ah uga baxsadaan halkaas.

12/17/2012 1:50 AM EST
Isniin, December 17, 2012 (HOL) — Munaasabaddan oo ay ka qaybgalayaan madax uu ka mid yahay madaxweynaha Soomaaliya, Xasan Sheekh Maxamuud, madaxweynaha Jabuuti Ismaaciil Cumar Geelle, madaxweynaha Somaliland, Axmed Maxamed Maxamuud Siilaanyo, dublamaasiyiin ka socda dalalka Kenya iyo Itoobiya ayaa maanta ka furmaysa magaalada Jabuuti ee xarunta dalka Jabuuti.

12/17/2012 1:33 AM EST
Isniin, December 17, 2012 (HOL) — War-saxaafadeed kasoo baxay wasaaradda amniga ee Puntland oo nuqul ka mid ahi uu soo gaarey shabakadda HOL ayaa lagu sheegay in ciidamada Puntland ay gacanta ku dhigeen sahay ku socotay xoogagga Al-shabaab ee ku sugan buuraleyda Galgala ee gobolka Bari.

12/17/2012 1:30 AM EST
Isniin, December 17, 2012 (HOL) — Ugu yaraan hal qof ayaa ku dhintay laba qof oo kalena si xun ayay ugu dhaawacmeen saddex qarax oo xalay ka dhacay xaafadda Islii ee magaalada Nairobi, iyadoo booliiska Kenya ay ku eedeeyeen weerarradaas inay ka dambeysay Al-shabaab.

12/17/2012 1:28 AM EST
Isniin, December 17, 2012 (HOL) — Fadhi ay baarlamaanka Puntland ku yeesheen magaalada Garoowe shalay oo Axad ahayd ayay ku meel-mariyeen labo xeer oo ay horay ugu soo gudbiyeen wasaaradaha caafimaadka iyo deegaanka. Xeerarkan oo uu goluhu in muddo ah ka doodayey ayaa kala ah xeerka mamnuucista ka ganacsiga iyo soo dejinta bacaha iyo xeerka furashada xarumaha caafimaadka ee gaarka loo leeyahay.