3/29/2024
Today from Hiiraan Online:  _
Wararka Maanta- Khamiis, Dec 13, 2012
Afhayeenka Ururka Raaskabooni oo sheegay in Amniga Magaalada Kismaayo uu yahay mid la isku halleyn karo

Khamiis, December 13, 2012 (HOL) — Afhayeenka ururka raaskambooni, Cabdinaasir Seeraar Maax ayaa sheegay in ammaanka magaalada Kismaayo ee xarunta gobolka Jubbada Hoose  uu yahay mid ka wanaagsan sidii hore, isagoo xusay in dadkii horay uga barakacay magaaladaas ay dib ugu soo laabanayaan.

C/naasir Seeraar oo la hadlayay laanta afka Soonaaliga ee VOA-da isagoo ku sugan Kismaayo ayaa sheegay in amaanka Kismaayo uu yahay mid la isku halleyn karo, wuxuuna xusay in illaa 9:00 habeenimo ay dadku socdaan.

"Ammaanka magaalada aad ayuu u fiican yahay, maalinba maalinta ka dambeysana wuu sii hagaagayaa, waana la isku halleyn karaa. Dadkii horay uga baxayna way ku soo laabanayaan magaalada iyagoo ku imaanaya cirka, dhulka iyo badda," ayuu yiri Seeraar oo sheegay in xaaladdu ay sidii hore ka wanaagsan tahay.

Magaalada Kismaayo ayaa waxaa bishii Oktoobar la wareegay ciidamada dowladda Soomaaliya oo garabsanaya kuwa Kenya iyo ururka Raaskambooni, kaddib muddo shan sano ah oo ay Al-shabaab ka talinaysay, iyadoo nabadda Kismaayo ay ahayd mid wanaagsan xilligii Shabaabku joogeen.

Goobjoogayaal ku nool magaalada Kismaayo ayaa iyaguna qiray inay xaaladda amni ee magaaladaas tahay mid kasoo raynaysay sidii hore, waxayna goobjoogayaashu sheegeen inay jiraan jidad weli ka xiran, inkastoo ganacsigu uu yahay mid dib u soo laabanaya.

"Xaaladda amni ee magaalada waa mid wanaagsan, illaa fiidkii ayaan ku gaarnaa caweyska, laakiin 9:00 habeenimo wixii ka dambeeya guryaha ayaan ku xaroonaa," ayay tiri Nimco Cumar oo ka mid ah dhallinyarada ku nool magaalada Kismaayo.

Kismaayo oo 500-km dhinaca Koonfureed kaga beegan Muqdisho ayaan weli loo sameyn wax maamul ah, iyadoo dhowr jeer oo hore lagu murmay maamul u sameynteeda, waxaase madaxda dowladda federaalka ah ay ku adkeysanyaan in maamulka Kismaayo uu noqdo mid ay sameystaan shacabka Jubbooyinka ku nool.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
12/13/2012 8:50 AM EST
Khamiis, December 13, 2012 (HOL) — Kulan looga hadlay ammaanka iyo horumarinta gobolka Hiiraan oo uu ka qaybgalay ugaaska beesha Xawaadle, ugaas C/raxmaan Ugaas Khaliif Ugaas Rooble ayaa maanta lagu qabtay hoteelka Ambassador ee magaalada Muqdisho.

12/13/2012 8:41 AM EST
Khamiis, December 13, 2012(HOL): Xuska 40 guurada far-soomaaliga ayaa lagu qaban doonaa magaalada Jabuuti ee dalka Jamhuuriyadda Jabuuti 17ka ilaa 22ka bishan Disambar ee 2012ka. Xuskan, oo noqon doona mid ballaadhan, waxa lagu martiqaaday madaxda Soomalida ee geeska Afrika.

12/13/2012 8:12 AM EST
Khamiis, December 13, 2012 (HOL) — Guddomiyaha Urursiyaasadeedka Rays Mr; Xasan Maxmed Cali (Gaafaadhi), ayaa sheegay in aanu ku qanacsanayn Natiijada ay soo saareen guddida doorashooyinku, maadaama oo wax isdaba marin iyo musuqmaasuq badani uu hadheeyey, waxaanu ugu baaqay komishanka inay is casilaan mar haddii ay masuuliyadii ummadda u hayeen ka soo bixi waayeen.

12/13/2012 7:45 AM EST
Khamiis, December 13, 2012 (HOL) — Madaxweynaha Soomaaliya, Xasan Sheekh Maxamuud ayaa maanta oo Khamiis ah xarunta madaxtooyada Soomaaliya kulan albaabbadu u xiran yihiin kula qaatay, guddoomiyaha baarlamaanka dalka Jabuuti, Idiris Aarnauut Cali oo booqasho ku jooga Muqdisho.

12/13/2012 7:10 AM EST
Khamiis, December 13, 2012 (HOL) — Ra'iisul wasaaraha Soomaaliya, Cabdi Faarax Shirdoon (Saacid) ayaa maanta dhameystiray xubnaha golaha wasiirrada xukuumadda Soomaaliya, isagoo magacaabay shan wasiir u dowle iyo 20-wasiir ku xigeen.

12/13/2012 5:41 AM EST
Khamiis, December 13, 2012 (HOL) — Mukhtaar Xassan Maxamed oo 27-bishii November ee ina dhaaftay loosoo xiray ama loo qabtay dilka guddoomiyihii gollaha odayaasha dhaqanka gobollka Hiiraan Max’ed Shiikh Xusseen Maryacade ayaa qirty in uu galay danbiga loo soo xiray oo ah in uu ahaa shaqsigii gacantiisa ku toogtay guddoomiyaha.

12/13/2012 1:25 AM EST
Khamiis, December 13, 2012 (HOL) — Abaanduulaha ciidamada xoogga Soomaaliya, Jen. C/kariin Yuusuf Aadan (Dhego-badan) ayaa sheegay inay ka go'an tahay inay isku furaan dhammaan gobollada Soomaaliya, kaddib markii isaga iyo saraakiil kale ay saxaafadda kula hadleen degmada Jowhar.

12/13/2012 1:08 AM EST
Khamiis, December 13, 2012 (HOL) — Madaxweynaha Soomaaliya, Xasan Sheekh Maxamuud ayaa sheegay inaysan wax wadahadal ah la galayn Al-shabaab iyo Al-Qaacida inta ay hubka wataan, balse ciddii ka tanaasusha fikirkooda ayuu sheegay inay soo dhaweynayaan oo ay labada gacmood ku qaadayaan.

12/13/2012 1:04 AM EST
Khamiis, December 13, 2012 (HOL) — 24-kii saac ee lasoo dhaafay waxaa xeebta degmada Garacad ee gobolka Mudug ka dhacay dagaallo khasaare dhaliyey oo dhex maray ciidamada badda ee Puntland iyo kooxo burcad-badeed ah.