Wararka Maanta: Isniin, Sept 3 , 2012-Musharaxiinta ka qaybgalaya Doorashada Madaxweynenimo ee dalka Soomaaliya oo lagu xiray shuruudo cusub

Musharaxiinta ka qaybgalaya Doorashada Madaxweynenimo ee dalka Soomaaliya oo lagu xiray shuruudo cusub

Isniin, September 03, 2012 (HOL) — Musharxiinta u taagan xilka madaxweynenimo ee Soomaaliya ayaa lagu xiray shuruudo cusub, iyadoo guddigu ay soo jeediyeen in murashaxa xilka u tartamaya uu haysto baasaboor Soomaali ah ama dhalasho u dhiganta.

Afhayeenka guddiga doorashada madaxweynaha Soomaaliya, Cismaan Libaax Ibraahim ayaa sheegay in taasi ay timid kaddib markii ay arkeen in murashaxiinta u tagaan xilka madaxnimo ee dalka ay intooda badan haystaan baasaboorro ajnabi ah, wuxuu sheegay in tani ay caddeyn u noqonayso in murashaxu uu yahay Soomaalia.

"Qabashada araajida waxay billaabanaysaa maanta oo Isniin ah, waxayna socon doontaa saddex maalmood, murashax walbana waxaan u sheegaynaa inuu soo doonto fayl loogu talogalay inuu soo buuxiyo," ayuu yiri Cismaan Libaax oo sheegay in faylkaas ay guddigu haynayaan.

Murashaxinta u taagan xilka madaxnimo ee Soomaaliya ayaa waxay tiradoodu kor u dhaaftay soddomeeyo kuwaasoo qaarkood ay ka socdaan xisbiyo siyaasadeed, halka kuwo kalena ay yihiin kuwo si shaqsi ah u tartamaya.

"Baarlamaanku wuxuu ogolaaday in murashax walba uu bixiyo $10,000 oo doollarka Mareykanka ah, waayo waxaan ogaannay in murashaxiinta ay aad u fara badan yihiin ayna tani ku kala hari karaan," ayuu yiri afhayeenka guddiga doorashada.

Doorashada madaxweynaha Soomaaliya ayaa waxay dhacaysaa 10-ka bishan, waxaana ka socda Muqdisho ololayaal ay wadaan murashaxiinta u taagan xilka madaxnimo ee Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya