3/28/2024
Today from Hiiraan Online:  _
Wararka Maanta- Isniin, Sept 3 , 2012
Kooxo hubeysan oo xalay dilal qorsheysan ka geystay Degmooyin ka tirsan Muqdisho iyo bam lagu weeraray Ciidammo Booliis ah

Isniin, September 03, 2012 (HOL) — Kooxo hubeysan ayaa xalay laba qof siyaabo kala duwan ugu dilay xaafadoka tirsan degmooyinka Howadaag iyo Huriwaa, iyadoo sidoo kale bam lagu weeraray shalay gallinkii dambe ciidammo booliis ah oo ku sugnaa suuqa Bakaaraha.

Goobjoogayaal ku sugan xaafadda Baar Ubax ee degmada Howadaag ayaa sheegay in kooxo hubeysan ay fiidkii xalay toogasho ku dileen wiil dhallinyaro ah oo dibadda ka yimid, iyadoo kooxaha dilka geystay ay markiiba goobta ka baxsadeen.

"Dilka markii uu dhacay waxaa goobta soo gaaray ciidammo fara badan oo kuwa dowladda ah, dad ka badan labaatan qof ayay qabteen," ayuu yiri goobjooge ku sugan xaafadda Baar Ubax oo xaaladdeedu ay saakay tahay mid deggen.

Sidoo kale, kooxo kale oo bastoolado ku hubeysan ayaa ku toogtay xaafadda Suuqa Xoolaha ee degmada Huriwaa nin la sheegay inuu ka tirsanaa hay'adda nabadsugidda dowladda Soomaaliya, iyadoo kooxaha dilka geystay ay baxsadeen.

"Xaaladdu saakay waa daggan tahay, balse xalay oo dhan degmada waxaa ka jiray baaritaanno ay ciidamadu sameynayeen, dad badan ayayna u qabqabteen dilka ka dhacya degmadaas," ayuu yiri goobjooge kale oo ku sagan Suuqa Xoolaha.

Ma jirto cid sheegatay inay mas'uul ka tahay dilalkan iyo weerarka bambaano ee lagu weeraray booliis ku sugnaa suuqa Bakaaraha, waxaana falalkan oo dhan ay kusoo beegmayaan xilli diyaargarow loogu jiro doorashada madaxweynaha cusub ee Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
9/3/2012 9:24 AM EST
Isniin, September 03, 2012 (HOL) — Afhayeenka milateriga dalka Kenya, Emmanuel Chirchir ayaa sheegay in maraakiib dagaal oo Kenya ay leedahay ay duqeeyeen maanta magaalada Kismaayo ee xarunta Gobolka Jubada Hoose, iyadoo aan la ogeyn khasaaraha ka dhashay duqeyntaas.

9/3/2012 8:34 AM EST
Isniin, September 03, 2012 (HOL) — Guddiga doorashada madaxweynaha Somalia ayaa sheegay maanta oo Isniin ah in 22 mudane ay ka qabteen araajidooda Murashaxnimo ayna siiyeen warqado loogu talo-galay inay soo buuxiyaan, kuwaasoo ay kusoo qorayaan magacyada xildhibaannada kalsoonida siinaya.

9/3/2012 7:13 AM EST
Isniin, September 03, 2012 (HOL) — Ciidamada dowladda Soomaaliya oo gacan ka helaya kuwa AMISOM ayaa maanta baaritaanno dad lagu qabtay ka sameeyay xaafadaha degmada Afgooye ee gobolka Shabeellada Hoose, kaddib dagaal xalay ka dhacay degmadaas.

9/3/2012 7:09 AM EST
Isniin, September 03, 2012 (HOL) — Musharxiinta u taagan xilka madaxweynenimo ee Soomaaliya ayaa lagu xiray shuruudo cusub, iyadoo guddigu ay soo jeediyeen in murashaxa xilka u tartamaya uu haysto baasaboor Soomaali ah ama dhalasho u dhiganta.

9/3/2012 3:04 AM EST
Isniin, September 03, 2012 (HOL) — Diyaarado dagaal iyo maraakiib ayaa xalay duqeymo ka geystay gobolka Jubbada Hoose, gaar ahaan difaacyada ay Al-shabaab uga jiraan deegaannada ku dhow magaalada Kismaayo ee xarunta gobolkaas.