6/28/2022
Today from Hiiraan Online:  _
Wararka Maanta- Jimco, Sept 28, 2012
Wararkii ugu danbeeyay ee xaaladda Fatahaadda Webiga Shabeelle ee magaalada Baladweyne


Jimco, September, 28, 2012 (HOL) – Xaalad adag ayaa soo food saartay dadka ku dhaqan magaalada Baladweyne ee xarunta gobollka Hiiraan kadib markii uu xalay ku fatahay inta badan xaafaddaha magaalada wabiga Shabeelle.

 

Fatahaadan ayaa waxaa sababay roob xoog leh  oo qaatay in ka badan Sagaal sacadood oo xiriir ah, taasoo keentay in uu buux dhaafo wabiga Shabeelle biyahana ku soo celiyo xaafaddaha degmada.

 

Wararkii ugu danbeeyay ee soo baxaya waxaa ay sheegayaan in uu jiro khasaare xoog leh oo ka dhashay fatahaada ku dhuftay magaalada Baladweyne, waxaana dadka ku geeriyooday ilaa iyo hadda ay ku kor u sii dhaafayaan 10 ruux oo u badan caruur.

 

Sidoo kale biyuhu waxaa ay baabi’iyeen oo ay dul mareen xaafaddo dhowr ah, iyadoo ay jiraan dad ilaa iyo waqtiga ku dhax go’doonsan xaafaddaha una baahan in loo gurmado.

 


Mas’uuliyiinta maamulka gobollka Hiiraan oo arintan ka hadllay waxaa ay sheegeen in inta badan la oran karo xaafaddaha magaalada dadka ku dhaqan waa ay ka baxeen, iyaga oo ugu baaqay hay’addaha samafalka in gar gaar lala gaaro dadka guryo beelay fatahaada.

 

Waxaa saakay la arkayay gadiid ay leeyihiin ciidamada Jabuuti ee dhawaan gaaray magalada Baladweyn oo qoysaska qaarkood ka daabulaya xaafaddaha ay fatahaadu ku dhuftay, walow dadka intooda badan ay naftooda maareynayaan.

 

Marka aad la sheekeysato waxgaradka iyo odayaasha waayo jooga ah ee Baladweyne, waxaa ay kuu sheegayaan in Roobkii xalay ka da’ay magaalada uusan aheyn mid inta la xasuuto horay u soo maray  magaalada, waxaana ay kuu sheegayaan haddii uu ay roobabku sii da’aan xaaaladu inta ka sii darri karto.






 

C/raxmaan Diini, Hiiraan Online

[email protected]
Baladweyne, Soomaaliya.













Click here
9/28/2012 4:58 PM EST
Jimco, September 28, 2012 (HOL) - Xoogagga Al-shabaab ayaa caawa gabi ahaanba isaga huleelay magaalada Kismaayo, kadib markii ciidamada dowladda KMG iyo kuwa Kenya ay dhowr jiho kasoo weerareen magaalada.

9/28/2012 11:21 AM EST
Jimco, 28, 2012 (HOL) - Xaaladda Magaalada Kismaayo ayaa ah mid kacsan iyadoona ciidamada huwanta ah iyo kuwa Al-shabaab ay isku horfadhiyaan halka loo yaqaan Madaxtooyada oo ku taal afaafka hore ee laga soo galo magaalada Kismaayo.

9/28/2012 4:13 AM EST
Jicmo, September 28, 2012 (HOL) — Wariye ka faalooda barnaamiyada ciyaaraha oo maydkiisa oo qoorta ka go'an laga helay shalay degmada Huriwaa ayaa maanta lagu aasay deegaanka KM-13 ee duleedka Muqdisho, waxaana wariyahan uu noqonayaa wariyihii shanaad oo toddobaadkan lagu dilo Muqdisho.

9/28/2012 4:01 AM EST
Jicmo, September 28, 2012 (HOL) — Dagaal fool ka fool ah ayaa lagu soo waramayaa in uu ka bilowday duleedka magaalada Kismaayo, dagaalkaas oo ay isaga soo horjeedaa ciidamada dowladda KMG oo kaashanaya kuwa Kenya oo saaka maraakiib uga soo dagay dhanka xeebta Cceeldhiig ee magaalada Kismaayo iyo xoogagga Al-shabaab.

9/28/2012 3:56 AM EST
Jicmo, September 28, 2012 (HOL) — Guddoomiyaha gobolka Banaadir, ahna duqa Muqdisho, Maxamuud Axmed Nuur Tarsan ayaa sheegay in isbaarooyin lacago looga qaado dadka shacabka ah ay yaallaan qaar ka mid ah waddooyinka Muqdisho, isagoo ugu baaqay ciidamada dolwadda inay isbaarooyinkaas wax ka qabtaan.

9/28/2012 3:34 AM EST
Jicmo, September 28, 2012 (HOL) — Ciidamada booliiska Soomaaliyeed ayaa xalay baaritaanno saf-ballaaran ka sameeyay saddex degmo oo ka tirsan kuwa gobolka Banaadir, kuwaasoo ay kusoo qabqabteen dad fara badan oo lala xiriirinayo ammaan-darradii maalmihii lasoo dhaafay ka dhacayay Muqdisho.

9/28/2012 3:15 AM EST
Jicmo, September 28, 2012 (HOL) — Afhayeen milateriga Kenya, Col. Cyrus Oguna ayaa warbaahinta u sheegay in ciidamada Kenya ee qaybta ka ah AMISOM iyo kuwa dowladda Soomaaliya ay la wareegeen gacan ku haynta xaafado ka tirsan degmada Kismaayo ee gobolka Jubbada hoose.

9/28/2012 3:14 AM EST
Jicmo, September 28, 2012 (HOL) — Xaafadaha magaalada Baladweyne ayaa waxaa ku fatahay webiga Shabeelle, kaddib markii xalay uu magaaladaas ka da'een roobab xooggan oo geystay khasaare dhimasho oo soo gaartay dad iyo xoolo nool.