6/28/2022
Today from Hiiraan Online:  _
Wararka Maanta- Khamiis, Sept 20, 2012
Dibadbax xooggan ka dhacay Magaalada Kismaayo iyo Xarakada Al-shabaab oo baaq u dirtay Shacabka ku nool Jubbooyinka

Khamiis, September 20, 2012 (HOL) — Dibadbax xooggan ayaa shalay gelinkii danbe ka dhacay magalaada Kismaayo kaasoo looga soo horjeedo duulaanka ciidamada dowladda iyo kuwa AMISOM ee magaalada Kismaayo islamarkaasina lagu taageerayay Xarakada Al-shabaab.

Dibadbaxan oo ahaa mid weyn ayaa waxa ka qeybqaadanayay kuamannaan dadweeyne ah oo ka kala yimid xaafadaha kala duwan ee Kismaayo, waxaana dadku ay siteen boorar ay ku qoranyihiin hal-ku-dhigyo ay ku muujinayaan dareenkooda ku aadan dagaallada maalmihii ugu danbeeyay ka holcayay gobolka Jubada Hoose.

Dadweeynihii dibadbaxa ka qeybqaadanayay ayaa socod dheer kusoo maray wadooyinka waaweyn ee Kismaayo, waxaana ugu danbeyn ay isugu soo urureen fagaaraha weyn ee beerta xoriyadda halkaasoo ay ku sugnaayeen masuuliyiin sar sare oo katirsan Al-shabaab.

Gudoomiyaha gobollada Jubooyinka ee maamulka Al-shabaab Sheekh C/raxmaan Xudeyfe oo kamid ahaa masuuliyiintii ka hadashay fagaaraha beerta xoriyadda ayaa sheegay in ciidamadooda ay u diyaarsanyihiin difaaca gobollada Jubooyinka, wuxuuna intaa ku daray in dagaallada aysan ku ekaan doonin Soomaaliya oo qura balse ay gaari doonaan gudaha Kenya.


Sheekh C/raxmaan Xudeyfa ayaa ugu baaqay shacabka ku dhaqan goboollada Jubooyinka in ay garab istaagaan xoogagga Al-shabaab, isagoona wax kama jiraan ku tilmaamay hanjabaadaha kasoo yeeraya saraakiisha dowladda KMG iyo kuwa Kenya oo uu xusay in ay doonayaan in ay barakiciyaan shacabka ku dhaqan magaalada Kismaayo.

Sidoo kale Sheekh Xudeyfa ayaa yiri "Kismaayo waxay ku jirtaa gacanta mujaahidiinta amaankeenduna waa sugan yahay dhanwalba, xagga badda iyo xagga barriga, cadowga ilaahay kismaayo wuxuu u jiraa 70 KM waxaana safan mujaahidiinta."


Masuuliyiintii goobta ka hadashay ayaa ugu baaqay qabaa'ilaadka dega jubooyinka in ay hubkooda qaataan islamarkaasina ka hortagaan waxa ay ugu yeereen "cadowga kusoo duulay shareecada Islaamka".

Dibadbaxa shalay gelinkii danbe ka dhacay magaalada Kismaayo ayaa kusoo beegmaya xilli saraakiisha dowladda KMG ee Jubooyinka ay sheegeen in ay wadaan diyaargarowgii ugu danbeeyay oo ay ku doonayaan in ay ku qabsadaan magaalada Kismaayo ee xarunta gobolka Jubada Hoose.

Xasan Nuur, Hiiraan Online
[email protected]
Kismaayo, Soomaaliya











Click here
9/20/2012 4:06 PM EST
Khamiis, September 20, 2012(HOL): Faahfaahin dheeraad ah ayaa ka soo baxeysa qarax caawa fiidkii ka dhacay Magaalada Muqdisho ee caasimadda Dalka Soomaaliya, gaar ahaan Baar Village oo ku yaalla meel u dhow gurigii haweenka iyo tiyaatarkii Muqdisho.

9/20/2012 1:50 PM EST
Khamiis, September 20, 2012 (HOL) - Ugu yaraan 18 qof ayaa ku dhimatay, 45 kalana waa ku dhaawacmeen markii ay labo naftii hure beegsadeen dad rayid ah oo fadhiyay maqaayad ku taalla guriga hooyooyinka.

9/20/2012 12:07 PM EST
Khamiis, September 20, 2012(HOL): Labo qarax oo ay geysteen labo ruux oo naftooda halligay ayaa waxay goor dhaweyd ka dhaceen Baar lagu magacaabo Village oo ku yaalla meel u dhow gurigii hooyooyinka ee magaalada Muqdisho.

9/20/2012 11:18 AM EST
Khamiis, September 20, 2012(HOL):Allaah ha u naxariistee waxaa shil baabuur ku geeriyoodey hooyo iyo aabe Soomaaliyeed halka wiilkooda oo laba sano jir ah iyo ninkii wadayna ay ku dhaawacmeen.

9/20/2012 8:22 AM EST
Khamiis, September 20, 2012 (HOL) — Madaxweynaha Soomaaliya, Xasan Sheekh Maxamuud ayaa maanta kula kulmay garoonka diyaaradaha ee Muqdisho dajirayaal ka socday 14 dal oo isugu jira Yurub iyo Mareykanka, isagoo sharraxaad ka siiyay howlaha u qorsheysan dowladda cusub ee Soomaaliya.

9/20/2012 7:40 AM EST
Khamiis, September 20, 2012 (HOL) — Ururadda iyo xisbiyada qaarkood ayaa maalmihii u dambeeyey si weyn uga qaylinayey labadda xil ee uu isku hayo gudoomiyaha golaha wakiiiladda Somaliland, kuwaas oo kala ah gudoomiyah Golaha Wakiiladda iyo gudoomiyaha urur siyaasadeedka Wadani, kana dalbaday inuu labadda mid iska casilo, lana mid noqdo ururadda kale.

9/20/2012 7:30 AM EST
Khamiis, September 20, 2012 (HOL) — Ciidamada Midowga Afrika ee AMISOM ayaa sheegay in ciidamadooda iyo kuwa dowladda Soomaaliya oo magaalo kale oo muhiim ah ka qabsadeen xoogagga Al-shabaab, taasoo ay sheegeen inay ku dhow dahay magaalada Kismaayo ee xarunta Jubbada Hoose.

9/20/2012 6:15 AM EST
Khamiis, September 20, 2012 (HOL) — Kaddib is-rasaaseyn khasaare sababtay oo xalay fiidkii ku dhaxmartay xaafadda Buundo-weyn ee magaalada Baladweyne ciidamo ka wada tirsan maamulka gobollka Hiiraan, ayaa waxaa arintaa ka warbixiyay mas’uuliyiin ka tirsan maamulka gobolka.

9/20/2012 2:56 AM EST
Khamiis, September 20, 2012 (HOL) — Madaxweynaha Soomaaliya, Xasan Sheekh Maxamuud ayaa sheegay inuu ku gudo-jiro wadatashiyo ku aaddan sidii uu ra'iisul wasaaraha Soomaailya u soo magacaabi, isagoo sheegay inay jiraan dad badan oo isku taagan xilkan iyo kuwo ay iyagu dalbadeen inay soo gubiyaan aqoonsiyadooda waxbarasho iyo shaqo.

9/20/2012 2:31 AM EST
Khamiis, September 20, 2012 (HOL) — Ugu yaraan saddex qof oo ay ku jirto haweeney uur leh ayaa ku dhintay hoobiyeyaal xalay lagu duqeeyay degmooyinka Boondheere iyo Shibbis ee gobolka Banaadir, waxaana duqeymahan ku dhaawacmay in ka badan 16-qof oo kale.