6/29/2022
Today from Hiiraan Online:  _
Wararka Maanta- Talaado, Sept 18, 2012
Israsaaseyn dhexmaray Askar kawada tirsan Ciidamada dowladda Soomaaliya oo ay waxyeello kasoo gaartay Arday
Talaado, September 18, 2012 (HOL) — Ugu yaraan hal qof ayaa ku dhintay saddex kalena way ku dhaawacmeen iska-horimaad ciidammo kawada tirsan dowladda Soomaaliya ku dhexmaray maanta oo Salaaso ah inta u dhexeysa isgoyska KM-4 iyo Tarabuunka.

Qofka dhintay iyo kuwa dhaawacmay ayaa dhammaantood waxay ahaayeen arday kasoo baxay mid ka mid ah dugsiyada sare ee Muqdisho iyadoo aysan jirin waxyeello soo gaartay askartii ay israsaaseyntu u dhexeysa.

"Iskahorimaadku wuxuu u dhexeeyay askari ku hubeysan qoriga AK-47 iyo koox kale oo askar ah, kuwaasoo isaga daba-joogay, waxaana dhintay arday, saddex kalena dhaawacyo kala duwan ayaa soo gaaray," ayuu saxaafadda u sheegay goobjooge ku sugnaa halka ay israsaaseyntu ka dhacday.

Goobjoogaha ayaa sheegay in askariga la eryanahay uu soo dhacay jaad fara badan, taasna ay keentay in laga daba-yimaado oo uu dagaalku dhaco, iyadoo ay u suurogashay askarigii dhaca geystay ee lagu la daba-socday inuu goobta ka baxsado.

Dhaawacyadii ardayda ayaa goobta laga qaaday iyadoo maydkii ardayga kalena ay halkii lagu dilay ka qaadeen arday kale oo ay wax wada baranayeen, waxanaa falkan uu imaanayaa iyadoo dalka uu ka baxay xilli KMG ah ayna muuqdaan isbedello xooggan.

Ciidamada dowladda ayaa inta badan lagu eedeeyaa inay dhac geystaan, iyadoo dhowr jeer oo hore ay saraakiisha ciidamadu soo saareen amarro ay ku sheegeen in la ciqaabi doono askarigii dhibaatooyin u geysta dadka shacabka ah.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/18/2012 11:46 AM EST
Talaado, September 18, 2012(HOL): Madaxweynaha Jamhuuriyadda Federaalka ah ee Soomaaliya mudane Xasan Sheekh Maxamuud ayaa maanta xafiiskiisa ku qaabilay wasiirka horumarinta xiriirka caalamiga ah ee dalka Sweden Gunilla Carlsson iyo xiriiriyaha arrimaha bani’aadamnimada ee Qaramada Midoobay Mark Bowden.

9/18/2012 9:55 AM EST
Talaado, September 18, 2012 (HOL) — Taliska AMISOM ayaa sheegay maanta in ciidammo booliis ah oo ka soda dalka Nayjeeriya oo isugu jira rag iyo dumar ay kusoo biireen howlgalka Midowga Afrika ee ka socda Muqdisho, kuwaasoo ku biiri doona booliis horay ugu sugnaa Muqdisho oo ka socda dalka Uganda.

9/18/2012 8:40 AM EST
Talaado, September 18, 2012 (HOL) — Saraakiisha milateriga Kenya ayaa sheegay maanta oo Talaado ah in ciidamadooda iyo kuwa dowladda Soomaaliya ay qarka u saaran yihiin magaalo xeebeedda Kismaayo ee gobolka Jubbada hoose, hakaasoo ay kumannaan qof oo ku noolaa ka barakacayaan.

9/18/2012 7:31 AM EST
Talaado, September 18, 2012 (HOL) — Madaxweynihii hore ee Soomaaliya, Shariif Sheekh Axmed ayaa iska fogeeyay hadal kasoo yeeray wasiirka arrimaha dibadda ee dalka Kenya, Sam Ongeri oo ahaa in Shariif uu ku lug lahaa qarax lagu weeraray hoteel uu magaaladaas ka deggenaa madaxweynaha Soomaaliya toddobaadkii hore.

9/18/2012 7:06 AM EST
Talaado, September 18, 2012 (HOL) — Ururada bulshada rayidka Banaadir ayaa kulan ay maanta ku yeesheen Muqdisho waxay kaga hadleen sidii gargaar bani'aadanimada lagu gaarsiin lahaa deegaannada Al-shabaab laga saaray iyo sidii looga hortegi lahaa in gargaarkaas la leexsado.

9/18/2012 6:39 AM EST
Talaado, September 18, 2012 (HOL) — Xilli maalmihii ugu danbeeyay ay xiisado dagaal ka taagnaayeen qeybo katirsan gobollada Jubooyinka ayaa magaalada Kismaayo laga dareemayaa jawi kacsanaan iyo barakac xooggan.

9/18/2012 3:09 AM EST
Talaado, September 18, 2012 (HOL) — Maamul goboleedka Puntland ayaa ka digay in loo magacaabo ra'iisul wasaaraha cusub ee Soomaaliya mas'uul horay uga soo mid noqday xukuumadihii dalka soo maray, iyagoo ku taliyeen in lasoo magacaabo ruux cusub oo aan kasoo mid noqon xukuumadihii hore.

9/18/2012 3:00 AM EST
Talaado, September 18, 2012 (HOL) — Xukuumadda Somaliland, ayaa soo dhaweysay hadalkii uu ka yidhi Madaxweynaha Cusub ee Somalia wada hadaladda Somaliland iyo Somalia dhexmari doona.