6/29/2022
Today from Hiiraan Online:  _
Wararka Maanta- Axad, Sept 16, 2012
Madaxweynaha Soomaaliya oo ku hanjabay inuu Xarakada Al-shabaab la dagaalami doono haddii ay diiddo Nabadda
Axad, September 16, 2012 (HOL) — Madaxweynaha Soomaaliya, Xasan Sheekh Maxamuud ayaa ugu baaqay dagaalyahannada Al-shabaab ka tirsan ee Soomaalida ah inay kusoo biiraan hannaanka nabadeed ee dalka, kuwa ajnabiga ahna ay isaga baxaan dalka, isagoo sheegay in ciddii intaas diidda ay dowladdiisu la dagaalami doonto.


Xasan Sheekh ayaa hadalkan ku sheegay shir jaraa'id oo uu ku qabtay Muqdisho, isagoo xusay in dowladdiisu ay fursado shaqo u abuurayso dhallinyarada ragga iyo dumarka ee ku biiray Al-shabaab, kuwaasoo uu sheegay inay dhici karto inay ugu biireen dhaqaale la'aan, halka kuwo ugu biiray ciil ay beelo kale u qabanna ay ka shaqeyn doonto dowladdiisa sidii ay u qancin lahayd.

"Al-shabaab waxay u qaybsantaa laba qaybood, koox Soomaali ah kuwaas waxaan ugu baaqaynaa inay kasoo laabtaan falalkaas, qaybta kale ee ajnabiga ah waxaan iyagana ugu baaqaynaa inay dalkeenna isaga baxaan waayo xal aan taas ahayn uma hayno," ayuu yiri Xasan Sheekh.

Madaxweynaha cusub ee Soomaaliya ayaa dhawaan ka badbaaday weerarro is-miidaamin ahaa oo ay mas'uuliyadoodda sheegatay Al-shabaab, kuwaasoo ay ku dhinteen askar ka tirsan ciidamada Soomaaliya iyo kuwa AMISOM oo ilaalinayay hoteelka uu madaxweynuhu deggenaa.

Sidoo kale, madaxweynaha Soomaaliya wuxuu sheegay inuu dhammaaday casrigii is-qabqabsiga u dhexeeya dowladda lana galay casri wadashaqeyn, isagoo xusay in isaga, guddoomiyaha baarlamaanka iyo ra'iisul wasaaraha imaanaya ay si wadajir ah uga shaqeyn doonaan in Soomaaliya la gaarsiiyo dowladnimo buuxda.

Ugu dambeyn, madaxweynaha cusub wuxuu sheegay in cadaaladda aad loo ilaalin doono, isagoo sheegay in qofkii la xukumo aanay jiri doonin cid ka daba-timaadda, sidoo kalena qofkii lagu xukumo dil toogasho lagu fulin doono maalinta la xukumay maalinta ku xigta.

Shirka jaraa'id ee uu Xasan Sheekh ku qabtay Muqdisho ayaa noqonaya kii ugu horreeyay oo uu qabto tan iyo markii madaxweynaha Soomaaliya loo doortay Isniintii lasoo dhaafay, isagoo wareeggii ugu dambeeyay si aqlabiyad ah uga adkaaday madaxweynihii hore oo la tartamay.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/16/2012 3:34 PM EST
Xaflad taariikhi ah oo ay kasoo qaybgaleen qaar kamid ah hogaamiyayaasha gobolka iyo wufuud ka socota caalamka oo lagu maamuusayay caleema saarka madaxweynaha cusub ee Soomaaliya Xassan Sheekh Maxamuud ayaa lagu qabtay magaalada Muqdisho ee caasimada Soomaaliya.

9/16/2012 8:58 AM EST
Axad, September 16, 2012 (HOL) — Taliska booliiska maamulka gobolka Hiiraan ayaa warbaahinta uga warbixiyay dilal siyaabo kala duwan uga dhacay galinkii danbe ee maalintii shalay magaalada Baladweyne.

9/16/2012 8:20 AM EST
Axad, September 16, 2012 (HOL) — Madaxweynaha Soomaaliya, Xasan Sheekh Maxamuud oo maanta si rasmi ah ula wareegay xilka madaxweynimo ee dalka ayaa sheegay in dowladda uu dhisayo ay xoogga saari doonto lix qodob oo muhiim ah, kuwaasoo ay ka mid yihiin xasilinta dalka, dib u dhiska dhaqaalaha, soo celinta sharciga iyo adkeynta midnimada Soomaaliya.

9/16/2012 8:14 AM EST
Axad, September 16, 2012(HOL): Magaalada Västerås ee gobolka Västmanland ee dalka Sweden ayaa waxaa lagu qabtay xaflad lagu taageerayay isbedelka ka dhacay dalka Soomaaliya oo hadda helay dowlad buuxda oo aan KMG ahayn.

9/16/2012 7:34 AM EST
Axad, September 16, 2012 (HOL) — Dab xooggan islamarkaasina sababay khasaaro hantiyadeed ayaa maanta duhurkii waxa uu ka kacay suuqa weyn ee shidaalka lagu iibiyo ee loo yaqaan Umbultooriyo, iyadoona dabku sababay burbur soo gaaray qaar kamid ah goobo ganacsi oo ku yaalla halka uu dabka ka kacay.

9/16/2012 7:21 AM EST
Axad, September 16, 2012 (HOL) — Madaxweynihii hore ee Soomaaliya, Shariif Sheekh Axmed oo hadal ka jeediyay munaasabadda xil wareejinta ayaa sheegay in uu aad ugu faraxsan yahay in Soomaaliya ay ka baxday KMG ay u gudubto xilli ay talinayso dowlad joogto ah.

9/16/2012 5:28 AM EST
Axad, September 16, 2012 (HOL) — Xiisado dagaal ayaa lagu soo waramayaa inay ka taaganyihiin nawaaxiga deegaanka Birta-dheer halkaas oo ay isku horfadhiyaan ciidamada dowladda KMG, kuwa Raaskaambooni iyo Militariga Kenya oo iskaashanaya.

9/16/2012 3:30 AM EST
Axad, September 16, 2012 (HOL) — Wufuud ay ka mid yihiin madaxweynaha dalka Jabuuti, Ismaaciil Cumar Geelle, ra'iisul wasaaraha dalka Itoobiya ee aan weli la dhaarin, Haile Mariam Desaleng, ra'iisul wasaare ku xigeenka dalka Turkiga, Baker Buzdag iyo madaxweyne ku xigeenka Suudaan, Maxamed Cismaan Daaha ayaa soo gaaray Muqdisho, kuwaasoo ka qayb-galaya munaasabadda caleemo-saarka loo sameynayo madaxweynaha Soomaaliya oo Muqdisho ka socota.

9/16/2012 2:56 AM EST
Axad, September 16, 2012 (HOL) — Diyaargarowga xafladda lagu caleemo-saarayo madaxweynaha cusub ee Soomaaliya, Xasan Sheekh Maxamuud ayaa si weyn uga socota Muqdisho, iyadoo la xiray garoonka diyaaradaha ee Muqdisho sidoo kalena la fasaxay shaqaalaha dowladda iyo ardayda.