6/28/2022
Today from Hiiraan Online:  _
Wararka Maanta- Khamiis, Oct 4 , 2012
Afhayeenka Ciidamada AMISOM oo si guud uga hadlay Amniga Muqdisho, Qabsashada Kismaayo iyo Fatahaadii Baladweyne
Khamiis, Oktoobar 04, 2012 (HOL) — Afhayeenka AMISOM, Col. Cali Aadan Xumud oo maanta shir jaraa'id ku qabtay Muqdisho ayaa ka hadlay la wareegiddii degmada Kismaayo, ammaanka magaalada Muqdisho iyo fatahaadihii uu webiga shabeelle ee magaalada Baladweyne.

Col. Xumud wuxuu sheegay in ciidamada AMISOM iyo kuwa dowladda Soomaaliya ay si buuxda ula wareegeen gacan ku haynta magaalada Kismaayo ayna sugayaan ammaanka, isagoo xusay in magaaladaas aysan ka jirin wax dhibaato ah.

"Magaalada Kismaayo waxaa si buuxda gacanta ugu haya AMISOM iyo ciidamada dowladda Soomaaliya, kamana jiraan wax dhibaatooyin ah," ayuu yiri afhayeenka oo sheegay in ciidamadooda ay fariisimo ka sameysteen garoonka diyaaradaha, dekedda iyo weliba xarunta maamulka Kismaayo.

Sidoo kale, afhayeenka AMISOM wuxuu ka hadlay ammaanka magaalada Muqdisho isagoo sheegay in inkastoo ay magaalada ka dhaceen falal ammaan-darro haddana ay booliiska Soomaaliya iyo kuwa AMISOM ay dadaal ugu jiraan sidii ay ammaanka caasimadda u adkeyn lahaayeen.

"Ammaanka Muqdisho waa mid wanaagsan, inkastoo dhawaanahan ay shaqaaqado dheceen haddana ciidamadu waxay ku dadaaleen inay ammaanka sugaan, waana ku guuleysteen," ayuu yiri afhayeenka oo sheegay in howgallada lagu ammaanka lagu sugayo ay sii socon doonaan.

Dhanka kale, Col. Xumad oo kasoo jeeda dalka Jabuuti, ayaa wuxuu hadalkiisa ku daray in ciidamada Midowga Afrika ee ku sugan Baladweyne ay gacan siiyeen shacabka ku nool degmadaas markii ay fatahaaduhu ku dhufteen, isagoo xusay inay boqolaal qof ay geeyeen goobo ay fatahaadaha kaga nabadgalaan.

"Cidamada AMISOM oo kaashanaya ciidamada dowladda Soomaaliya waxay boqolaal qoys oo ku noolaa goobaha ay fatahaaduhu ku dhufteen, iyagoo dejiyay meelo ay kaga nabadgalaan fatahaadda," ayuu yiri afhayeenka ciidamada Midowga Afrika.

Hadalka afhayeenka ciidamada Midowga Afrika ayaa wuxuu imaanayaa iyadoo lagu wado in dhawaan uu madaxweynaha Soomaaliya ku dhawaaqo ra'iisul wasaare soo dhisa xukuumad dalka hoggaamisa afarta sano ee soo socota.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
10/4/2012 9:52 AM EST
Khamiis, Oktoobar 04, 2012 (HOL) — Madaxweynaha Soomaaliya, Xasan Sheekh Maxamuud ayaa ka qaybgalka dabaal-deg loo sameynayo sannad-guurgadii 50-aad ee kasoo wareegtay markii Uganda ay xorriyadeeda ka qaadatay dalka Ingiriiska oo ku beeggan todobaadka dambe.

10/4/2012 9:24 AM EST
Khamiis, Oktoobar 04, 2012 (HOL) — Ururka Raaskambooni oo ka mid ah xoogaggii gacanta ku siiyay ciidamada Kenya iyo kuwa Soomaaliya qabsashadii magaalada Kismaayo ee xarunta gobolka Jubbada Jubbada hoose ayaa sheegay in maamul u sameynta magaalada Kismaayo aysan ahayn mid laga sugayo dowladda dhexe ee Soomaaliya.

10/4/2012 8:06 AM EST
Khamiis, Oktoobar 04, 2012 (HOL) — Laanta dambi-baarista booliiska Soomaaliya ee loo yaqaan CID-da ayaa soo bandhigtay maanta 15-qof oo ay sheegtay inay dilal qorsheysan ka fuliyeen Muqdisho, kuwaasoo ay xustay inay Al-shabaab ka tirsan yihiin.

10/4/2012 7:49 AM EST
Khamiis, Oktoobar 04, 2012 (HOL) — Guddi wasiirro ah oo soo qiimaya khasaarihii ka dhashay fatahaaddii webiga Shabeelle uu ku sameeyay degmada Baladweyne ayaa maanta la magacaabay, waxaana guddigaas oo wasiirro ah madax u ah Cabdullaahi Goodax Barre oo ah wasiirka qorsheynta iyo xiriirka caalamiga ah ee Soomaaliya.

10/4/2012 7:02 AM EST
Khamiis, Oktoobar 04, 2012 (HOL) — Ciidamada dowladda KMG iyo kuwa Kenya ayaa ka bilaabay xaafadaha kala duwan ee magaalada Kismaayo howlgallo guriguri ah, iyadoona howlgalladaasi lagu soo qabqabtay tobaneeyo qof oo lagu eedeeyay in ay xiriir la leeyihiin Al-shabaab.

10/4/2012 3:31 AM EST
Khamiis, Oktoobar 04, 2012 (HOL) — Dowladda Mareykanka ayaa soo dhaweysay qabashada magaalada dekedda leh ee Kismaayo, halkaasoo ay toddobaadkan la wareegeen ciidamada dowladda Soomaaliya iyo kuwa Kenya ee ka tirsan AMISOM oo iskaashanaya.

10/4/2012 3:30 AM EST
Khamiis, Oktoobar 04, 2012 (HOL) — Afhayeenka Xarakda Al-shabaab, Sheekh Cali Maxamuud Raage (Sheekh Cali Dheere) oo la hadlayay idaacadda Andulus ee ku hadasha afka Al-shabaab ayaa ku hanjabay in ciidamada Kenya iyo kuwa la socda aysan ku nasan doonin magaalada Kismaayo ayna la dagaalami doonaan.