3/28/2024
Today from Hiiraan Online:  _
Wararka Maanta- Arbaco, Oct 3 , 2012
Guddoomiyaha Baarlamaanka Somalia oo Xarunta Golaha Shacabka kulan kula qaatay qaar ka mid ah Xildhibaannadii hore
Arbaco, Oktoobar 03, 2012 (HOL) — Guddoomiyaha baarlamaanka Soomaaliya, Prof. Maxamed Sheekh Cismaan Jawaari ayaa maanta kulan kula qaatay xarunta golaha shacabka ee Muqdisho in ka badan laba boqol oo xildhibaan oo ka mid ahaa xubnihii hore ee baarlamaankii waqtigiisu dhammaaday.

Prof. Jawaari iyo xubnaha uu la kulmay ayaa waxay kawada hadleen sidii ay wada-shaqeyn u dhexmari lahayd xildhibaannada cusub ee baarlamaanka iyo kuwii hore maadaama ay muddo dheer soo shaqeynayeen ayna yihiin kuwo waayo-arag ah, iyadoo sidoo kalena kulanka la iskula soo qaaday xildhibaannadii la dilay iyagoo ka mid ah baarlamaanka.

"Guddoomiyaha baarlamaanka wuxuu kulan la qaatay maanta 255 xildhibaanadii hore ka mid ah, waxyaabihii laga hadlay waxaa ka mid ahaa sidii looga faa'iideysan lahaa khibradihii ay heleen, maadaama ay horay u qaateen tababarro la xiriira habka uu ku shaqeynayo baarlamaanka," ayuu yiri C/llaahi Axemd Garruun oo mudanayaashii hore ka mid ahaa.

Sidoo kale, mudane Garruun wuxuu sheegay in la isla gartay in xildhibaannadii hore ay caawiyaan xildhibaannada cusub, ayna ka caawiyaan sidii ay howlahooda u gudan lahaayeen, isagoo xusay in kulanku uu ahaa mid ku dhammaaday is-afgarad.

"Waxaan isla garanay in xildhibaannadii hore ee aan ka mid noqon baarlamanaka ay helaan xuquuqahooda lana ilaaliyo xasaanaddooda," ayuu yiri Maxamed Cumar Geeddi oo ka mid ahaa xildhibaannadii hore ee baarlaamanka kana qayb-galay kulanka.

Ugu dambeyn, waxaa saxaafadda la hadlay guddoomiyaha baalamaanka oo sheegay inay kawada hadleen isaga iyo xildhibaannadii hore sidii umadda Soomaaliyeed wax loogu qaban lahaa; maadaama xildhibaanadii hore ay muddo howlaha baarlamaanka soo wadeen.

Baarlamaanka cusub ee Soomaaliya ayaa wuxuu ka kooban 275 mudane, kuwaasoo ay ka mid yihiin qaar ka mid ah xildhibaannadii hore, inkastoo ay kusoo biireen tiro badan oo aan horay uga mid ahayn, waxaana sugaya howlo badan afarta sano ee soo socota.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
10/3/2012 10:22 AM EST
Arbaco, Oktoobar 03, 2012 (HOL) — Dowladda Britain ayaa ku dhawaaqay inay 38-milyan oo Pound oo lacagta Ingiriiska ah ku caawinayso dowladda cusub ee Somalia si wax looga qabato dhinacyada ammaanka, horumarinta adeegyada bulshada iyo cadaaladda, kaddib markii wafdi ka socda dowladda Birtain ay Muqdisho kula kulmay madaxweynaha Soomaaliya, Xasan Sheekh Maxamuud.

10/3/2012 10:07 AM EST
Arbaco, Oktoobar 03, 2012 (HOL) — Oktoobar, 03, 2012 (HOL) -- Shirkada isgaarsiinta Hormuud ayaa ugu deeqday lacag dhan ilaa $100,000 doolar, dadkii ay dhibaatadu ka soo gaartay Fatahaadii ku dhufatay dhawaan magaalada Baladweyne ee xarunta gobolka Hiiraan.

10/3/2012 8:11 AM EST
Arbaco, Oktoobar 03, 2012 (HOL) — Diyaarado dagaal ayaa lagu arkay iyagoo dul-heehaabaya maanta deegaanno ka tirsan degmada Xarardheere ee gobolka Mudug, halkaasoo la sheegay in kooxaha burcadbadeedda ah ay ku haystaan ajnabi ay ku haystaan afduub.

10/3/2012 3:50 AM EST
Arbaco, Oktoobar 03, 2012 (HOL) — Xaaladda magaalada Kismaayo ee gobolka Jubbada hoose aya daggan maanta oo Arbaco kaddib markii ay qaraxyo ka dhaceen shalay gallinkii dambe, kuwaasoo geystay khasaare isugu jira dhimasho iyo dhaawac.

10/3/2012 3:45 AM EST
Arbaco, Oktoobar 03, 2012 (HOL) — Madaxweynaha dowladda Federaalka Soomaaliya, Xasan Sheekh Maxamuud ayaa ku jira wadatashiyo ku saabsan sidii uu kusoo magacaabi lahaa ra'iisul wasaaraha cusub ee Soomaaliya, iyadoo jagadan ay ku loolamayaan mas'uuliyiin fara badan oo uu ku jiro ra'iisul wasaaraha xilligiisu sii dhammaanayo.