6/29/2022
Today from Hiiraan Online:  _
Wararka Maanta- Talaado, Oct 23, 2012
Uganda oo sheegtay in Askar ka tirsan Ciidamadeeda ku sugan Soomaaliya lagu dilay dagaal ka dhacay Shabeellada Hoose

Talaado, Oktoobar 23, 2012 (HOL) — Dowladda Uganda ayaa sheegtay in afar ka mid ah ciidamadeeda ku sugan Soomaaliya ee qaybta ka ah AMISOM lagu dilay dagaal Khamiistii lasoo dhaafay ka dhacay duleedka garoonka diyaaradaha ee Balli-doogle oo 100-km dhinaca galbeed kaga beegan Muqdisho.

Askartan ayaa waxay ka mid ahaayeen askar doonaysay inay sameeyaan howgal ay ugu gudbayaan degmada Baydhabo ee xarunta gobolka Bay, halkaasoo ay ku sugan yihiin ciidammo ka tirsan kuwa AMISOM.

"Ciidamada la dilay waxay ka mid ahaayeen kuwa qaybta ka ah howgalka loogu magacdaray 'Xoreynta Shabeelle' oo ah wajiga labaad ee Al-shabaab looga saarayo gobollada ku dhow-dhow Muqdisho," ayaa lagu yiri warbixinta ay dowaldda Uganda soo saartay.

Ilo wareedyo kale ayaa sheegaya in ciidamadan la dilay lagu weeraray garoonka diyaaradaha ee Balli-doogle, halkaasoo ay Al-shabaab isku dayaysay inay mar kale dib ula wareegto, kaddib markii laga qabsaday toddobaadkii lasoo dhaafay.

Afhayeenka milateriga Uganda, Col. Felix Kulayigye ayaa shaaciyay warkan, isagoo sheegay in afartan askari lagu dilay qarax dhacay intii uu socday dagaalkii ay ku dhinteen; waxaana hadalkan uu imaanayaa iyadoo aysan AMISOM horay uga hadlin dilka askartan ka socotay dalka Uganda.

Dhanka kale, afhayeenka ciidamada AMISOM ee ku sugan Soomaaliya, Cap. Henry Obbo ayaa isaguna sheegay inay ka go'an tahay ciidamadooda inay ka gudbaan gobolka Shabeellada hoose ayna gaaraan degmada Baydhabo ee gobolka Bay, halkaasoo ay ciidamadooda ku sugan yihiin.

"Waxaan sii wadaynaa dagaalka aan kula jirno argagaxisada inta aan howgalkeenna ka dhameystirayno. Al-shabaab waxay lumisay dhul ballaaran oo ay ka talin jirtay, waxaana qorshaheenna hadda uu yahay inaan gaarno Baydhabo, waayo hadda waxaan ku sugannahay Leego," ayuu yiri Cap. Obbo.

Dagaalkii Khamiistii lasoo dhacay ka dhacya duleedka garoonka Balli-doogle ee gobolka Shabeellada hoose ayaa waxaa ku dhintay in ka badan 15 ruux oo ka mid ahaa kooxihii uu dagaalku u dhexeeyay.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
10/23/2012 10:36 AM EST
Talaado, October, 23, 2012 (HOL)- Shirkadda Agabka guryaha iyo xafiisyadda ee AL-NUUR, ayaa 480 caruurta agoomaha ah ee ku jira xarunta agoomaha ee magaaladda Hargeysa ugu deeqay dharkii iyo kabihii ay ku ciiddi lahaayeen, iyadoo sanad kasta iska xil saartay inay labadda Ciidood ee islaamka kafaalo qaado ka farxinta caruurtaasi iyo guud ahaan agabkii ay ku ciyaari lahaayeen.

10/23/2012 8:51 AM EST
Talaado, Oktoobar 23, 2012 (HOL) — Maxkamadda darajada koowaad ee Puntland oo ku taalla magaalada Garoowe ee xarunta Puntland ayaa maanta oo Talaado ah xukun dil toogasho ah ku ridday nin u dhashay dalka Yemen oo lagu eedeeyay inuu doonayay inuu hub sharci-darro ah kasoo dajiyay deegaan ka tirsan gobolka Bari.

10/23/2012 8:12 AM EST
Talaado, Oktoobar 23, 2012 (HOL) — Dagaal culus ayaa ciidamada dowlada Somalia iyo xoogag taabacsan Al-shabaab ku dhexmaray maanta duleedka degmada Baydhabo ee xaruta gobolka Bay, kaasoo ay ku dhinteen inta la ogyahay shan ka mid ah dhinacyadii dagaalamay.

10/23/2012 7:50 AM EST
Talaado, Oktoobar 23, 2012 (HOL) — Madaxweynaha Soomaaliya, Xasan Sheekh Maxamuud ayaa maanta xafiiskiisa Muqdisho kula kulmay wafdi uu hoggaaminayo wasiirka arrimaha dibadda ee Talyaaniga, Giulio Terzi.

10/23/2012 7:11 AM EST
Talaado, Oktoobar 23, 2012 (HOL) — Hoggaanka dambi-baarista booliiska Somalia ayaa maanta kusoo bandhigay Muqdisho laba wiil iyo gabar la sheegay inay ka mid ahaayeen Al-shabaab, iyadoo labada wiil la sheegay inay dilal ka geysteen Muqdisho iyo Baydhabo.

10/23/2012 3:58 AM EST
Talaado, Oktoobar 23, 2012 (HOL) —Dagaallo la isku adeegsaday hubka noocyadiisa kala duwan iyo madaafiic ayaa ka dhacay wadada isku xirta degmada Badhaadhe iyo Deegaanka Kulbiyow ee gobolka Jubada hoose.

10/23/2012 3:19 AM EST
Talaado, Oktoobar 23, 2012 (HOL) — Xarakada Al-shabaab ee Soomaaliya ayaa ku hanjabtay inay qaraxyo ka geysanayso dalka Britain, kuwaasoo ay sheegeen inay jawaab u noqonayaan dagaalka ay kula jirto Islaamka iyo gacan gelintii ay u gacan-gelisay Abuu-Xamsa dowladda Mareykanka.